1 Sinpangan na, binata dana ni ĀPO di Moyses a kāna, “Mangay ka di Paraon kan ibahey mo dya a kon mo, ‘Nyaw bata ni ĀPO a Dyos dan Hebreo a kāna, “Palobōsan mo sa komaro tawotawo kwaya tan maidāyaw da yaken. 2 An baywan mo sa komaro as tongtongen mo sa penpenen, 3 iyaw panakabalin ko a ĀPO, ki mangyangay akonchi so taywara a pisti dyirad binyay mo saw a myan do pasto. On, paganyiten ko sanchiw kabalyo mo saw, asno, kamilyo, bāka, karniro, kan siraw kalding mwaw. 4 Ki patarken ko a ĀPO binyay dan Israelita saw dyirad binyay daw no taga Egipto tan abo polos madiman dyirad binyay da saw no Israelitaw.” ’ ”

5 Do dāwri, nangikeddeng si ĀPO so ōras, kan binata na a kāna, “Anchan delak, parinen konchi a ĀPO iyaw nyaya do tana a Egipto.” 6 Ki do somaronwaw a araw, oyod a pinarin ni ĀPO. Nadiman tabo no binyay da saw no taga Egipto saw, ki abaw aran asa nadiman dyirad binyay da saw no Israelita saw. 7 Maynamot ta komwan, nanoboy si Paraon so nangay a nanyideb so binyay da saw no Israelita saw. Ki oyod a abaw aran asa a nadiman. Aran komwan, nāw na matwaw pōso ni Paraon, kan alit na dyi na sa pinalobōsan Israelita saw a komaro.

8 Sinpangan na, binata ni ĀPO di Moyses kan Aaron a kāna, “Mangemkem kamo so ahbek a yapo do ornwaw, as kapaksoy sya ni Moyses do salawsaw do salapenaw ni Paraon. 9 Mayparin anchi a mapīno a ahbek do intīro a tana a Egipto, kan mapahtot anchi so maynonohaw a barot dan tawotawo kan binyay do aran dīno do tana a Egipto.”

10 Dawa, nangemkem sa so ahbek a yapo do naornwanaya, as nakangay da a naytēnek do salapenaw ni Paraon. Pinaksoy ni Moyses do salawsawaw, kan napahtot so maynonohaw a barot dan tawotawo saw kan binyay. 11 Siraw magmadmādyik saw, ki awānen. Makangay pa saba a maytēnek do salapen da Moyses kan Aaron maynamot do barot saw a nanghapot sira kan sira tabo taga Egipto saw. 12 Ki alit na pinatwa ni ĀPO pōso ni Paraon, kan polos a dya nangadngey da Moyses kan Aaron akmas binataw ni ĀPO di Moyses.

13 Sinpangan na, binata ni ĀPO di Moyses a kāna, “Masāpa kanchi a maybangon an delak. Salapen mos Paraon, kan ibahey mo dya a kon mo, ‘Nyaw bata ni ĀPO a Dyos dan Hebreo a kāna, “Palobōsan mo sa komaro tawotawo kwaya tan maidāyaw da yaken. 14 An dyi mwa parinen sichangori, itopak ko no katataywaran saw a pisti ko dyimo kan siraw opisyalis mo saya kontodo tawotawo mo saya tan komwan mapatakan nyo a abaw akma dyaken do tābo lōbong. 15 Ta maparin ko a osaren panakabalin ko kan mangitopak so pisti a mangabo dyimo kan tawotawo mo saya do tanaya. 16 Ki pinalobōsan koymo a mabyay a maynamot do dya panggep tan maipaboya ko dyimo panakabalin ko, as kan tan maibahebahey iyaw ngaran ko do tābo lōbong. 17 Ki ari ka paya matangsit kan palobōsan mo sabaya komaro tawotawo kwaya. 18 As dawa, do dya ōras anchan delak, ipatopak konchiw mawyas a yilo. On, iyaw nyaw katataywaran, kan ari pad naparin nyaya do Egipto a nakayapo do rogi na a mandas changori. 19 Ngay, manoboy ka na sichangori so mangay a mapasirong siras binyay mo saw a natokos kan tabo myan saw a dyira mo do gagan. Ta iyaw yilo a maipatopak anchi dyirad natokos a tawo kan binyay a myan pa daw a dya napasirong, ki madiman sanchi.” ’ ”

