2
Ila gwudi ngwoorta ngwudi yuurrum
1 Anni ma Yicu lïngïnï kündär gani Bidilam ngwaalu ngwani Yäwüdïyä, gaji ganni gïmätï ge deleny dani Yïrüdïj yelenya a ngwoorta ngwudi yuurrum anda gïtäny gwe aar ilada kündär gani Üräjälïm. 2 Aar otaci ngwüjälü ndi ari, “Gwanni gwuru Deleny didi Ngwüyäwüd nggwo gwülïngïnä ne gwe? Nyii länggädï guurrumu güngün gïtäny, nyii be ilada ndi kwucalu yirku ye.”
3 Anni ma gu deleny dani Yïrüdïj ꞌdingini no, a yïn aw na ngwüjï ꞌdar kündär gani Üräjälïm. 4 Ngwurnida ngwurꞌdala ꞌdar ngwanni ngwuru ngweleny ngwudi ngwüjï na ngwoorta ngwudi yobo gwüpäng ngwuje otacalu, “Gwanni Gwubrutaar yelenya gwadi lïngïnï ne gwe?”
5 Aar ci, “Gwadi lïngïnï kündär gani Bidilam ngwaalu ngwani Yäwüdïyä, ndi ari ngwujaꞌri ngwudi Ngwaalu ngwanni ngwondaja je dïjïr ngwaru nu,
6 ‘A be nga gwani gündär gidi Bidilaming gïdïyäng didi Yäwüdä,
a gwuru guꞌru gooko ngwelenyanu ngwudi Yäwüdä
ndi ari deleny deꞌte dadi ꞌtüdä ꞌdunggunga
ngwuru dooꞌra ngwombaji ngwüjü ngwüny ngwudi Yïjïräyïl.’ 2.6 Mika 5.2”
7 A be Yïrüdïj urnidi ngworta ngwudi yurrum nyïm ngwuje otacalu gaji ge ganni giju ge gurrum ganni gïꞌtädälü. 8 Ngwuje dinga aar ele kündär gani Bidilam ngwuje cani, “Ïndär ngaa utalu mama gïjï ge manari gima aang mbuja ngaa be oꞌra nyii ondaci nyi ele ꞌto nyi kwucalu yirku ye.”
9 Anni ma aar ꞌdingini gideleny, aar ꞌdïꞌrï aar ele. A guurrum gele gänggädäär gïtäny, ngwuje mädïnïjï ꞌdi ngwele ngwüdünä ngwaalu ngwanni ngwuju gu gïjï. 10 Anni ma aar enggada gurrumu, aar jayanu gwulleny.
11 Aar ele ngwuꞌdun aar engga gïjü nanni gwe gwüngün gwani Märïyäm. Aar jürbäjälü aar kwucalu yirku ye aar ïgïtädä ngwürädälü ngwudi yuꞌrin yegen aar angidaci dab na yilun na ngwuuwa. 12 A je be dilingid eny ngwuje girinya ndi ari aaꞌti la oꞌraci delenya dani Yïrüdïj, aar be ꞌdïꞌrï ele gay ge giꞌter aar oꞌre ken gegen.
Aar abra gïjï ge Mijir
13 Anni ma aar ele, a dilingid eny Yüjïbïng a gïꞌrr gidi Ngwaalu ꞌtäcälü ngwuci, “ꞌDïꞌrü nga ape nanning je gïjï ge aang abri aang ele ken gani Mijir ngaa gu ji ꞌdi ang ondaca. Ndi ari deleny dani Yïrüdïj dadi mïnï gïjälü ngwuꞌrinye.”
14 No ngwüꞌdïꞌrï ngwape gïjü na nanni gwüngün dilu de aar ꞌdïꞌrï aar ele Mijir. 15 Nggu jalu ngenone ꞌdi a Yïrüdïj ayi. Yiru gu no ndi ari a ngwujaꞌri ätï ngwäyänü ngwudi Ngwaalu ngwanni ngwondaja je dïjïr danni daru, “Äny gwurnida gïjü güny ken gani Mijir.” 2.15 Ujiya 11.1
16 Anni ma Yïrüdïj lenge ndi ari gwuma ngwoorta ngwudi yurrum nyortacanu, a güündä ape ngwukanu gwulleny ngwüꞌtüyä ngwujaꞌri ndi ari aar ꞌrinye yïjälü ꞌdar yanni yiru ngwur kündär gani Bidilam na yündär yanni yijacidaar ye. Yïjï yanni yätï ngwüdläyü rom aar oꞌrada gwodan anaku ꞌdingining gu ngwoorta ngwudi yurrum. 17 No a ngwujaꞌri ngwudi Ngwaalu ngwanni ngwaru ngwe Ärmïyä gwuru dïjïr aar ätï ngwäyänü ndi ari,
18 “Dulu daru kündär gani Rama,
yal na runi gwupa,
daw dani Rayila därädï yïjü yüngün
ngwuꞌdonya ndi aar orꞌtemaji
ndi ari yïjï yima ele.” 2.18 Ärmïyä 31.15
Aar oꞌra kündär gani Najra
19 Anni ma Yïrüdïj ayi, a dilingid ita Yüjïbïng ken gani Mijir a gïꞌrr gidi Ngwaalu ꞌtäcälü 20 ngwuci, “ꞌDïꞌrü nga ape gïjü nanni gwe gwüngün ngaa oꞌre ken gidi Yïjïräyïl, lele lïmïnä ndi ꞌrinye gïjü lima ayi.”
21 No a Yüjïb ꞌdïꞌrï ngwape gïjü nanni gwe gwüngün ngwoꞌre gïdïyäng didi Yïjïräyïl. 22 A be anni mung gu ꞌdingini ndi ari Arkalawuj gwuma ape yelenya yidi papa gwüngün gwani Yïrüdïj ngwaalu ngwani Yäwüdïyä, a yedeny eny ndi ele ngenone. A dilingid eny ngwugirinya ngwüꞌdïꞌrï ngwele ngwaalu ngwani Jälïl. 23 Ngwuji kündär gani Najra. Ndi ari a ngwujaꞌri ngwudi Ngwaalu ätï ngwäyänü anaku aru gu ngwïjïr ndi ari, “Gwa aar ätädä ngwürïny ngwani Dinajir.”