1 Ka Yesu n pianꞌ naae la, o yi Galilee n kpenꞌ Juuda zinꞌisiꞌa line be Joodan moꞌar nyaꞌaŋ. 2 Ka nidib bedego dol o ka o maꞌae banꞌadnam la wusa banꞌas anina.

3 Ka Farisee dim kenn o saꞌan na ye ba kpansi o pianꞌadi gos, ka buꞌos ye, “Ti wada puugine, suer be ye dau lebisi o poꞌa, yelsiꞌa yelaa?”

4 Ka Yesu lebis ye, “Ya pu karem Winaꞌam gbauŋ laa? Pinꞌilugin la Winaꞌam maal dau ne poꞌa, 5 ka yel ye neꞌeŋa yela ka dau basi o baꞌ ne o ma, ka on ne o poꞌa babayi la taꞌal taaba a yinni. 6 Ka ba leŋ kaꞌ babayi yaꞌase. Amaa ba yuꞌun liebne yinni. Ban ka Winaꞌam taꞌal taaba la, soꞌ da weligi baa.”

7 Ka Farisee dim la buꞌos o ye, “Ka wala ka Moses da sobi tis noor ye dau tunꞌe tis o poꞌa lebisug gbauŋ ka kad o?”

8 Ka Yesu lebis ye, “Ya sukpiꞌeuŋ la zug, ka Moses da tis noor ye ya tunꞌe lebisi ya poꞌab. Amaa pinꞌilugin sa la li da kaꞌ alaa. 9 Ka m yeti ya ye, soꞌ yaꞌa lebis o poꞌa ka li kaꞌ dianꞌad tuuma yela, o yaꞌa toom di poꞌa yaꞌas, on sob tum ne poꞌa saꞌuŋ.”

10 Ka o nyaꞌandolib la yel o ye, “Dau ne o poꞌa yela yaꞌa ane ala, li pu suꞌum ka dap di poꞌaba.”

11 Ka o yeli ba ye, “Li kaꞌ nidib wusa na nyaŋe diꞌe pianꞌ kaŋaa, asee bane ka Winaꞌam tisi ba la. 12 Ba duꞌa dap sieba ka ba daulim kaeꞌ. Ka nidib me fua dap sieba. Ka Winaꞌam yela sieba pu dit poꞌaba wenne ba fua ba meŋ ne. Ka one na nyaŋe diꞌe yelkaŋa, on diꞌem.”

13 Ka ba mor biis kenn Yesu saꞌan na ye o nok nuꞌug n paꞌal ba zutin ka puꞌus Winaꞌam tisi ba. Ka o nyaꞌandolib la kad nidib la.

14 Ka Yesu yel ye, “Kel ka biis la kena ka da kadi baa. Winaꞌam soꞌolim ane bamanam taaba din.” 15 Ka noke o nuꞌug paꞌali ba zutin ka keŋ.

16 Daar yinni ka dau kenn Yesu saꞌan na, ka buꞌos o ye, “Paꞌana, m na tum tuumsuŋ bo ka nye nyovur dine kaꞌ naare?”

17 Ka o lebis o ye, “Bo ka fu buꞌosidi m one a suꞌum yela? Yinni maꞌaa be, one a suꞌum. Fu yaꞌa bood ye fu nye nyovur, fun tumi o noyelug la yet siꞌem la.”

18 Ka o buꞌos ye, “Nooryelug bane saꞌane?”

Ka Yesu lebis yel o ye, “Da ku nida, da saꞌam poꞌa, da zuu, da dit ziri kaseta, 19 naꞌasimi fu baꞌ ne fu ma ka noŋi fu tiraan wuu fu meŋ.”

20 Ka dasaŋ la yel o ye, “Neꞌenam wusa man niŋiya, ka bo lem kpelim?”

21 Ka Yesu lebis o ye, “Fu yaꞌa bood ye fu zemis fun kem kuos fun mor siꞌel wusa tis noŋ dim. Ala ka fu na nye kpanꞌam arazana ni. Ka kena dol man.”

22 Ka on wum neꞌeŋa la ka o keŋ ne susaꞌaŋ, bozugo o da ane kpanꞌa.

23 Ka Yesu yel o nyaꞌandolib la ye, “Asida ka m yeti ya ye, li na toe tis arazak daan ne on na kpenꞌ Winaꞌam soꞌolim la ni. 24 M yeti ya yaꞌas ye, li na a naꞌana ye yugum kpenꞌ kparipiim voonrin n gat arazak daan na kpenꞌ Winaꞌam soꞌolim la ni.”

25 Ka o nyaꞌandolib la n wum neꞌe la ka li paki ba hale. Ka ba yet ye, “Anoꞌon yuꞌun na nye faangire.”

26 Ka Yesu gosi ba ka yel ye, “Yel kane toe tis ninsaal la, li pu toe tis Winaꞌam.”

27 Ka Piita lebis o ye, “Ti bas siꞌel wusa ka dol uf. Ka ti na nye bo?”

28 Ka Yesu yeli ba ye, “Asida ka m yeti ya ye, dunia paal la ni, ka Ninsaal Biig yaꞌa zinꞌini o naꞌam gbauŋ venliŋ la zug la, yanam bane doli m la me na zinꞌin naꞌam gbana piinayiiŋa la zug, ka kad Israel buudi piinayiiŋa la saria. 29 Ka bane wusa basi ba ya, bee ba bieya, bee ba pitib, bee ba tanp, bee ba baꞌanam, bee ba manam, bee ba biis, bee ba pood, mam yuꞌur zug, ba na diꞌe ban bas siꞌel la, noor kobuga, ka lem nye nyovur line kaꞌ naare. 30 Ka bedego bane a tuon dim la na leb nyaꞌaŋ, ka bane be nyaꞌaŋ la na be tuon.”