1 Adngeyen nyo, inyo a tawotawo do Israel, iyaw pagdongdong-aw kwaya a maynamot dyinyo:

3 Bata ni Āpo a DYOS a kāna, “Iyaw syodad do Israel a manoboy so asa rībo a soldādo a machigobat, ki asa gasot anchi lang makapaybidi. Iyaw asa idi a manoboy so asa gasot a soldādo a machigobat, ki asa poho anchi lang makapaybidi.”

4 Iyaw nyaw bata ni ĀPO dyirad tawotawo do Israel a kāna, “Maybidi kamo dyaken kan mabyay kamo. 5 May kamo aba do Betel a magdaydāyaw siras didyosen, kan mangay kamo aba dyirad bolto saw do Gilgal, mana romapit kamo aba do Beerseba. Ta siraw tawotawo do Gilgal, ki masigorādo a maakaw sanchi, as siraw tawotawo do Betel, ki apabanchiw sinpaspangan da.”

6 Maybidi kamo di ĀPO kan mabyay kamo, ta āngwan dalaposen na saw kapotōtan ni Jose* 5:6 Siraw kapotōtan ni Jose mana siraw tawotawo do Israel, ki yapo sa do trībo no Epraim kan Manasses a siraw kasisitāan a trībo do pagāryan do ammyanan. a akmay apoy a mangabo siras myan do Betel, kan aba polos makasboy sya. 7 Kapakāsi nyo pa, ta dyinīdo nyo kosto a kapangokom a nayparin a makpad,† 5:7 Do Hebreo a chirin, ki asa tamek a taywara makpad asoy no bohobohong naw. as kan inpoha nyo kinalinteg a akmay basora.

10 Ipsok nyo mangitēnek so kosto do pangokoman, kan idadanes nyo iyaw mangibaheyaw so oyod. 11 Linasalasagan nyo mapopobri saw, kan tinakawan nyo sa so trīgo. Dawa, aran mapatnek kamo so bahay nyo a bato a mapipintas, polos a dyi kamonchi a makapagyan daw. Aran marāber saw kaobāsan a inmoha nyo, polos anchi a dyi nyo a maynom palek da. 12 Chapatak ko an maypāngo kataywara no kasōkir nyo kan maypāngo karahmet dan gatos nyo. Lidyalidyaten nyo tawo saw a malinteg do kapangdaw nyo so pasoksok, as kan pinenpen nyo kinalinteg dyirad mapopobri saw do pangokoman. 13 Dawa, iyaw tawo a masīrib, ki maganaganay dana an dya maylilyak, maynamot ta mararahet dana saw nyaya araw.

14 Nāw nyo chichwasen maganay a dya iyaw marahet tan mabyay kamo. Do dāwri, myan anchi si ĀPO Dyos a Manakabalin do Tābo dyinyo a akmas inbahey nyowaw a maynamot dya. 15 Ipsok nyo marahet, kan chadaw nyo maganay. Pagāryen nyo kinalinteg do pangokoman. Āngonchan si ĀPO a Manakabalin do Tābo, maāsot kāsi na do tawotawo no nya nasyon dyirad nakalāsat saw a sibibyay pa.§ 5:15 Do Hebreo a chirin, ki siraw nakalāsataw do trībo ni Jose.

16 Dawa, nyaw bata ni ĀPO a Manakabalin do Tābo a kāna, “Myan anchiw kapagdongdong-aw do kāda plasa, kan myan saw magarimbāngaw do oltimo a liday da do tabo a kalkalsāda do syodadaya. Matawagan sanchiw homakahakaw a machitanyitanyis kan siraw matangtangdanan saw a magdongdong-aw. 17 Myan anchiw kapagdongdong-aw do tabo kaobāsan, ta mangay akonchi a midibidi a mangdōsa dyinyo.” Nyaw bata ni ĀPO.

18 Kapakāsi nyo pa a mangahahay so araw a kangay ni ĀPO! Āngo paro maganay a maitoroh na no nawri a araw? Iyanchiw nawri, ki araw no sari a dya sēdang. 19 Akma anchis tawowaw a payyayowan naw lion, ki myan sawen mabayat na matarek a maranggas a animal.* 5:19 Do Hebreo a chirin, ki iyaw animal a oso. Mana akmas tawowaw a somnabat, do nakapanareng naw so tanoro naw do dyindyinaw, sinbat no boday! 20 Iyaw arawaw a kangay ni ĀPO, ki sari lang a abaw soho. Araw anchiw nawri a makalidliday, kan aba polos sēdang.

21 Bata ni ĀPO a kāna, “Ipsok ko saw sinsinan saw a pista nyo,† 5:21 Eks. 23: 15-16 kan maibtoran ko sabaw kapaychichipeh nyo. 22 Aran yangay nyo saw dāton saw a masosohan kan dāton saw a irek, rawaten ko sabanchi. Aran siranchiw napataba‡ 5:22 Masosohan iyaw tabaw no binyay. As iyaw asi naw, ki kanen no tawotawo. nyo saw a binyay a dāton a pachikapya, ikaskāso kwabanchi.§ 5:22 Isa. 1:11-14 23 Aryan nyo naw pakalikalyak nyo saya kanta nyo! Chakey kwaba adngeyen toktokar no arpa nyo! 24 Basbāli pakono a pagāryen nyo kinalinteg a akmas kawyog naw no ranom do oksong, kan kalinteg a akmas rakohaw a oksong a dya polos a mayachan.

25 “Inyo a tawotawo do Israel, taywaran nangyangay kamo so dāton saw a masosohan dyaken kan siraw dāton saw a mapaychachapya do apat a poho a katawen do kayan nyo do let-ang? 26 Ki sichangori, maykatkat kamo siras dadwa saw a didyosen* 5:26 Isa. 46:1 a pinarin nyo a para dyinyo a mismo a sa Sakkot a āri no didyosen nyo, kan Kaywan a iyaw bitohenaw a didyosen nyo. 27 Dawa, payamen koynyo a sibabahod a akawen do labes no Damasko a syodad.” Nyaw bata ni ĀPO, iyaw Dyos a Manakabalin do Tābo.