1 Xran, nacu' Dios dxuseláu' neda'.

Te zra, ne chizrela dxuláwizra' Lue'.

2 Bene da dxuchálajle̱na' Lue',

ne bze̱ naga da dxuláwizra' Lue'.

3 Dxedú lazra' lu da cale̱la ca' da dxaca na chia',

4 Dxeleque bénneache neda' ca tu benne' gate,

lawe' da dxátele̱'e̱ ni'a na'a.

5 Nagá'ana' cá'aze ládujla benne' gate.

Naca' ca benne' gulátie̱' lu wedil-la, ne zaj de̱' xe̱dxu ba ca',

benne' ca' québedxa dxajsá lazru', Dios,

ne québedxa zaj xu'e̱ lu na'u Lue'.

6 Dxaca chia' cáte̱ze ba nuzú' neda' tu xe̱dxu zren

naga naca chul-la, ne nácale̱'e̱ situj.

7 Dxéqueda' dxezrá'le̱'u neda'.

Da dxaca chia' naca na ca dxazia' zran xeajxruza zri'a

8 Be̱nu' belexebiga bi ljwezra' ca' naga zua'.

Be̱nu' neda' ca tu da dxusegute na benne' ca'.

Naca' ca tu benne' xu'e̱ lizre xia ne quebe gaca xedxúaje̱'.

9 Dxelechul-la xiaj lawa' ne̱ chee̱ da dxezí dxezaca'.

Xúgute̱ zra dxuláwizra' Lue', Xrana' Dios.

Dxechisa na'a lau Lue'.

10 ¿Dxúnquezu' xel-la' waca chee̱ xabáa dxácale̱nu'

¿Dxelexasa benne' gate ca' dxelúe lá'ane̱' Lue'?

11 ¿Dxuluchalaj benne' zaj nagache̱' lu xe̱dxu ba chee̱

na' dxuluchalaj chee̱ da li lazre' chiu' benne' zaj xu'e̱

12 ¿Welexúnbea benne' zaj xu'e̱ lataj chul-la na' ca

na' welexúnbea benne' zaj xu'e̱ naga quebe nu dxajsá lazre' le̱'

13 Neda' dxuláwizra' Lue', Xrana' Dios.

Xúgute̱ zila dxezrín lau' da dxenaba' Lue'.

14 ¿Bizr chee̱ na' dxebéaj xíchaju' neda', Xran?

¿Bizr chee̱ na' quebe dxenná'u neda' chee̱ gácale̱nu' neda'?

15 Dxezí dxezaca', ne ba zua' gatia'.

Nácatea' bi cuíde'te̱ dxedéa' xel-la' zi' da dxudeu' neda',

16 Dxéqueda' dxezrá'le̱'u neda'.

Da dxuchebu' neda' ba bsedú na lazra'.

17 Zaj naxechaj da caní neda' du zra.

Dxulusaca zi na neda' gátete̱ze na'.

18 Be̱nu' belexebiga bi ljwezra' ca' naga zua',

na' tuze da naca chul-la dxedále̱ na neda'.