1 Tu gúl-lazqueza' chee̱ xel-la' zri'i lazre' chiu', Xran.

Guzenda' tu cuen tu cuen zri'ine zre súantu' nacu' li lazre'.

2 Nezda' tu súazqueze xel-la zri'i lazre' chiu',

ne chadía chacanna zua xel-la li lazre' chiu',

3 Lue' gunnáu': “Be̱na' xel-la wezría nen bénnea' ba gucá'a.

Guche̱be lazra' chee̱ David, we̱n zrin chia',

4 gunnia': Guna' tu cházqueze zri'ine zre su'.

Guna' xelenná be'e̱ tu chí'izqueze lu waláz chiu'.”

5 Benne' zaj zra' xabáa dxelúe lá'ane̱' Lue',

ne̱ chee̱ da zrente̱ ca' da dxunu', Xran,

ne ne̱ chee̱ xel-la' li lazre' chiu', naga zaj nazrague̱'.

6 Quebe nu zua xabáa, benne' naque̱' ca Lue', Xran.

Quebe nu zua benne' szrente̱, benne' naque̱' ca Lue'.

7 Benne' zaj zra' xabáa dxelape̱' Dios ba lá'ana,

na' xúgute̱ benne' ca' zaj nazraga chee̱' dxelezrebe̱' Le̱'.

8 Xran, nacu' Dios chee̱ benne' zante̱, benne' zaj zra' xabáa.

Quebe nu zua, benne' naque̱' ca Lue', Xran.

Nacu' Benne' wál-late̱, ne tu nácazquezu' li lazre'.

9 Xu'u lu na'u xeajxruza zren chee̱ nísadau'.

Gate dxelasa xeajxruza ca' Lue' dxebeque zriu' na.

10 Bchúchuju' benne' Egipto ca', na' belexegá'ane̱'

Be̱se dínnaju' benne' ca' dxeledábague̱' lue' nen na'u wál-late̱.

11 Chiu' Lue' naca xabáa, ne chiu' Lué'queze naca xe̱zr la xu.

Be̱nu' xe̱zr la xu nigá, ne da ca' zaj nnita lawe na.

12 Be̱nu' da de̱ chalá'a naga za' be' zaga,

ne da de̱ chalá'a naga dxedé gubizra beu' zaga ca'.

Xel-la dxelebé dxelul-la chiu' xi'a Tabor, ne xi'a Hermón.

13 Benne' wál-late̱ nacu' Lue'.

Da zrente̱ naca xel-la waca chiu', ne nagá'ana szren na.

14 Lu da xrlátaje, ne lu da li lazre' dxenná be'u.

Lu xel-la zri'i lazre', ne lu da li lazre' zaj zua ca da dxunu'.

15 Ba neza zrente̱ naca na chee̱ benne' ca' dxelul-le̱'

ne zaj zue̱' lu xel-la naxaní' chiu', Xran.

16 Ne̱ chiu' Lue' dxelebéle̱'e̱ne̱' du zra,

ne dxulucá'ana szrene̱' Lue' ca naca da xrlátaje chiu'.

17 Lué'queze nacu' xel-la wal-la chee̱ benne' ca',

Dxúnnadxu' netu' xel-la' waca lawe' da ca' dxéquenu' xrlátaje.

18 Xránadxu Dios dxucu'uje̱' dxi'u,

na' Dios lá'azxa chee̱ benne' Israel ca' naque̱'

19 Nédxudaute̱ bchálaju' lu da blé'enu' benne'

Ba gucá'a tu benne' wal-la ládujla bénneache chia',

ne ba bzua' le̱' gaque̱' wenná bea, ne dxácale̱na' le̱'.

20 Ba gucá'a David, we̱n zrin chia'.

Bzúaqueza' le̱' gaque̱' wenná bea.

21 Neda' tu gácale̱zqueza' le̱'.

Xel-la waca chia' gutípaqueza' lazre̱'.

22 Benne' ca' guledábague̱' Le̱' quebe xelezéquene̱'

na' benne' ca' dxelune̱' da cale̱la quebe xelezéquene̱'

23 Guchúchujqueza' benne' dxeledábague̱' Le̱', ne gucuasa'

Guna' we̱' benne' ca' dxelecuídene̱' le̱'.

24 Tu zrí'izqueza' le̱', ne gaca' li lazre' nen le̱',

na' ne̱ chia' neda' gápadxe̱' xel-la' wal-la.

