1 Saŋkan la, nyaꞌandolib la da kenn Yesu saꞌan na, yet ye, “Anoꞌone a kpeenm Winaꞌam soꞌolimin la?”

2 Ka Yesu buol biigi ziꞌeli ba soogin na, 3 ka yeli ba ye, “Asida ka m yeti ya ye, ya yaꞌa pu tiake ya sunya a wuu biis ne, ya ku kpenꞌ Winaꞌam soꞌolimin naa. 4 Ka one wusa siedi o meŋ wenne biig ne, o na a kpeenm Winaꞌam soꞌolimin la.

5 “Ka one diꞌe bibil ka o wenne oŋa, man yuꞌur zug, o diꞌe man.”

6 “One ke ka bibibis bama yinni bane niŋi m yadda la tum tuumbeꞌed, li aan suꞌum o saꞌan ka ba deŋim nokin neertitaꞌar n lo kolo o niŋgoonr ka losin o moꞌar zuluŋin ka kuꞌom dii o.”

7 Ka ye, “Dunia dima, ya na namis, yaname panꞌas nidib ka ba tum tuumbeꞌed la zug. Asee ka panꞌasug be, amaa namisug na be n tis one ket ka panꞌasug be la.

8 “Fu nuꞌug bee fu nobir yaꞌa ket ka fu tum tuumbeꞌed, fun fiꞌigime li bas. Li a suꞌum ne fun na nye nyovur ka nuꞌug bee nobir koꞌog, n gaad fun na mor nuꞌus ne noba wusa ka kpenꞌ bugum kane pu kpiisida. 9 Fu nif yaꞌa ket ka fu tum tuumbeꞌed, fun likimi li bas. Li a suꞌum ne fun na nye nyovur ka nif kaeꞌ n gaad fun na mor nini ayi ka ba lob uf bas bugum teŋ.”

10 Ka Yesu yel ye, “Baŋimi ka da poꞌogi bibama yinnii. M yeti ya ye ba maleknam bane be arazana ni la be m Baꞌ tuon saŋa mekama. 11 (Ninsaal Biig la ken na la, ane ye o faaene bane bodig la.)”

12 “Ya tenꞌesid bo? Ka soꞌ naan more peꞌes kobuga ka yinni bodige, o ku bas piiswai ne awai la zuer zugin ka ba onbid, ka o keŋ ia yinni laa? 13 Ka o yaꞌa nye li, o sunf na maꞌae ne yinni la gaad piiswai ne awai bane pu bodig laa. 14 Li ane ala n tis m Baꞌ one be arazana ni la. O pu bood ye biis la yinni bodige.

15 “Fu baꞌabiig one a yadda niŋid yaꞌa tum uf taal, kem yel o taali a siꞌem, fu ne on maꞌaa. Ka o yaꞌa siaki fu noor o kpelim ane fu baꞌabiig. 16 Amaa o yaꞌa zanꞌas fu noor, fun dol nid yinni bee ayi paꞌasi fu zug n keŋe o saꞌan. Ka nidib ayi bee atanꞌ na di kaset yel la maalug zug. 17 Ka o yaꞌa pu siaki ba, fun yelimi li Winaꞌam nidib laꞌasugin. Ka o yaꞌa pu siak Winaꞌam nidib la sooginee, yanam basimin o wenne one pu dol Winaꞌam bee lampodiꞌes.

18 “Li ane asida ka m yeti ya ye, lin ka ya lo dunia nwa ni la Winaꞌam me na lo. Ka lin ka ya idig la Winaꞌam me na idig.

19 “M yeti ya yaꞌas ye nidib ayi yaꞌa naal noor ka sos m Baꞌ Winaꞌam siꞌel, o na maali li tisi ba. 20 Ka nidib ayi bee atanꞌ yaꞌa laꞌas man yuꞌur zug, m na be ne ba.”

21 Ka Piita kena n buꞌos Yesu ye, “M Zugsoba, m baꞌabiig na tum tuumbeꞌed n poꞌogi m, noor ala ka m na tis o suguru? Noor ayopoi bee?”

22 Ka Yesu yel o ye, “M pu yel ye noor ayopoi maꞌanee. Amaa m ye hale noor piisyopoi bu yopoi.

23 “Dinzugo arazana soꞌolim wenne naꞌab soꞌ one bood ye o gelig o sama ne o tumtumnib. 24 Ka one pinꞌil geligir la, ba mor nid yinni na, one di o sam ligidi yon tusa piiga. 25 Ka on ku nyaŋ n yo laa, o zugsob tis noor ye ba kuosim o ne o poꞌa ne o biis ne o laꞌad wusa n yo o sam la.

26 “Ka o vabin o zugsob tuon n sos o ye, o dim o suguru, ka o na yo sam la wusa. 27 Ka o zugsob la zo o nimbaanlig, ka bas sam la, ka ke ka o keŋ.”

28 “Amaa tumtumkan n yi la, o tuꞌus o tumtum tiraan kane di o sam anzurifa ligidi kobug (li pu paae yolug yinnii,) ka gbanꞌ o n siank o kukor, ka yel o ye, ‘Yoom m sam la n tisi m.’

29 “Ka o tumtum tiraan la vanbin o tuon n sos o ye, ‘Dim suguru, ka m na yo fu sam la.’

30 “Ka o zanꞌas, ka zaŋ o kpenꞌes sarega ni ye, asee o yo o sam la. 31 Ka o tumtum taaba la nye ala la, ka ba sunya saꞌam hale. Ka ba keŋi ba zugsob saꞌan n tuꞌas o line niŋ la wusa.

32 “Ka o zugsob buol o n yel ye, ‘Tumtumbeꞌed daana nwa, sam kan wusa ka fu di la, m kee li bas, fun sosim la zug. 33 Li me pu suꞌum ye fun zo fu tiraan nimbaanlig, wuu man zo fun nimbaanlig siꞌem laa?’ 34 Ka o zugsob la suunr pelig hale. Ka o ke ka ba zaŋ o n kpenꞌes sarega ni ye ba namis o ka yel ye, asee o yo sam la wusa.

35 “Ala men ka m Baꞌ one be arazana ni la na niŋ ne ya, ya yaꞌa pu tisi ya baꞌabiis suguru ne ya sunya wusa.”