1 Bata ni ĀPO a kāna, “Nāw da maygaygatos no tawotawo do Moab. As dawa, sigorādo a dosāen ko sanchi, ta aba polos anyib da do tohatohang naw no nadimanaw a āri do Edom, ta sinosohan da mandan nayahbek. 2 Maynamot do dyaya, ipanamay konchiw tana a Moab, kan temtemen ko sanchiw kōta no Keryot. Madiman sanchiw tawotawo do Moab do kayan da magariwāwa do gobat, do kadama da maychangēngengey no soldādo kan kaitanggoyob no trompīta. 3 Dimanen konchiw magtoray do Moab kontodo tabo saw opisyalis no nawri a tana.” Nyaw bata ni ĀPO.

4 Bata ni ĀPO a kāna, “Nāw da maygaygatos no tawotawo do Joda. As dawa, sigorādo a dosāen ko sanchi, ta inchipa da saw linteg ko kan tinongpal dabaw bilbilin ko. Napāwaw sa dyirad didyosen* 2:4 Mana “bayataw”. a siraw inononotan dan kapoonan da saw. 5 Maynamot do dyaya, ipanamay konchi iyaw tana do Joda, kan temtemen ko sanchiw kōta no Jerosalem.”

6 Bata ni ĀPO a kāna, “Nāw da maygaygatos no tawotawo do Israel. As dawa, sigorādo a dosāen ko sanchi, ta ilāko da saw monot saw do kosto kan panādi da so pirak, as siraw mapopobri saw, itādi da do asa lang a kapāris no tokap. 7 Lasalasagan da saw mapopobri, kan tod da sa pawadinen naidadanes saw. Oknoden pan may-āmang asa mabakes, ta dawa, laposan daw masantwan a ngaran ko. 8 Do tabo no logar a pagdaydayāwan da, naypoktadan da saw laylayaw a naisalda dyira.† 2:8 Eks. 22:25-26; Deot. 24:12-13 Do timplowaw no Dyos da, ininom daw palek a nahap da a molta.

9 “Do salapen dan tawotawo ko, inabo ko saw tawotawo a Amoreo‡ 2:9 Gen. 15:16; 48:22; Deot. 1:20, 3:8-11; Jos. 7:7 a makakarang a akmas kayokayo a sidro kan akma pas kayit no kayokayo a logo. Rinārayaw ko asi na kontodo yamot na saw. 10 Yaken nangihtot dyinyo do Egipto. Inpangōlwan koynyo do let-ang so apat a poho a katawen kan intoroh ko paw tana daw no Amoreo. 11 Tinongdo ko saw kadwan a anak nyo a mahahakay a mayparin a propīta, kan kadwan a babbaro nyo a mayparin a Nasireo.§ 2:11 Nom. 6:1-21 Oyod abawriw nya, inyo a tawotawo no Israel?” inyahes ni ĀPO. 12 “Ki pinaynom nyos palek Nasireo saw, kan binilin nyo saw propītaw a dyi da ibahey inpaltiing ko dyira. 13 Changori, pakaspyen koynyo a akmas karisonaw a napno so irek. 14 Aran siraw matataray saw a mayyayo, makadichan sabanchi a polos! Siraw mayiyit saw, ki komapsot sanchi. As kan siraw mabibīleg, ki maisalākan dabanchiw mismo da inawan. 15 Siraw magaganay saw a maypāpana, ki pīlit sanchi a magsanod. No matataray saw a mayyayo, ki makaditdit sabanchi. As kan siraw komakabalyowaw, ki maisalākan dabanchiw inawan da. 16 Aran siraw katotordan a taga-gobat, ki iwarsi danchiw armas da, as kapayyayo da do dāwrinchi a araw,” bata ni ĀPO.