1 Yesu nakoka ahala nakaluta kuli mkowa wa Yudeya, mbaka kumwambu mwa lwanda lwa Yolodani. Wanhu wenji na wamlutila kahi, na heye kawalangusa kota vyoyaditaga.

2 Lelo, Mafalisayo wamlutila, na kwa kumjeza nawamuuza, “Ndaze, yowa goya kwa munhu kumha luleko mchewake?” 3 Yesu nakawedichila, “Musa nakawapa Malajizo gachi?” 4 Hewo nawedichila walonga, “Musa nakakundiza munhu yamwandichile kalatasi ya luleko mchewake na kumleka.”

5 Yesu nakawalonjela, “Musa nakawandichila ilajizo alyo, kwa vila loyawene vyomuwele na nhumbula zigagadale. 6 Ila kulawila mwaluko vila Nguluwi loyalumbile isi, nakalumba mlume na mdala, kota vila Maandiko Matakatifu vyogalonjile. 7 Ahyo mlume kowaleka mhaza na mayake na kilumba na mchewake, 8 na hewo weli, wowa lukuli lumwe. Hawowa weli, ila yumwe. 9 Lelo, choyalumbanize Nguluwi, munhu yaleche kulekaniza.”

10 Lowahiluche kahi mng'handa, walanguswa wa heye nawamuuza mbuli ayo. 11 Na heye nakawalonjela, “Wone mlume yamleche mchewake, na kuhola mdala yunji, kangudita ung'hondwa kwa mchewake. 12 Hihyo du, wone mdala yamleche mlume wa heye, kwa kuholigwa kwa mkasano yunji, na heye kangudita ung'hondwa.”

13 Wanhu nawamigalila Yesu wana wadodo, yawawichile moko, ila wala walanguswa nawawang'hanuchila. 14 Yesu vyoyawene ahyo, nakazudila, nakawalonjela, “Muwaleche awo wana wadodo woye kwa heni, mleche kuwalemeza, kwa vila Undewa wa Nguluwi ndo kwa wanhu wafandile kota wana wano. 15 Ndanguwalonjelani ndikomya, munhu yoneche yalemwele kubochela Undewa wa Nguluwi kota mwana mdodo, hokwinjila hebu amo.” 16 Hamba kawapagata wana awo, kawawichila moko, kawatambichiza.

17 Yesu loyaluche kahi majendo ga heye, munhu yumwe kamuyila yobilima, kafugama kumwando kwa heye, nakamuuza, “Mlangusa unojile, ndite choni ndiuhalile ukomu wa mazuwa gose ne kuduma?” 18 Yesu nakamwidichila, “Lekachoni kwangundonjela noga? Haduhu munhu yanojile ila yumwe, Nguluwi yaliyeng'ha. 19 Kugazela Malajizo, ‘Uleche ung'hondwa, uleche kukopola, uleche kuhiza, uleche kulavya ulolezi wa udesi, uleche kuhada, uwahulichize mhaza na mayako.’ ” 20 Heye kamwidichila, “Mlangusa, ago geng'ha ndigabata kulawila londali msongolo.”

21 Yesu kamlola, kanojezwa na heye, kamlonjela, “Kwisilwa na chinhu chimwe, ulute kaguze vinhu vyeng'ha vyo uwele navyo, kawegalile awala wawele wazunwa sendi azo, nagwe kowa na ng'hano kilanga, hamba umbinze.” 22 Loyahuliche ago, kesinza, kaluta yawele na masinzo, kwa vila yali na lufufu lwinji.

23 Yesu kawalola walanguswa wa heye, kawalonjela walanguswa wa heye, “Mlole vyoiwa ngondo kwa wawele na lufufu kwinjila kuli Undewa wa Nguluwi.” 24 Walanguswa nawabubuwala na ulonzi wa heye. Yesu nakawalonjela kahi, “Wanangu, yowa ngondo ng'hatu kwinjila kuli Undewa wa Nguluwi! 25 Yowa ubewe kwa igongolo ngamiya kufyela kuli itubuli lya chihomo, kusinda yawele na lufufu kwinjila kuli Undewa wa Nguluwi.” 26 Walanguswa nawabubuwala ng'hatu weuza, “Lelo, yalikohi yoloholigwa?” 27 Yesu kawalola na kulonga, “Kwa munhu hela haiditikwa nehado, ila kwa Nguluwi mbuli zeng'ha zoditikwa.”

