1 Adngeyen nyo nya, inyo a mababakes do Samarya a tomaba a akmas siras bāka saw do Basan, inyo a mangidadanes siras mapopobri kan mangtokatokap siras makachitaw, as kan mangbilin siras lallakay nyo saw a iyangayan daynyo so inomen! 2 Maynamot do kasanto ni Āpo a DYOS, insapata na a kāna, “Masyirto a ītonchiw araw a magorogod kamo dyirad sadyit. On, kāda asa dyinyo, ki akmas amongaw a masayrinan a maikaro. 3 Igōyod danchinyo a iyangay a derecho dyirad singit no naloyo a ahad, as kaitapwak da dyinyo.”* 4:3 Do Hebreo a chirin, ki myan innayon na chirin a “lomongo do Harmon”. Ki malawag aba an āngo chakey na batahen.

4 Bata ni ĀPO dyirad tawotawo no Israel a kāna, “Sīgi! Kangay nyo do Betel† 4:4 Do Betel myan asa a balitok a sinan orbon a bāka a dyira ni Jeroboam (1 Ār. 12:29-30), kan do Gilgal myan saw nakitikitan a didyosen. a maygatos! Mangay kamo pa maygatos do Gilgal, as iyad-adda nyo daw! Mangyangay kamo siras binyay a idāton‡ 4:4 Eks. 29:38; Nom. 28:3-4 nyo do kāda mabekas, as kan kapangyangay nyo siras apagkapollo nyo daw do kāda tatdo a karaw. 5 Mangidāton kamwaya so tināpay a napangayan so yapo§ 4:5 Leb. 7:13 a para do kapagyāman nyo do Dyos, kan ipangas nyo nainpapōswan a dāton a iyangay nyo. Iyaw nyaw chadaw nyo a tawotawo do Israel a parinen,” bata ni Āpo a DYOS.

6 “Yaken napaychapteng* 4:6 Do Hebreo a chirin, ki “Intoroh ko kadalos no nyepen nyo”. do kāda syodad kan kāda idi, ki alit na dyi kamo pa a naybidi dyaken. 7 Pinachimoy kwaba do taywara kachitan mohamoha nyo so ranom. Pinachimoy ko do asa a idi, ki engga do matarek. Nachimoyan asaw a bengkag, ki nayapseng asaw. 8 Siraw tawotawo, mapāpasyaw sa midibidi do kāda idi a maychichwas so ranom a maynom da, ki alit na dyi sa makanawob. Ki aran komwan, alit na dyi kamo pa a naybidi dyaken,” bata ni ĀPO.

9 “Rinārayaw ko mohamoha dyirad hakawan kan kaobāsan nyo so ganyit kan domalangdang a salawsaw a yapo do dāya. Inkisap no kabaga tabo bohobohong no kayokayo nyo a igos kan olibo. Aran komwan, alit na dyi kamo pa a naybidi dyaken,” bata ni ĀPO.

10 “Pinaganyit koynyo a akmas pinarin kwaw do Egipto. Diniman ko saw babbaro nyo do gobat, kan inpayyayo ko saw kabalyo nyo. Nawri danaw mangwangot nyo pinangyobek ko saw a nahta a bangkay do kampo nyo. Ki aran komwan, alit na dyi kamo pa a naybidi dyaken,” binata ni ĀPO.

11 “Rinārayaw ko kadwan dyinyo akmas nakarārayaw kwaw so Sodoma kan Gomorra. Inyo a nakalāsat, akma kamwaya so ahotenaw a masososohan a nalnet do apoy. Ki aran komwan, alit na dyi kamo pa a naybidi dyaken,” binata ni ĀPO. 12 “As dawa, dosāen konchi inyo a tawotawo do Israel. Maynamot ta parinen ko nya dyinyo, saganāan nyo kabayat nyo so kapangokom no Dyos nyo!”