1 Iyaw abagātan a payis no tana a pinakabinglay dan kapotōtan Jose a sa Epraim kan Mamanlāod a Manasses, nangrogi do Oksong Jordan a masngen do Jeriko a dayāen no akbod saw no Jeriko, kan magkelsat do let-ang, as somonget do katokotokonan a mangay do Betel. 2 Yapo do Betel, mangay do Los,* 16:2 Do kadwan saw a manyoskripto, batahen a mayengay Betel kan Los. kan romapit do Atarot a yanan dan Arkita. 3 Sinpangan na, minosok a nagpalāod do yanan dan Japletita a manda do yanan Manayahbo a Bet-horon a manda do Geser. As no pandan na, ki Mediterranean a Tāw.

4 Siraw kapotōtan Jose a trībo no Epraim kan iyaw Mamanlāod a Manasses, ki rinawat daw nya tana a pinakabinglay da.

5 Nyaw tana a pinakabinglay no trībo no Epraim sigon do kāda partīdos da. Iyaw payis da do dāya, ki yapo do Atarot-addar a manda do Mamanyito a Bet-horon, 6 kan tongtongen na a manda do Mediterranean a Tāw. Do ammyānan, ki Mikmetat.† 16:6Mikmetat, ki dayāen no Sittim. Jos. 17:7 Sinpangan na, no payis na do dāya, naypachicho a komwan do Taanat-silo kan tongtongen naw a mosok do Janoa. 7 Yapo do Janoa, minosok do Atarot kan Naarah a romapit do Jeriko. No pachipandan na, ki do Oksong Jordan. 8 As yapo do Tappoah, iyaw payis na, nagpalāod do dēkey a oksong a Kana. As no pandan na, ki do Mediterranean a Tāw. Nyaw pinakabinglay a tana no trībo no Epraim sigon do kāda partīdos. 9 Nairāman pa saw tabo idiidi kan siraw sīcho da saw a napatarek a para dyirad tawotawo no Epraim a myan do irahem no tana no trībo no Manasses. 10 Ki aran komwan, pinayyayo daba siraw Kananeo a minyan do Geser. Dawa, omyan pa saw Kananeo a adīpen dyirad Epraim a mandas changori.