28 Petili nakamlonjela, “Na hetwe ndaze? Tuleka geng'ha, natukuwinza!” 29 Yesu nakalonga, “Ndanguwalonjelani ndikomya, chila munhu yalechile ng'handa ama wang'holoze ama lumbu ama mayake ama mhaza ama wanage ama migunda kwa mbuli ya heni na kwa Mbuli Inojile, 30 kobochela mala miya ya vyonjezeche mhela awu wa sambi, ng'handa ama lumbu ama wang'holoze ama mayako ama wana ama migunda hamwe na kugazigwa, na kuli mhela ukuya kobochela ukomu wa mazuwa gose. 31 Ila wenji wawele wa mwaluko wowa wa mwiso, na wawele wa mwiso, wowa wa mwaluko.”

32 Yesu na walanguswa wa heye, lowali mnzila kuluta Yelusalemu na Yesu yawele yawalongole. Walanguswa nawali wodumba, na wanhu wamuwinzile nawadumba. Yesu nakawahola kahi hafungo wala walanguswa kumi na weli, nakaluka kuwalonjela gala gozakumlawila, 33 “Hulichizeni! Twanguluta Yelusalemu, na ako Mwana wa Munhu kowichigwa mmoko mwa watambika wakulu na walangusa wa malajizo ga Musa, na hewo womtagusa kwa wihe yabagame na kumuwika mmoko mwa wanhu hawawele Wayahudi, 34 na hewo womseka na womtemela mite, na kumtowa kwa himbati na kumkopola. Ila zuwa lya kadatu kulawa nahoyabagame kozilipuka.”

35 Yakubu na Yohani wana wa Zebedayo, nawamlutila Yesu wamlonjela, “Mlangusa, twangugana utuditile chinhu chotukulanda.” 36 Yesu nakawauza!, “Mwangugana ndiwaditileni choni?” 37 Wamwidichila, “Utukundile kikala chigoda cha hegwe cha Undewa, yumwe kudilo kwa hegwe na yumwe kumoso kuli ukulu wa hegwe.” 38 Yesu nakawalonjela, “Hamvizelele mwangulanda choni! Ndaze, moweza kung'hwela chizombe cha kugazigwa chonding'hwela na kubatizigwa kota vyondibatizwa?”

39 Wamwidichila, “Toweza.” Yesu kawalonjela, “Chizombe chonding'hwela, mong'hwela, na mobatizwa kwa nzila ila yondibatizigwa. 40 Ila yalikohi yochikala kudilo ama kumoso kwa heni, haiwele mbuli ya heni kuhagula, ila honhu hala nahagongomanyigwa kwa wala wahaguligwe.”

41 Awala walanguswa wanji kumi lowahuliche ago, nawaluka kuzudizwa na Yakubu na Yohani. 42 Ahyo, Yesu nakawachema, kawalonjela, “Mvizela kota wala walingujesigwa kota vilongozi wa isi, walongozaga wanhu wa hewo kwa lupichi, na wakulu awo wawemililaga wanhu wawo. 43 Ila kwa hemwe ileche kuwa hino, leka yalingugana yawe mkulu hali hemwe, imgana yawe chitumagwa wa hemwe. 44 Yalingugana yawe wa mwaluko, igana yawe chitumagwa wa weng'ha. 45 Mina Mwana wa Munhu hoyile, kukolelwa mijito, ila kuwakolela mijito na kuulavya ukomu wa heye, kwa mbuli ya ulohozi wa wanhu wenji.”

46 Lelo, nawafika Yeliko, Yesu na walanguswa wa heye, wali wolawa na chinyakanye cha wanhu. Yumwe nayawele hambe yalole yalinguchemigwa Batimayo mwana wa Timayo yali yekale hafungo mwa nzila. 47 Loyahuliche Yesu yalawile Nazaleti kangukola ahala honhu, nakaluka kukwiniza lizi, “Yesu Mwanage Daudi umbonele isungu!” 48 Wanhu wenji nawamng'hanuchila leka yanyamalile, ila heye kalutilila kukwiniza lizi, “Mwana wa Daudi, umbonele isungu.”

49 Yesu nakema nakalonga, “Mchemeni.” Baho, nawamchema ayo yohambe yalole, nawamlonjela, “Ikangaze, Wime, kangukuchema.” 50 Na heye katozela hafungo ivalo lyake, kazumilila, kamlutila Yesu.

51 Yesu nakamuuza, “Kwangugana ndikuditile choni?” Ayula yohambe yalole nakamlonjela, “Mlangusa ndangulanda ndizengulola kahi.”

52 Yesu nakamlonjela, “Ulute. Makundo ga hegwe gakulohola.” Baho yula yohambe yalole kawa yolola, kamuwinza Yesu mnzila.