25 Guna' nna be'e̱ dute̱ dxu'a nísadau' zren,

ne dute̱ dxu'a xe̱gu Eufrates.

26 Le̱' xe̱'e̱ neda': “Lue' nacu' Xra'.

Nacu' Dios chia', dxucu'uju' neda', ne dxuseláu' neda'.”

27 Neda' guzúa' le̱' ca zri'ina' blau,

na' nna bé'ene̱' xúgute̱ benne' wenná bea zaj zre̱'e̱

28 Tu chí'izqueze nuzúa' chee̱' xel-la' zri'i lazre' chia',

na' ca naca xel-la' wezría chia' gaca líqueze na nen le̱'.

29 Guna' tu cházqueze zri'ine zre sue̱',

na' xelenná be'e̱ lu waláz chee̱' dxácate̱ ne zua xabáa.

30 Che xulusán zri'ine zre sua David da nadxixruj be'a,

ne che quebe xelune̱' ca da nuchi'a chee̱',

31 ne che xelecuase̱' lu da dxenná be'a,

ne che quebe xelune̱' ca da dxapa' le̱',

32 na' gu'a le̱' zrise lawe' da dxeledábague̱' neda',

ne quina' le̱' xide lawe' da dxelune̱' da cale̱la.

33 Quebe gusana' ca nazrí'ida' David,

ne quebe gusana' gaca' li lazre' nen le̱',

34 ne quebe gal-la lazra' xel-la' wezría da nuna',

ne quebe guchá'a ca da ba gunnía'.

35 Tu lásaze bzetaj cuina' guche̱be lazra',

na' cabata' gun lazra' chee̱ David,

36 gunnia': Tu cházqueze zri'ine zre sue̱',

na' xelenná be'e̱ lu waláz chee̱' lawa' neda'

37 Xel-la' dxenná bea chee̱' tu sua chúchuzqueze na

Tu sua chúchuzqueze na dxácate̱ ne zua xabáa.

38 Lue', Dios, guleaj xíchaju', ne bzu' chalá'ala bénnea' guca'u,

39 Nuzú' chalá'ala xel-la' wezría bé̱nle̱nu' David,

ne nucá'ana dítaju' xel-la' dxenná bea chee̱'.

40 Nuxrínnaju' ze'e da naxechaj na xe̱zre zréntau' chee̱',

ne nuzría xi'u ca naca lataj wal-la chee̱' chee̱ wedil-la.

41 Xúgute̱ bénneache, benne' dxeledaze ga na' dxelebane̱'

na' benne' xe̱zre walízr chee̱' dxelún le̱' chee̱'.

42 Ba be̱nu' bedxúaj chawe' benne' guledábague̱' Le̱',

43 Be̱n dítaju' da ca' dxuchínene̱' lu wedil-la,

ne quebe gúcale̱nu' le̱' lu wedil-la na'.

44 Ba gudú' ca naca da xrtante̱ chee̱',

ne nucá'ana dítaju' xel-la' dxenná bea chee̱'.

45 Be̱nu' naque̱' ca tu benne' gula gate ne zue̱' iza cuide' chee̱',

46 Xrana' Dios, ¿bátaqueze quebe xennu' chee̱ntu'?

¿Tu chí'izqueze dxezrá'aquezu' netu'?

47 Bsa lazre' látega sua' lu xe̱zr la xu.

Látega nunu' xel-la' nabán chee̱ xúgute̱ bénneache.

48 Quebe zua nu benne' gaca bane̱' tu chí'izqueze.

Xúgute̱' xelatie̱'.

Quebe zua nu benne' le̱' lu na' xel-la' gute.

49 Xran, ¿ba bsanu' David, ne québedxa nazrí'inu' le̱',

ca bzetaj cuinu' guche̱be lazru' zrí'iquezenu' le̱'?

50 Gunná' xque, Xran, ca dxelún le̱' chia' neda',

ne ca dxuchaga lawa' da dxelún lala benne' xúgute̱ xe̱zr la xu

51 Benne' ca' dxeledábague̱' lue' dxulucá'ana dítaje̱'

Dxulucá'ana dítaje̱' le̱' gátete̱ze zéaje̱'.

52 Ba neza zrente̱ gaca Xránadxu Dios chadía chacanna.

Ca' naca na, ne ca' gaca na.