1 Yesu nakaluka kulonga na hewo kwa nhelo, kwali na munhu yumwe nakalima mgunda wa zabibu. Nakazungulusila lugagala, na hagati nakabawa izimbo lya kukamila divai, nakazenga chidandalo kahi. Nakawabasila mgunda awo walimi, na kaheluka isi ya kutali. 2 Mhela wa kubeta, nakamlajiza chitumagwa wa heye kwa wala walimi, yakamigalile chasi cha mbena cha mgunda wa heye wa zabibu. 3 Wala walimi, nawamibata, wamsubula, nawamuhilusa ne chinhu. 4 Nakamlajiza kahi chitumagwa yunji, ayu kahi wamlumiza mutwi na kumdita vinhu kwa kumbasa soni. 5 Yula yawele na mgunda nakamlajiza chitumagwa yunji, na heye wamhola wamkopola. Na wamwenga wenji walajizwe nawatowigwa na wanji nawakopoligwa. 6 Yaponile kulajizwa yali mwanage mlume yamganile. Hamba kamlajiza kwa yawabasile mgunda, kejesa kata, “Hanji womhulichiza mwana wa heni.” 7 Ila awala walimi wazakilonjela hewo walonga, “Ayu ndo yohalila, leka tumkopole na mgunda wa zabibu tohalila hetwe!” 8 Baho wamibata ayula yatumigwe, wamkopola wamtaga kutali na hali mgunda wa zabibu.

9 Yesu nakawauza, “Yowa ndaze kwa ayula yawele na mgunda wa zabibu? Ndanguwalonjela, kokuya kuwabagamiza wanhu weng'ha na kuwabasila aula mgunda wanhu wanji. 10 Ndaze, hamsomile Maandiko Matakatifu aga?

12 Watambika wakulu, na walangusa wa Malajizo ga Musa na wasekulu nawavizela kota nhelo ayi yali kwa hewo. Lelo, nawajeza kumibata, ila nawadumba ikugusi lya wanhu. Lelo, wamleka, waluta.

13 Lelo, Mafalisayo wamwenga na vitumagwa wa chilundo cha Helodi, nawatumigwa leka wamgwilize Yesu kwa ulonzi wa heye. 14 Wamlutila, nakumlonela, “Mlangusa, tuvizela kota hegwe ndo munhu utanganiche ulingulonga ukomya, na hulingumdumba munhu yoneche. Na ukulu wa munhu hauwele chinhu kwa hegwe, ila kwangulangusa kukomya kweng'ha kukolela Nguluwi. Ndaze, yowa goya kulavya kodi kwa mndewa wa Loma, au hebu? Tulavye au tuleche kulavya?” 15 Ila Yesu nakavizela uhadi wa hewo, nakawalonjela, “Lekachoni mwangunjeza? Mndajile ayo sendi ndiilole.” 16 Wamlajila. Na heye nakawauza, “Mutwi na itagwa ali ndo lya whaani?” Nawamwidichila, “Ndo wa mndewa wa Loma.” 17 Yesu nakawalonjela, “Ga Kaisali mmigalile Kaisali, na ga Nguluwi mmigalile Nguluwi. Nawabubuwala ng'hatu na heye.”

18 Masadukayo, nawawele wolonga kota kuduhu uzilipuko kwa wabagame, nawamlutila Yesu nakumuuza, 19 “Mlangusa, Musa nakatulajiza hino, munhu wone yabagame na kuleka mchewake ne kulela mwana, mng'holoze imgana yamhalile ayo mdala mlekwa, leka yamlelele wana mng'holoze. 20 Lelo, kwali na wanhu saba wa lukolo lumwe. Wa mwaluko nakahola, nakabagama ne kulela mwana. 21 Na mng'holoze wa keli nakamhola yula mdala mlekwa, na heye kahi nakabagama ne kuleka mwana, na mng'holoze wa kadatu iwa hiho. 22 Weng'ha saba nawabagama ne kuleka mwana. Logadumile, na yula mdala mlekwa nakabagama. 23 Lelo, zuwa lya wabagame kuzilipuka, mdala ayo kowa mdala wa yalikohi? Weng'ha saba na wali wamhesile.” 24 Yesu nakawalonjela, “Hemwe muwifya kwa vila hamgazelele Maandiko Matakatifu ne mong'ho wa Nguluwi. 25 Mina wabagame howozilipuka hawohesa ne kuhesigwa hebu, wowa kota wahilisi wa kilanga. 26 Ila mbuli ya kuzilipuka kwa wabagame, ndaze, hamsomile chitabu cha Musa kuli honhu ha chila chisosolo lochali chikwaka chiluli? Nguluwi nakamlonjela Musa, heni ndo Nguluwi wa Ibulahimu na Nguluwi wa Isaka na Nguluwi wa Yakubu. 27 Lelo, heye hawele Nguluwi wa wabagame, ila heye ka Nguluwi wa wawele wakomu. Hemwe muwifya ng'hatu.”

