1 Nyaw pinakabinglay a naitoroh do trībo no Mamanlāod a Manasses, ta si Manasses iyaw matoneng a pōtot ni Jose.* 17:1Gen. 48:19-29 Si Makir a matoneng a pōtot ni Manasses, ki kapoonan dan Gileadita. Maynamot ta masiglat do gobat siraw kapotōtan na, rinawat daranaw tana no Gilead kan Basan do dayāen no Jordan. 2 Dawa, iyaw tana do laōden no Oksong Jordan, ki naitoroh dyirad kadwanaw a tawotawo no Manasses sigon do partīdos da a sa Abiyeser, Helek, Asriyel, Sikem, Heper, kan Semida. Siraw nya saya, ki mahahakay a kapotōtan ni Manasses a pōtot ni Jose.

3 Si Selopehad a pōtot ni Heper a pōtot ni Gilead a pōtot ni Makir a pōtot ni Manasses, ki abaw pōtot na a mahakay, an dya mababakes lang. No ngarangaran da, ki Mahlah, Noah, Hoglah, Milkah, kan Tirsa. 4 Nangay sa di Eleasar a pādi kan di Joswe a pōtot ni Non, as kan dyirad pangpangōlo saw a binata da a kon da, “Inbilin ni ĀPO di Moyses a itoroh dyamen kontodo siraw mahakay a kaliposan namen tanaw a pinakabinglay namen.” Dawa, intoroh ni Joswe dyira kontodo mahahakay saw a kaliposan da iyaw tanaw a pinakabinglay da sigon do bilin ni ĀPO. 5 Ta dawa, rinawat no trībo no Manasses asa poho a loti no tana kontodo no tana a Gilead kan Basan do dayāen no Oksong Jordan, 6 ta siraw kapotōtan a mababakes no trībo no Manasses, rinawat daw tana a pinakabinglay da akmas siras kapotōtan daw a mahahakay. Iyaw tana a Gilead, ki naitoroh a pinakabinglay dan kadwan saw a kapotōtan no trībo no Manasses.

7 Iyaw tana no trībo no Manasses, ki yapo do Aser a manda do Mikmetat do dayāen no Sikem. Do dāwri, magpaabagātan payis na a pakairāmanan dan tawotawo saw a omyan do En-tappoah. 8 Iyaw tana a omdibon Tappoah, ki dyira no trībo no Manasses. Ki iyaw idyaw a Tappoah a myan do payis naw, ki dyira dan kapotōtan ni Epraim. 9 Somarono, mosok iyaw payis naw a manda do dēkey a oksong Kana. Siraw idiidyaw do dya do mangket do abagātan no nyaw dēkey a oksong, dyira ni Epraim a aran myan sa do tana no Manasses. Iyaw payis no Manasses, ki tongtongen na do ammyānan no dēkey a oksongaw. As no pandan na, ki do Mediterranean a Tāw. 10 Iyaw tana do abagātan, ki dyira dan Epraim, kan do ammyānan, ki dyira dan Manasses. As kan iyaw Mediterranean a Tāw, ki iyaw payis na do lāod. Do ammyanānen a laōden, ki payis no tana Aser, kan do ammyanānen a dayāen, payis no tana no Issakar. 11 Do irahem no tana da no Issakar kan Aser, myan saw idiidi a pinakadyira no Manasses a Bet-san kan Ibleam kontodo siraw sīcho da saw, kan siraw omyanaw do Dor mana Napot-dor, Endor, Taanak, Megiddo, kan siraw sīcho da saw. 12 Ki aran komwan, siraw kapotōtanaw ni Manasses, ki masākop da sabaw nya saya idiidi, ta ipapāti dan Kananeo saw a omyan daw. 13 Ki do nakapaypayit daranaw Israelita saw, inadīpen da saw Kananeowaw, ki alit a dyi da sa mapayyayo a tabo.

14 Inbahey dan kapotōtanaw ni Jose di Joswe a kon da, “Āngo ta intoroh mo dyamen asa lang a tana a pinakabinglay namen? Namna, mahap na paro yamen do taywaraya a kāro no tawotawo namen do nakabindisyonaya ni ĀPO dyamen?”† 17:14 Naboya do Nomiro 26 a arwaro sa kan kadwan a trībo.

15 Initbay ni Joswe a kāna, “Aysa, an tayawara kamo, as kan an dya manawob katokotokonanaya no Epraim dyinyo, ayket na, may kamo na do kakahasanaw kan magdalos kamo so bōkod nyo a tana do tana dan Pereseo kan Repaim.”

16 Inatbay dan tawotawowaw ni Jose a kon da, “Naon, iyaw tanaya a katokotokonan, ki manawob aba dyamen. Ki sira tabo Kananeo saw a omyan do tanatanap do Bet-sean, do sīcho na saw, as kan siraw omyan do Payahosongan Jesreel, ki ari dyiraw pasek saw a logan a pachigobat.”

17 Ki binata ni Joswe dyirad trībwaw no Epraim kan Mamanlāod a Manasses a kāna, “On, āro kamo sawen, kan taywara mabīleg kamo. Asaba lang a tana iyaw pinakabinglay nyo, 18 ki dyira nyo panchiw kakahasan a katokotokonan. Dalosan nyo, as dyira nyo nanchi a manda do katetenganaw a payis na. Aran myan dyirad Kananeo pasek saw a logan kan mabibīleg sa a tawotawo, maparin a paksyaten nyo sa.”