1 Sinpangan na, binata ni ĀPO di Moyses a kāna, “Mangay ka di Paraon, ta pinatwa ko pōso na kan pōso dan opisyalis na saw. On, pinatwa ko tan maparin ko saw nya pangilasīnan a makaskasdāaw dyira. 2 Pinarin ko pa tan maibahey monchi dyirad pōtot mo sa kan ap-apoko mo an maypāngo kataywara no nakadōsa ko* 10:2 Do kadwan a naiyōlog, ki “maypāngo nakapayparin ko sira a abos arang”. siras taga Egipto kan maypāngo a pinarin ko saw pangilasīnanaw dyira, as kan tan mapatakan nyonchi a yaken si ĀPO.”

3 Dawa, nangay sa Moyses kan Aaron di Paraon, kan binata da dya a kon da, “Nyaw bata ni ĀPO a Dyos dan Hebreo, ‘Maypāngo pas kahay kaskeh mo a magpakombaba do salapen ko? Palobōsan mo na sa komaro tawotawo kwaya tan maidāyaw da yaken. 4 An dyi mo sa palobōsan a komaro, manoboy akonchi so pinangen saw a rarakoh a kabaga an delak do nasyon mwaya. 5 Domahepdep sanchi a manghapot so hapotayan tana a mandan apabanchiw kaboyan sya. Kanen danchi a tabo natokosaw a dya narārayaw no naitopakaw a yilo kontodo natokosaw a sibibyay a kayokayo. 6 Mapekpek sanchi do irahem no bahabahay mo kan tabo saw opisyalis mo saya kan do irahem no bahabahay dan tabo taga Egipto. On, makayapo dyirad inyaynyapwan mo mana kapoonan mo saw a mandas changori, ari da pad naboyaw akmas nya.’ ” Do dāwri, nayam si Moyses, kan kinarwan na si Paraon.

7 Ki binata dan opisyalis naw di Paraon a kon da, “Anchan āngo kapachipandan nyaya tawo a mangasdosdok dyaten? Nonolay mo na sa komaro tawotawowaya tan maidāyaw daranas ĀPO a Dyos da. Ari mo paya a dya mapoōtan a marārayaw danaw tana taya Egipto?”

8 Dawa, pinaybidi da sa Moyses kan Aaron di Paraon, kan binata na dyira a kāna, “May kamo na a magdaydāyaw di ĀPO a Dyos nyo. Ki sino saw mangay?”

9 Ki tominbay si Moyses a kāna, “Namna, mayirayay kami ah, adedekey kan mangalkem, anak namen saw a mahahakay kan mababakes kontodo binyay namen saw a karniro, kalding, kan bāka, ta yangay namen a silibraren pista a pangidaydāyaw di ĀPO.”

10 Binata na dyira ni Paraon a kāna, “Pī! Ara pan si ĀPO myan dyinyo, taywaran ipalōbos ko a machangay saw mababakes saw kan siraw anak nyo saya. Malawag a maboya ko a ariw marahet a panggep nyo. 11 Engga! Sira lang mahahakayaw mangay a magdaydāyaw di ĀPO. Ara, ta nawriw inakdakdaw nyowaya.” Nakaibahey naw so nya, napaksyat sa Moyses kan Aaron do salapenaw ni āri.

12 Sinpangan na, binata ni ĀPO di Moyses a kāna, “Ilāyat mo tanoro mwaya a palongohen do tana a Egipto tan dahepdepen rarakoh a kabagaw intīrwaw a tana kan tan patawsen da tabo aran āngo a tomnobo kan tabo panpandaw no naitopakaw a yilo.”

13 Dawa, inlāyat ni Moyses sarokod naw a pinalongo do tana a Egipto, kan pinaysasalawsaw ni ĀPO so pangaditan a indalapos do tanaw a naychasaryan kan naychararakan. Do kamabekasanaw, nachirayay pinangen saw a rarakoh a kabaga do salawsawaw. 14 Nawaraw pinangen saw a kabaga do tābo a tana a Egipto, kan binongōlan daw kāda logar. Ari pad abo akma so nya kāro no kabaga, kan polos a apabanchiw akma syay a mirwa. 15 Hinapot daw intīro a tana a mandad nakapanyibaheng na. Kinan da tabo natokos saw no naitopakaw a yilo aran sira tabo tomnobwaw do tabo a bengkag kontodo asi da saw no kayokayo. Aba polos bohobohong a natokos do kayokayo saw kan mohamoha mana tametamek saw do intīro a tana a Egipto.

16 Do dāwri, nyeng a pinatawag ni Paraon sa Moyses kan Aaron, as nakaibahey na sya dyira a kāna, “Nakagatos ako naya di ĀPO a Dyos nyo kan akma saw dyinyo. 17 Ngay, pakawanen nyo pa yaken so maypisa ah, kan paydasal nyo pa di ĀPO a Dyos nyo a pakarohen na dyaken no nya makadiman a pangdōsa.”

18 Dawa, kinarwan ni Moyses si Paraon kan naydasal di ĀPO. 19 Ki pinamdis ni ĀPO salawsawaw, kan pinayabayat na so mayit a nawriw napasayaw siras pinangen saw a kabaga a pinakwan do Mabaya a Tāw. Aba polos kabaga natokos do aran dino do Egipto. 20 Ki alit na pinatwa ni ĀPO pōso ni Paraon, kan pinalobōsan na sabaw Israelita saw a komaro.

21 Sinpangan na, binata dana ni ĀPO di Moyses a kāna, “Ilāyat mo tanoro mwaya a palongohen do kademdemanaya tan maysāriw tana a Egipto. On, oltimo so kasari a pagkaradapan tawotawo.” 22 Dawa, inlāyat ni Moyses tanoro naw a pinalongo do kademdemanaya, kan nabo dana polos sēdang do intīro a Egipto do irahem no tatdo a karaw. 23 Siraw taga Egipto, apaba polos makapaysinboboya mana makapayadis do yanan naw do tatdo a karaw. Bahes naba dyirad Israelita saw, ta myan sēdang a mangsēdang sira do yanan daw.

24 Do dāwri, pinatawag dana ni Paraon si Moyses, kan binata na dya a kāna, “Sigi, mangay kamo na a magdaydāyaw di ĀPO. Aran siraw mababakes saw kan anak nyo saw, hapen nyo na sa. Nawri dana saw tokosen nyo binyay nyo saw a karniro, kalding, kan bāka.”

25 Ki binata ni Moyses a kāna, “Engga ah. Basta palobōsan mo yamen a myan idāton kan sosohan namen a isakripīsyo di ĀPO a Dyos namen. 26 Siraw binyay namenaw, ki machita a yonot namen, kan abaw aran asa matokos. On, machita a pidyen namen kadwan a pangidaydāyaw di ĀPO a Dyos namen, kan mandan dyi kami a makarapit dwadaw, chapatak namen aba an āngo idāton namen a binyay a pangidadāyaw si ĀPO.”

27 Ki alit na pinatwa ni ĀPO pōso ni Paraon, kan pinalobōsan na saba komaro. 28 Basbāli a do dāwri, binata ni Paraon di Moyses a kāna, “Komaro ka do salapen kwaya! Polos a dyi ka pa mapaboya dyaken a mirwa! An do araw a maboya mo rōpa ko, syirto madiman ka na.”

29 Binata ni Moyses a kāna, “Sigi, akmas ibahey mwaya! Mirwa ako pabanchi a polos a mapaboya dyimo.”