28 Mlangusa yumwenga wa malajizo ga Musa nakoya, nakahulika kilewa kwa hewo. Loyawene Yesu yawedichile goya masadukayo, kalawila, nakamuuza, “Kuli Malajizo ga hewo ga Nguluwi, ilikohi iwele ng'hulu kupuluta geng'ha?” 29 Yesu nakamwidichila, Mwaluko ndo ayi, “Hulichize Izilaeli! Mkulu Nguluwi wa hetwe ndo yaliyeka Mkulu. 30 Umgane Mkulu Nguluwi wa hegwe kwa nhumbula ya hegwe yeng'ha na kwa muhe wa hegwe weng'ha na kwa luhala lwako lweng'ha na kwa mong'ho wa hegwe weng'ha. 31 Na lya keli ndo ali, mgane youlingikalasa habehi, kota vyoulingigana gwegwe baho. Kuduhu ilajizo linji lilwele likulu kupuluta gano.”

32 Lelo, yula mlangusa wa malajizo ga Musa nakamlonjela, “Goya Mlangusa! Kulonga kukomya kota Nguluwi ndo yumwe hela na kuduhu yunji ila heye. 33 Na igana munhu kumgana Nguluwi kwa nhumbula yeng'ha na kwa luhala lweng'ha na kwa mong'ho weng'ha na kumgana youlingikalasa habehi kota vyoulingigana gwegwe baho. Mbuli ayi ndo itanganiche ng'hatu kupuluta kulavya nhambiko ya miwunde na nhambiko za kulakaza.” 34 Yesu vyoyawene kota ayu munhu nakamwidichila goya, nakamlonjela, “Hegwe huwele kutali na Undewa wa Nguluwi.” Kulawila aho, kuduhu ne munhu yajezile kumuuza chinhu.

35 Yesu loyali yolangusa mng'handa ya Nguluwi, nakauza, “Lekachoni walangusa wa Malajizo ga Musa wangulonga kota Kilistu Mlohozi ndo mwanage Daudi? 36 Heye Daudi yolongozwa na Muhe Yelile nakalonga,

37 “Heye Daudi nakamchema Kilistu Mkulu. Lelo, Kilistu Mlohozi kowa ndaze mwanage Daudi?”

Lung'hongola lwa wanhu lwali lumuhulichiza kwa usangalalo. 38 Kuli malanguso ga heye, Yesu nakalonga, “Milolele na walangusa wa Malajizo ga Musa, wawele ngugana kitapula wavalile mikanzu milefu na kulamsigwa na wanhu chiukulu kuli masoko, nakugana kikalisa honhu hatanganiche kuli ng'handa za kusalila, 39 na kuhagula honhu hatanganiche mng'handa za kusalila na honhu hatanganiche hali mnvina. 40 Nakuwabunza wadala walekwa ng'handa kwa usugu wawo, aku wochisinjizila kumlanda Nguluwi kwa kulutilila! Wotagusigwa kwa wihe lukami ng'hatu.”

41 Yesu nakekala habehi na honhu howali wolavila ndolendole. Nakawa yolola wanhu wenji lowali wolavya sendi na kujela mli isanduku lya ndolendole kuli ng'handa ya Nguluwi. Wawele na lufufu wenji nawalavya sendi nyinji. 42 Aho nakoya mamo yumwe mlekwa mzunwa, nakalavya migwala mili midodo ja sendi. 43 Aho Yesu nakawachema walanguswa wa heye, nakuwalonjela, “Ndanguwalonjelani ndikomya, mamo ayu mlekwa mzunwa kajela chasi chinji mli isanduku lya ndolendole kusinda chowajelile wanji weng'ha. 44 Mina wanhu wawele na lufufu nawalavya ndolendole kulawa kuli lufufu nalowawele nawo. Ila ayu mamo kwa uzunwa wa heye, kalavya chila chinhu choyawele nacho.”