1 Sinpangan na, binata ni ĀPO di Moyses a kāna, “Asa pa a pisti iyaw itoroh ko di Paraon kan siraw tawotawo naya do Egipto. Kayatokan nyaya, palobōsan narananchi inyo a komaro yapo dya. As anchan parinen na, paypisahen narana inyo a paksyaten. 2 Changori, ibahey mo do tawotawo saya no Israel a kāda mahakay kan kāda mabakes, ki mangyahes sa do karoba da saw so warawara* 11:2 Do kadwan a naiyōlog, ki “alāhas”. a naparin do pirak kan do balitok.” 3 Si ĀPO, inpaanyib na saw Israelitaw dyirad taga Egipto saw. Aran si Moyses a mismo, ki taywara a inanyib dan opisyalis saw ni Paraon kan tawotawo na do tana a Egipto.

4 Do dāwri, binata ni Moyses a kāna, “Nyaw bata ni ĀPO a kāna, ‘Anchan makalo a abak no ahep, mangay akonchi do intīro a Egipto. 5 Tabo a matotoneng a mahahakay do tana a Egipto, ki madiman sanchi a yapo do matoneng a pōtot a mahakay ni Paraon a maydisna do trono a manda do matoneng a mahakay a anak no adīpen a mabakes a manggilgiling. On, aran siraw matotoneng dan binyay. 6 Myan anchiw arimbāngaw no kapagdongdong-aw do intīro a tana a Egipto. Nya anchiw kakārwan, kan ari pad nadngey komwan a yapo do kachwaw kan apabanchi a polos komwan a mirwa. 7 Ki dyirad Israelita saw, abanchiw aran asa chito a omngolngol dyira mana binyay da saw.’ Do dāwrinchi, chapatak mo a yaken a si ĀPO, paytarken ko taga Egipto kan siraw Israelita. 8 Tabo sanchi no opisyalis mo saya, ki mangay sa dyaken. On, maysasakeb sanchi do salapen ko, kan batahen danchi a kon da, ‘Ngay, mayam kamo na ah, kontodo tabo tawotawo saw a monot dyimo!’ Katayoka no nya, komaro ako nanchi.” Do dāwri, si Moyses a taywara a nakasoli, ki komnaro di Paraon.

9 Sinpangan na, binata dana ni ĀPO di Moyses a kāna, “Adngeyen abanchi imo ni Paraon. Nyaw maparin tan maypaypāro parinen ko a makaskasdāaw do Egipto.” 10 Pinarin a tabo da Moyses kan Aaron saw nyaya makaskasdāaw do salapen Paraon, ki pinatwa ni ĀPO pōso ni Paraon, kan pinalobōsan na sabaw Israelita saw a komaro do tana na.