20 Siraw namwaw do chirinaw ni ĀPO dyirad opisyalis saw ni Paraon, nānyeng sa nakalokalo a napasirong siras adīpen da saw kan binyay da saw. 21 Ki siraw dyaw a nangikaskāso so chirinaw ni ĀPO, ninonolay da saw adīpen da saw kan siraw binyay da saw do gagan.

22 Binata ni ĀPO di Moyses a kāna, “Ngay, lonaten mo tanoro mwaya a palongohen do kademdemanaya tan mangitopak so yilo do intīro a tana a Egpito, do tawo, do binyay kan tabo tomobo do intīro a tana a Egipto.” 23 Do nakailāyataw ni Moyses so sarokod naw a pinalongo do kademdemanaw, pinayedey kan pinatopak ni ĀPO yilo, as kan pinagkimat na do tanaya. On, pinatopak ni ĀPO yilo do tana a Egipto. 24 Myan naipatopak a yilo a pachirayayan maybibidi a makapoyat a kimat. Iyaw nyaw katataywaran a bagyo a yilo do tabo tana a Egipto nakayapo do nakapayparin na a nasyon. 25 Do intīro a tana a Egipto, natopakan tabo a myan do gagan, magrāman tawo kan binyay. Rinārayaw no yilo tabo a tomnobo, kan nangpisapisang so kāda kayo. 26 No lang tana a dya nakatopakan no yilo, ki do tana a Gosen a iyaw yanan daw no Israelita saw.

27 Do dāwri, pinatawag ni Paraon sa Moyses kan Aaron, kan binata na dyira a kāna, “Rawaten kos changori a naygatos ako. On, si ĀPO, ki kosto. As yamen kan tawotawo ko saya, ki madi. 28 Ngay ah, pachipaydasal nyo pa di ĀPO, ta chaōma namen danayaw kimat naya kan magtopakaya a yilo. Palobōsan ko naynyo a komaro. Sigi, mayam kamo na.”

29 Ki tominbay si Moyses a kāna, “Anchan nakahtot ako do syodadaya, maydedpa akonchi a maydasal di ĀPO. Magsardeng anchiw adey naya, kan apabanchiw yilo tan matonngan monchi a si ĀPO akin dyira so tanaya. 30 Ki aran komwan, imo kan opisyalis mo saya, ki chapatak ko a dyinyo pa a chamo si ĀPO a Dyos.”

31 Narārayaw saw mohamoha a lino kan sebāda, ta naynoy danaw dāwa no sebāda kan nakabōsel danaw lino.* 9:31 Iyaw tamek a lino, ki osaren da a parinen a hobid mana tela (Jos 2:6). As no plastar no sebāda, ki akmas paray mana trīgo (Rot. 1:22). 32 Ki narārayaw sabaw dadwaw a kīta a trīgo, ta mahahay kaynoy no dāwa da.

33 Sinpangan na, kinarwan Moyses si Paraon, kan minohbot do syodadaw. Do nakapaydedpa naw di ĀPO, minhes adeyaw kan yilowaw, as kan nanayahed danaw mawyasaw a chimoy do tanaya. 34 Do nakaboyaw ni Paraon a nagsardeng chimoy, yilo, kan iyaw adeyaw, narapan danaw naygatosan naw. Iya kan siraw opisyalis naw, pinatwa daranaw pōso da. 35 Dawa, nāw na matwa no pōso ni Paraon, kan pinalobōsan na sabaw Israelita saw a komaro a akmas pinabataw ni ĀPO di Moyses.