1 Ka Yesu yel ye, “Winaꞌam soꞌolim wenne yidaan, one yi bekeeung n keŋ nok tumtumnib ye ba tum o poogin. 2 Ka ba siak ye o yo ba anzurifa laꞌaf daar yinni poogin. Ka o tumi ba o poogin la.

3 “Ka nintaŋ ziankir saŋa, ka o yi ka nye ninsieba ka ba ziꞌe daꞌan, ka pu tumma. 4 Ka o yeli ba ye, ‘Yanam me kemi m poogin la tum. Ka m na yo ya line nar.’ Ka ba due keŋ poogin la. 5 Ka nintaŋ tisoos ne nintaŋ gbeligir ka o yi lem niŋ ala yaꞌas. 6 Ka zaam noor ka o lem nye ninsieba ka ba ziꞌe. Ka o buꞌosi ba ye, ‘Bozugo ka ya ziꞌe beugin sa, ka pu tum siꞌela?’

7 “Ka ba lebis ye, ‘Soꞌ pu noki ti tuuma la zug.’ Ka o yeli ba ye, ‘Yanam me kemi m poogin la tum.’

8 “Ka winlir saŋa paae ka poogdaan yel o tumtumnib kpeenm ye, ‘Buolim tumtumnib la na, ka yo ba. Pinꞌilim yo bane yuolim kena la n ti paae bane deŋ na la.’

9 “Ka bane keŋ zaam noor la wusa diꞌe anzurifa laꞌaf yinni yinni. 10 Ka bane deŋi kena la mor potenda ye ba na diꞌe gaad bane yuolim kena la. Ka ba wusa diꞌe anzurifa laꞌaf yinni yinni wenne bane yuolim kena diꞌe siꞌem la. 11 Ka ban diꞌe la, ka nyon ne yidaan la, 12 ka yet ye, ‘Bane yuolim la tum ne saŋa biꞌela nwa. Amaa fu ke ka ba diꞌe azinzema ne tinam bane tum hale beugin sa n namis ne nintaŋ tuulug.’

13 “Ka o lebisi yel ba nid yinni ye, ‘M zua, m pu tum uf taale. Fu paꞌa pu siak ye fu na diꞌe anzurifa laꞌaf yinnii? 14 Nokimi fu yood n keŋ. Li ane man boodim ye o yo bane yuolim la azinzema ne fun. 15 Li pu nar ye m zaŋi m laꞌad niŋ lin ka m booda? Bee m tuumsoma la ka fu nen naa?

16 “ ‘Dinzugo tuon dim na lieb nyaꞌaŋ dim, ka nyaꞌaŋ dim lieb tuon dim.’ ”

17 Ka Yesu daa waꞌae Jerusalem la, o da buoli o nyaꞌandolib la gullim ka yeli ba ye, 18 “Gosimi ya, ti waꞌane Jerusalem, ka ba na gbanꞌe Ninsaal Biig la n tis Winaꞌam maalmaan kpeenmnam ne gbauŋmiꞌidib, ka ba na kad o saria ka koos o yela ye o suꞌum ne kuꞌum. 19 Ka nok o tis bane kaꞌ Jew dim ka ba na laꞌad o, ka fieb o, ka kpaꞌ o dapuudir zug n kuu o. Ka daba atanꞌ daar, ka o na lem vuꞌug ka bas kuꞌum.”

20 Ka Zebedee poꞌa dol o biis n kenn Yesu tuon na igin ka sos o ye o maal siꞌel tis o. 21 Ka Yesu buꞌos o ye, “Fu bood ye m maal bo tis uf fo?”

Ka poꞌa la lebis ye, “M bood ye fu siak ka fu yaꞌa ti di fu naꞌam la, fun ke ka m biribis ayi nwa, ka ayinni zinꞌini fu datiuŋ ka ayinni la me zinꞌini fu dagobug.” 22 Amaa Yesu lebisi ba ye, “Ya ziꞌ yaname sosid siꞌel yelaa. Ya na nyaŋe nu m nwam kane aa m namisug ka m ye m nu laa?”

Ka ba ye, “Ti na nyaŋ.”

23 Ka o lebis ye, “Ya sid na nu li. Amaa man lee pu mor suere na ke ka soꞌ zinꞌini m datiuŋ bee m dagobuga, asee ban ka m Baꞌ tiꞌebi guri ba la.”

24 Ka nyaꞌandolib bane kpelim piiga la n wum neꞌeŋa la, ka ba sunya pelig ne babayi la. 25 Ka Yesu buoli ba n yel ye, “Ya miꞌ ye bane a naꞌanam dunia nwa ni mugusidi ba nidib hale. 26 Amaa ne yanama, ya ku niŋ alaa. Ka one bood ye o a kpeenm ya saꞌan, li nar ka o liebi ya tumtum. 27 Ka one me bood ye o a tuon sob, on na liebi ya yamug wenne Ninsaal Biig la. 28 O pu kena ye nidib tum tis oo, amaa o kena ye o tum tisi ba ka yiisi o nyovur ka ke ka nidib bedego nye yolisim.”

29 Ka ban daa yit Jeriko la, ka nidib bedego dol Yesu. 30 Ka zunzoos ayi zinꞌi suer kukpeŋ ka wum ka Yesu gaad la, ka ba tansid ye, “David Yaaŋa, zomi ti nimbaanlig.”

31 Ka nidib la kadi ba ye ba kel vuud. Ka ba maligim tans gaad ala ye, “Zugsoba, one a David Yaaŋa, zomi ti nimbaanlig.”

32 Ka Yesu ziꞌen ka buoli ba, ka buꞌosi ba ye, “Ya bood ye m tum bo tisi ya?”

33 Ka ba lebis ye, “Zugsoba, ti bood ye ti nini lak ka ti nyet.”

34 Ka Yesu zo ba nimbaanlig ka siꞌisi ba nini, ka ba nini lak ka ba nyet, ka ba kpelim dol o.