1 Do nakasākop daranaw no Israelita so tanaw, naychipeh sa tabo do Silo,* 18:1Silo, ki 32 kilomitro do ammyānan no Jerosalem. Ok. 18:31; 1 Sam 1:3 as napatnek sa so Tolda a Pachibayabayatan. 2 Ki do dāwri, myan paw papito a trībo dan Israelita a dyi pa nakarawat so pinakabinglay da a tana. 3 Dawa, binata ni Joswe dyirad tawotawowaw no Israel a kāna, “Namna, maypāngo paw kahay no kapangnanaya nyo sakbay a sakōpen nyo tanaw a intoroh dana dyinyo ni ĀPO a Dyos dan kapoonan nyo? 4 Mamidi kamo so taytotdo a mahahakay yapo do kāda papito a trībo. Toboyen ko sa a mangbisīta so intīrowaya tana kan itolas da a ilawlawag maboya daw sigon do hahawen daw do pinakabinglay daw a tana. Anchan tayoka, maybidi sa dyaken. 5 Siranchiw mapaychapito a mapaychakarwa so tanaw. Iyaw trībo no Joda, ki nāw narana do tana na do abagātan. Komwan saw kapotōtan ni Jose, nāw darana do tana da do ammyānan. 6 On, anchan nailawlawag nyo naw papitwaya kabinglay a tana, yangay nyo na dyaken. Do dāwrinchi, bonōten ko do salapen ni ĀPO a Dyos ta iyaw binglay no kāda asa a para dyinyo. 7 Siraw Lebitaya, ki abaw binglay da a tana dyinyo. Ta iyaw kapādi daya a magsīrbi di ĀPO, pinakabinglay da.”

8 Do kasiknan daw no napidi saw a mahahakay a mangay, inmandar ni Joswe dyira a kāna, “Bisitāen nyo tanaw, itolas nyo a ilawlawag maboya nyowaw, as kapaybidi nyo dyaken. Do dyanchi a Silo, pangbōnotan ko do salapen ni ĀPO so pinakabinglay nyo.” 9 Dawa, nangay da binisīta no mahahakay saw iyaw intīro a tana. Intolas da do nahon a libro pakailawlawagan no idiidi saw do papito a kapartis. Nakatayoka da, naybidi sa di Joswe do kampo do Silo. 10 Inbōnot ni Joswe sa do Silo do salapen ni ĀPO, kan inbinglay na dyirad papito a trībo a Israelita tanaw sigon do nabōnot naw a binglay para do kāda asa.

11 Iyaw dāmo a loti a nabōnot, ki dyira no trībo no Benhamin sigon do kāda partīdos na. Iyaw tana a pinakabinglay da, ki do payawan no tana da no trībo Joda kan Jose. 12 No ammyānan a payis na, ki nangrogi do Oksong Jordan. Do dāwri, nagpaammyānan do barikir no Jeriko, kan nagpalāod do katokotokonan a manda do let-ang no Bet-aben. 13 Yapo do dawri, nagpaabagātan no payis a nangay do barikir no Loz mana Betel, as minosok a nangay do Atarot-addar do tokon a myan do abagātan no Manayahbo a Bet-horon. 14 Do dāwri, somniwal a nagpaabagātan, as omnonor do laōden a barikir no tokon a somalap Bet-horon. As no pachipandan na, ki do idi a Kiryat-baal mana Kiryat-jearim a dyira dan trībo no Joda. Iyaw nya, ki payis na do lāod.

15 Iyaw abagatānen a payis na, ki nangrogi do payis no Kiryat-jearim a mangay do Epron do ranom do akbod no Neptwa. 16 Minosok do tokaran no tokon a maylalawong do Payahosongan Ben-hinnom do ammyānan no Payahosongan Repaim. Do dāwri, minosok do Payahosongan Ben-hinnom a omnonor do abagatānenaw a barikir a yanan dan Jeboseo, as katongtong na a lomongo do En-rogel. 17 Do dāwri, naypachicho a nagpaammyānan a mangay do En-semes, as katongtong na do Gelilot a somnalap do Ayayaman a Adommim, kan minosok do Bato ni Bōhan a pōtot ni Ruben. 18 Tinongtong na a habasan ammyanānen a barikir no Bet-araba,† 18:18Mana “maylalawong do Payahosongan Jordan”. kan minosok do Araba. 19 Tinongtong no payis naw do ammyanānen no barikir no Bet-hogla. As no pachipandan na, ki do ammyanānen a lwek no Nadiman a Tāw a wangawangan no Oksong Jordan. Iyaw nya, ki payis na do abagātan. 20 As no Oksong Jordan, ki nayparin a dayāen a payis na. Siraw nyaw rindīros no tana a pinakabinglay no trībo no Benhamin pati kāda partīdos.

21 Siraw nya idiidi, ki dyira no trībo no Benhamin pati kāda partīdos da a sa Jeriko, Bet-hogla, Emek-kesis, 22 Bet-araba, Semaraim, Betel, 23 Abbim, Parah, Oprah, 24 Kepar-ammoni, Opni, kan Geba. Asa poho kan dadwaw bidang no idiidi kontodo siraw sīcho da saw. 25 Myan pa saw Gibeon, Rama, Beerot, 26 Mispa, Kepirah, Mosah, 27 Rekem, Irpeel, Taralah, 28 Sela, Haelep, Jebos mana Jerosalem, Gibea, kan Kiryat-jearim. Asa poho kan apat no bidang no idiidi kontodo siraw sīcho da saw. Nyaw pinakabinglay a tana no trībo no Benhamin pati kāda partīdos.