1 Adngeyen nyo nya chirin ni ĀPO a maikontra dyinyo a tawotawo no Israel. On, nya minsāhi, ki maikontra dyirad intīro a nasyon a inihtot na a yapo do Egipto. 2 “Yapo do tabo nasyon do hapotayan tana, inyo lang pinidi ko kan inay-aywanan. Dawa, maynamot do tabo a gatogatos nyo, dosāen konchinyo.”

3 Mayrayay sawri a mayam dadwa tawo an dyi sa manma magtōlag?

4 Mayngerngeroriw lion do kahasan an abo nachichwasan na sangraben na?

Mayngerngeroriw bomaro a lion do abab na an abo nahap na?

5 Masdokoriw manomanok an dya mapawkoy asdok?

Mabokchitoriw asdok an dya madyiway?

6 An maitanggoyob trompīta do syodad a mangipakatoneng so gobat, maychamirpirpir sabawriw tawotawo?

Aryoriw didigra do asa syodad an dya ipalōbos ni ĀPO?

7 Masigorādo a panmanmahen aba parinen Āpo a DYOS aran āngo an dyi na manma ipaltiing panggep naw dyirad propīta na sa.

8 Nakapayngerngeraw no lion. Aryoriw dya namo?

Nakapaychirinaw ni Āpo a DYOS. Sino maskeh a mangipakatoneng so inpaltiing na?

9 Ipakatoneng nyo do tawotawo a myan dyirad kōta saw no syodad a Asdod kan tana a Egipto a kon nyo, “Maychichipeh kamo do tokotokonaw do omdibon no Samarya, kan saksyan nyo rakoh a riribok do irahem no nawri a syodad kan kaidadanes a mapariparin daw.”

10 Bata ni ĀPO a kāna, “Chapatak daba no nya tawotawo mamarin so kosto. Apnopnohen daw kōta da so kinabaknang a yapo do kasamsam kan karanggas da.”

11 Dawa, nyaw bata ni Āpo a DYOS a kāna, “Myan anchiw kabōsor a mangdibon do tana nyo. Abohen nanchiw kayit nyo, as kan samsaman nanchiw pagkamītan nyo saw a gwardyado.”

12 Bata ni ĀPO a kāna, “Akmas asa magpaspastor a mangisalākan do dangoy no asa lion so dadwaw lang a kokod no karniro mana bīt dana no tadyinya na, komwan anchiw maparin dyirad papere lang a makalāsat a tawotawo no Samarya a maypoypoktad dyirad mapipintasaw a katri da.* 3:12 Mana “Komwan anchiw kaisalākan no tawotawo no Israel a omyan do Samarya a no mabidin dyira, ki payis na lang no katri mana kakteb no manaro a disnan.” 13 Mangadngey kamo kan saksyan nyo maikontra dyirad kapotōtan Jakob,” kāna ni Āpo a DYOS a Manakabalin do Tābo. 14 “Anchan araw a kapangdōsa ko dyirad tawotawo no Israel maynamot dyirad gatogatos da, rārayawen ko sanchiw altar do Betel.† 3:14 1 Ār. 12:28-33 Makteb anchiw apat saw a sinan olong‡ 3:14 Eks. 21:12-14; 1 Ār. 1:50; 2:28 no kāda aroywan no altaraw, as masday sanchi do tana. 15 Rārayawen konchiw bahay a para do ammyan kan komwan pa do bahay a para do rayon. Siraw bahabahay a nabistyan so sōng saw no elipanti, ki marārayaw sanchi. On, siraw bahabahay dan mabaknang, marārayaw sanchi a tabo.”