1 Giyomon giyoo, a Yuwana Almamadan ila ngwondaci ngwüjü ngwujaꞌri ngwudi Ngwaalu poor gïtäny ngwaalu ngwani Yäwüdïyä. 2 Ngwuje ci, “Joꞌrenyanar, ndi ari yeleny yidi gerala yima ja gito.” 3 Yuwana gwuru nggwee gwanni gwaru gwe dïjïr dani Ajaya ndi ari,

4 Yuwana gwugenna ngwurna ngwuru yotang yidi ngwamla ngwürüjïnï lägü le liru dirna gidirinyanu. Ngweny ngwama ngweny ngwaay ngwudi ngwüdäny. 5 A ngwüjï ꞌtüdä kündär gani Üräjälïm, Yäwüdïyä ꞌdar na ngwaalu ꞌdar ngwudi Ordoning aar ilada ꞌdünggüngün. 6 Aar joꞌrenyana aar ꞌtäjï yiꞌralalu yegen yanni yiki ngwuje nyïnyï yaw ye gidibirta didi yaw yidi Ordoning.

7 A be anni mung enggada Ngwübärrïjï* 3.7 Ngwübärrïjï ngwuru giꞌdu ngwüjänü ngwudi Ngwüyäwüd ngwanni ngwati arngani yobo ye yidi Müjä aar ämnï Ngwaalu ndi ari ngwüjï ngwanni ngwayu ngwa ꞌdïꞌrï ngwa midi mana, aar ämnï Ngwaalu ꞌto gwani yïꞌrr na ngwügïꞌrïm. na Ngwüjändügï† 3.7 Ngwüjändügï ngwuru giꞌdu ngwüjänü ngwudi Ngwüyäwüd ngwanni ngwati ämnï Ngwaalu ꞌdogo gwani yobo yidi Müjä aar ꞌti be ämnä Ngwaalu gwani ngwügïꞌrïm, yïꞌrr na gwani ngwüjï ngwanni ngwayu ngwa ji ngwa ꞌdïꞌrä mana ngwa midi. ngwonyadu aar ilada ngwaalu ngwujung gu ndi nyïnyï ngwüjü, ngwuje ci, “Ngaa gilee liru yïjï yidi ngwüüngä, yärü gwuma je arngada ndi abra gündä ganni nggo gïndï? 8 Ärrär be yiꞌral yanni yijaw yadi inggidi ndi ari ngaa lima joꞌrenyana. 9 Aaꞌti ngaa la ji ndi ïräjï ngwäyälü aang ari, ‘Nyii liru yïjï yidi Äbräyïm.’ Nggwa je ci, Ngwaalu ngwätï yiima ndi uti yoꞌrralu giyee ngwuje ruji yïjï yidi Äbräyïm. 10 Gwenene guꞌri nggo gïmïꞌränä ngwuuwa ngwudi ngwaꞌri, daꞌri dere danni daꞌti da ꞌriꞌri yuula yijaw, da aar üꞌrïdälü da aar gatu gïlïgä.”

11 Ngwuje ci, “Äny gwa je nyïnyï yaw ye yani joꞌrenyani. A be gwanni nggwo ndi ila gwodan gwanni gwätänä yiima ꞌdünggüny, äny gwaꞌti ädï ngwäyänü ngwüngün ndi äpïjï ngwüdänälü ngwüngün. Nginde gwa je nyïnyï Lïgïꞌrïm le lanni Lijuꞌru na lïgä. 12 Nginde gwapu ngwümülgügünä kuy güngün ngwadi ngwe ürnäjï yona, ngwubruti doꞌralu ngwübäläjï yona kïlänü ngwube uꞌdiyi ngwoga lïgä le lanni lati ꞌti ayu.”

13 A Yicu ꞌdïꞌrä ngwaalu ngwanni Jälïl ngwila Ordon ngwilada ndi nyïnyïnï ndi Yuwana. 14 A be Yuwana ꞌdonya ngwuci, “Äny gwunana ndi nyïnyïnï ꞌdunggunga, nga be ari ang nyïnyï awa?”

15 A Yicu ci, “Gäbïcä je aar gu ru gwenene, no ya gu jayi ndi ari nda medaji yiꞌral ꞌdar yanni yïdünälü.” Yäy gu no, a be Yuwana ämnäcï.

16 Anni ma Yicu nyïnyïnä ngwüꞌtüdä giyaanu no, a gere ïgïtänï ngwengga Lïgïꞌrïmä lidi Ngwaalu lüllü kerala liru nono amaam ngwaw ꞌdünggüngünälä 17 a dulu üllä kerala ngwara, “Gïjï güny giru nggee, ganni gämnïny äny gwujayanu nginde gwe gwulleny.”