1 Do dāwri, myan saw papito a poho a potōt* 10:1 No papito a poho a pōtot, ki nagrāman saw apōko a mahahakay ni Ahab. ni Ahab do Samarya. Dawa, naytolas si Jeho siras tolas, kan inpaw-it na sa do Samarya dyirad opisyalis saw no Jesreel, dyirad panglakayen saw, kan dyirad manyidechideb saw siras pōtot naw ni Ahab. Nyaw intolas na: 2 “Myan sa dyinyo pōtot no āmo nyowaya, kan myan sa dyinyo loglogan a pachigobat kan kabkabalyo, naahadan a syodad a akmay kōta kan ar-armas. Apāman a makarapit nya tolas ko dyinyo, 3 mamidi kamo so kagaganayanaw kan katataywaran so kaikari a yapo dyira, kan padisnahen nyo do trono naw ni āmang na, as kan machigobat kamo a mangisakit so pamilya ni āmo nyo.”

4 Ki palālo nakamo da, kan naysiniiyahes sa a kon da, “An dyi sa nakapaytēnek a kontra di Jeho dadwa saw a āri a sa Āri Joram kan Āri Ahasyas, pāngo narananchi dyaten?”

5 Dawa, iyaw makatoneng so palasyo, iyaw makatoneng so syodad, kontodo siraw panglakayen saw kan siraw manyidechideb siras pōtot na saw, ki nangipaw-it sa so nya minsāhi da di Jeho: “Tobotoboyen mo na yamen, kan parinen namen an āngo ibahey mo. Mangpatnek kami aba so aran sino a mayparin a āri. Parinen mo aran āngo a iktokto mo a maganay.”

6 Sinpangan na, naytolas dana si Jeho so kāna, “An machirayay kamo dyaken kan makey kamo a magtongpal dyaken, ahapen nyo sanchiw oho daw no pōtot saw no āmo nyowaw, kan panawbi nyonchi dyaken do Jesreel do komwanaya ōras anchan delak.”

Siraw papito saw a poho a pōtot no āryaw, ki myan sa do aywan dan mawnonotan saw a mahahakay do dawri a syodad a manyidechideb sira. 7 Do nakapakarapit naw no tolasaw dyira, siraw nyaya mahahakay, ki inhap da saw pōtotaw no āri, kan diniman da sa tabo papitwaw a poho. Pinasdot da saw oho daw do irahemaw no alaalat da, kan inpayangay da sa di Jeho do Jesreel. 8 Do nakawara naw no natoboyaw, inbahey na di Jeho a kāna, “Inpayangay darana saw oho daw no pōtotaw no āri.”

Inmandar ni Jeho a kāna, “Paycharwahen nyo a opohen oho da saw do asdepanaya do rowangan no syodad mandanchan mabekas.”

9 Do kamabekasanaw, minohtot si Jeho a nangay do asdepanaw no rowangan. Naytēnek do salapen dan tabo tawotawo a myan daw, kan binata na a kāna, “Gatos nyo aba, an dya yaken a nagpangta so maikontra di āmo ko a si Āri Joram, kan diniman ko iya. Ki sino nangdiman siras nyaya tabo? 10 Changori, mapatakan nyo na a abaw chirin a inbahey ni ĀPO a machikontra do pamilya ni Ahab a dyinchi a matongpal. Pinarin ni ĀPO inpaichirin naw do pachirawatan naw a si Elyas.” 11 Dawa, diniman ni Jeho tabo do Jesreel nabidin saw do pamilya ni Ahab. Diniman na paw tabo opisyalis na, siraw masngenaw a sīt na, kan papādi na saw a mandan arabaw nabidin a sibibyay a aran asa dyira.

12 Sinpangan na, komnaro si Jeho a nangay do Samarya. Do kahabas naw do logaraw a mayngaran so Bet-eked Dan Magpaspastor, 13 nabayat na saw kadwanaw a kaliposan ni Ahasyas a āri no Joda, kan inyahes na dyira a kāna, “Sino kamo?”

Binata da a kon da, “Kaliposan na yamen ni Ahasyas, kan minosok kami tan yangay namen a kablaāwan pamilya saw ni Āri Joram, kan pamilya saw ni Reyna Jesebel.”

14 Inmandar ni Jeho dyirad soldādo na saw a kāna, “Tiliwen nyo sa sibibyay!” Dawa, tiniliw da sa a sibibyay, as diniman da sa tabo a apat a poho kan dadwa do masngenaw no bobon no Bet-eked. Abaw tinokos na aran asa a mabyay.

15 Do nakakaro daw ni Jeho, nabayat na si Jehonadab a pōtot ni Rekab a madama a mangay a machibayat dya. Kinablaāwan iya ni Jeho, kan binata na a kāna, “Machirayay kawri dyaken, akmas kapachirayay ko dyimo?”† 10:15 Do Hebreo a chirin, ki “Mapodno pōso mori do pōso ko akmas (pōso) ko do (pōso) mo?”

“Naon,” initbay ni Jehonadab.

Binata ni Jeho a kāna, “An komwan, iparawat mo dyaken kakamay mwaya.” Dawa, inparawat naw kakamay naw, kan sinidongan ni Jeho a pinasakay do logan naw a pachigobat. 16 Binata dana ni Jeho dya a kāna, “Machangay ka dyaken, kan chiban mo kapodno ko di ĀPO.” As do dāwri, nagloganan ni Jehonadab loganaw a pachigobat ni Jeho.

