1 Yesu loyali habehi nakwinjila Yelusalemu, nawafika Betifage na Besania, habehi na chidunda cha Mizeituni. Yesu nakawalajiza walanguswa wa heye weli, 2 nakawalonjela, “Mlute hali chijiji chiwele kumwando kwa hemwe. Lomkwinjila amo, molifika mwana idogowi liwohigwe, ling'hali kwinhigwa na munhu. Mlichumulile mligale. 3 Wone munhu yawauze, lekachoni mwangudita ahyo? Mumlonjele, Mkulu kanguligana kolihilusa hamba.”

4 Baho, nawaluta, nawalifika mwana idogowi limwe mluga likoweligwe hali chihindilo. Lowali wolidohola, 5 wanhu wamwenga wawele ahala wawauza, “Lekachoni mwangulidohola alyo mwana idogowi?” 6 Walanguswa wamwidichilla kota vyowalonjelwe na Yesu, nawo wawaleka waluta nalyo. 7 Wamhilichila Yesu alyo wmana idogowi, wamtandichila nguwo za hewo kuli idogowi na Yesu kakwina kekalisa. 8 Wanhu wenji nawazanza nguwo za hewo mbalabala, wanji nawalambalika miputi ja migodi jowatemile kumigunda. 9 Wanhu weng'ha walongole na wawele kumbele wakwiniza lizi wolonga, “Lutogo! Yamtambichizwe ayo yalinguya kwa itagwa lya Mkulu! 10 Utambichizwe Undewa ulinguya kahi wa mhaza wa hetwe Daudi. Yatogoligwe Nguluwi kuchanya kilanga.”

11 Yesu nakenjila Yelusalemu nakaluta yatimilile mbaka kuli luga lwa Ng'handa ya Nguluwi, nakalola lola kona chila chinhu goya. Na kwa vila nayali matinazo, nakaluta Besania hamwe na wala kumi na weli.

12 Hamitondo, nalowali wolawa Besania, Yesu nakona nzala. 13 Lelo, nakalyona kwa kutali igodi lya misada liwele na mahamba menji, kalihejelela habehi leka yalole wone liwele na mafuza goneche. Loyaufichile, nakalyona lilihela mafuza, ila mahamba yeng'ha, kwa vila hawali mhela wa kulela mafuza. 14 Baho kalilonjela lila igodi, “Kwaluchila lehano na mazuwa gose munhu yoneche yaleche kulya mafuza ga hegwe.” Walanguswa wa heye nawahulika ulonzi awo.

15 Lelo, nawafika Yelusalemu. Yesu nakaluta mluga lwa Ng'handa ya Nguluwi nakaluka kuwawinga wanhu wawele woguza na kugula vinhu amo. Nakagudusa visanya vya wala wali wovunza sendi, na wala wali woguza ng'hunda. 16 Nahamkundile munhu yoneche kukolela mluga lwa Ng'handa ya Nguluwi yaholile chinhu. 17 Hamba nakawalangusa, “Yandichigwa kuli Maandiko Matakatifu, Nguluwi nakalonga, ‘Ng'handa ya heni yochemigwa ng'handa ya kulandila kwa mbuli ya isi zeng'ha.’ Ila hemwe muigalula iwa mhalika ya wabokaji!”

18 Watambika wakulu na walangusa wa malajizo ga Musa lowahuliche ago, nawaluka kupala nzila ya kumkopola, ila nawamdumba kwa vila wanhu wenji nawabubuwala na malanguso ga heye. 19 Loliswele, Yesu na walanguswa wa heye nawoka honhu hala.

20 Mitondo kung'hali lufuku, lowali wokola, nawalyona lila igodi lya mafuza nalikala ng'ong'ona lyeng'ha, mbaka mizabi. 21 Petili nakakumbuchila gala nagakoleche, nakamlonjela Yesu, “Mlangusa, ulole lila igodi lya misada lyoulipanjile, vyolikalile bebeda!”

22 Yesu nakawalonjela, “Muwe na makundo kwa Nguluwi. 23 Ndanguwalonjeleni ndikomya, munhu yochilonjela chidunda achi, ‘Ung'humbuche ukagwe kuli bahali,’ ne kona majesa mnhumbula ya heye, leka yokunda kota mbuli zeng'ha zoyolonga zokoleka, kuditilwa mbuli ayo Nguluwi komditila. 24 Lelo, ndanguwalonjelani, homumlanda Nguluwi na kumuuza chinhu, mkunde kota mchibochela, na hemwe mopegwa. 25 Homumlanda Nguluwi, mumusile chila munhu yawaditileni vibi choneche, leka Mhaza wa hemwe yawele kilanga yawosele hemwe gehile gomditile.” 26 “Ila wone hamlinguwosela wanji, na Mhaza wa hemwe yawele kilanga howowosela hebu hemwe gehile genu gomditile.”

27 Lelo, nawafika kahi Yelusalemu. Yesu loyali yojenda kuli luga lwa Ng'handa ya Nguluwi, watambika wakulu na walangusa wa malajizo ga Musa na wasekulu wamlutila, 28 nawamuuza, “Kwangudita mbuli zino kwa ludali lwachi? Yalikohi yakupele ludali lwa kukola mbuli azi?”

29 Ila Yesu nakawalonjela, “Ndowauzani chinhu chimwe, lomkwidichila, nani kahi ndowalonjelani ndangudita mbuli azi kwa ludali lwachi. 30 Ndaze, ludali lwa Yohani lwa kubatiza nalulawa kilanga ama kwa wanhu? Nyidichileni.”

31 Nawaluka kiuza hewo kwa hewo, “Tolonga ndaze? Hotulonga, nagalawa kwa kilanga kotuuza, lelo, mbona hamumkundile Yohani? 32 Ila hotulonga, nalulawa kwa wanhu.” Nawadumba lung'hongola lwa wanhu wamemile kwa vila weng'ha nawakunda kota Yohani yali mloli wa Nguluwi. 33 Lelo, nawamwidichila Yesu, “Hetwe hatuvizelele.” Na heye Yesu nakawalonjela, “Na heni siwalonjela ndangudita mbuli zino kwa ludali lwachi.”