17 Do nakapakarapit naw do Samarya, diniman na sa tabo nabidinaw daw a kapamilya ni Ahab. Diniman na sa a sigon do chirinaw ni ĀPO a inpaibahey na di Elyas.

18 Sinpangan na, inakpeh ni Jeho tabo tawotawo do Samarya, kan binata na dyira a kāna, “Sinsinan lang nakapagdaydāyaw ni Ahab di Baal. Amnan yaken a Jeho, ki magdaydāyaw akonchi dya so mangamangay pa. 19 Sichangori, tawagan nyo saw tabo propīta saw ni Baal, tabo magdaydāyaw dya, kan tabo papādi na. Abo mahabas a mangay, ta mangidāton akonchi so rakoh a sakripīsyo a para di Baal. No aran sino a dya mangay, ki mabyay pabanchi.” Ki pinarin ni Jeho nya masīkap a plāno na tan komwan rārayawen na saw magdaydāyaw saw di Baal.

20 Binata ni Jeho a kāna, “Manawag kamo so kapaychichipeh a kapagdāyaw di Baal.” Do dāwri, inwaragāwag da. 21 As inawis na sa do intīro a Israel, kan nangay sa tabo nagdaydāyaw saw di Baal. Abaw aran asa natokos a dya nangay. Nakapno sa do irahem naw no timplo ni Baal mandan napekpek maychamībit na saw. 22 Do dāwri, binata ni Jeho do mangay-aywanaw so naitatārek saw a kagay a para do kapagdaydāyaw di Baal, kan binata na a kāna, “Pahtoten mo kagay saw a para do tabo a magdaydāyaw di Baal.” Dawa, napahtot saw kagayaw a para dyira.

23 Sinpangan na, somindep si Jeho kan Jehonadab a pōtot ni Rekab do irahem naw no timplo ni Baal. Binata ni Jeho dyirad magdaydāyaw saw di Baal a kāna, “Chichwasen nyo a maganay tan abo saw magsirsīrbi di ĀPO a myan dyinyo dya. Basta sira lang magdaydāyaw saw di Baal myan dya.” 24 Sinpangan na, nangay sa a mangisakripīsyo kan maysosoh so dāton da saw. Ki do dāwri, pinagpwisto sa ni Jeho wawaho saw a poho a mahahakay do gagan, kan binallaāgan na sa a kāna, “No aran sino dyinyo a mangipalōbos so aran sino a iparawat ko do kakakmay na a makalības, ki iyanchiw byay naw tādi no byay no nakalībasaw.”

25 Apāman a natayokaw kapaysosohaw ni Jeho so dātonaw, inmandar na dyirad gwardyaw kan opisyalis saw a kāna, “Somdep kamo kan dimanen nyo sa. Abaw aran asa palobōsan nyo a makalības.” Dawa, diniman da sa no gwardyaw kan opisyalis saw do ispāda. Ginoyod da saw bangkayaw a pinagsid do gagan, as kan somindep sa do makatayrahemaw a kwarto no timplo naw ni Baal. 26 Inihtot daw masantwanaw a posti a bato a yapo do timplo naw ni Baal kan sinosohan da. 27 Rinārayaw daw masantwanaw a posti a bato ni Baal, kan rinakrak daw timplowaw ni Baal, as pinayparin da a kasilyas mandas changori a araw.

28 Dawa, inopas a rinārayaw ni Jeho iyaw kapagdaydāyaw di Baal do Israel. 29 Ki aran komwan, tinadyichokodan nabaw gatogatos ni Jeroboam a pōtot ni Nebat a nawriw napawnot siras tawotawowaw no Israel a naygatos do kapagdaydāyaw da so balitok a sinan orbon a bāka do Betel kan do Dan.‡ 10:29 1 Ār. 12:28-29

30 Binata ni ĀPO di Jeho a kāna, “Maynamot ta pinarin mo maganay do kapagtongpal mo so kosto do kapanyideb ko, kan pinarin mo do pamilya ni Ahab iyaw tabo sigon do myan do aktokto ko, maydisna sanchiw kapotōtan mo do trono no Israel a manda do chapat na a kapotōtan.” 31 Ki aran komwan, nagannad aba si Jeho do kapagtongpal na do tābo pōso na so linteg ni ĀPO a Dyos no Israel. Tinadyichokodan na sabaw gatogatos ni Jeroboam a nawriw napawnot siras tawotawo no Israel a naygatos.

32 Do dāwri sa a araw, inrogi ni ĀPO a pinadēkey naw tana no Israel. Rinaot ni Āri Hasael§ 10:32 Si Hasael, ki āri do Aram mana Sirya. 1 Ār. 19:15; 2 Ār. 8:7-15, 9:15 tana no Israel, kan inābak na sa do intīro saw a sākop da: 33 do dayāen no Oksong a Jordan a nagrāman tabo tana no Gilead, Gad, Ruben, kan Mamandāya a Manasses, kan yapo do idi a Aroer do payis no payahosongan no Arnon a komwan do Gilead a komwan do Basan.

34 Siraw kadwan saw a napariparin do nakapagāri ni Jeho, tabo pinarin na kan napatayoka na, ki naitolas sabawri do librowaw no pakasaritāan dan ar-āri saw do Israel?

35 Nachipaynahah si Jeho dyirad aāmang na saw, kan naitābon do Samarya. Si Jehoahas a pōtot na, ki nachitādi dya a āri. 36 No nakahay no nakapagāri ni Jeho do Israel a yapo do Samarya, ki dadwa poho kan wawaho a katawen.