1 Do nakaboyaw sya ni Atalya a ānang ni Āri Ahasyas do Joda a nadiman danaw anak naw a si Ahasyas,* 11:1 2 Ār. 9:27-28 inrogi na sa inpapadiman tabo nabidin saw a pamilya no āri. 2 Ki si Jehoseba a pōtot a mabakes ni simna Āri Jehoram a kakteh a mabakes ni Ahasyas, ki inahap na si Joas a pōtot a mahakay ni Ahasyas, kan intayo na a pinateng a yapo dyirad pōtotaw a mahahakay ni Ahasyas a īto a maipadiman. Pinangay ni Jehoseba kan iyaw mangtagībi sya do irahem no kwarto a pakaychehan tan maitayo si Joas di Atalya. Dawa, naipadiman aba. 3 Nāw ni Joas a naitayo di ikit na a si Jehoseba† 11:3 No lakay ni Jehoseba, ki si Jehoyada a iyaw matohosaw a pādi. do timplo naw ni ĀPO so anem a katawen ranan kapagtoray ni Atalya do dawri a tana.

4 Do chapapito naw a katawen, nanawag si Jehoyada a iyaw matohosaw a pādi siras komanderaw no bonggoy saw no ginasot,‡ 11:4 Siraw nyaw komander, ki makatoneng sa dyirad papādi kan siraw Lebita. siraw Kariteo saw kan siraw taga-bantayaw a mangay sa do irahem naw no timplo ni ĀPO. Nachitōlag si Jehoyada dyira kan pinagsapata na sa do timplowaw ni ĀPO. Sinpangan na, inpaboya na dyiraw pōtotaw no simna āryaw. 5 Inmandar na dyira a kāna, “Nyayaw parinen nyonchi: Inyo a bonggoy a myan so rebbeng a magbantay anchan Arawaw no Kapaynaynahah, ki bantayan no pagkatlo nyo palasyowaw. 6 As iyaw asaya pagkatlo, ki bantayan nyonchiw Rowanganaw a Sor. No manawdyi a pagkatlo, ki bantayan nyonchiw rowanganaw do dyichodan dan kadwan saw a taga-bantay Komwan bantayan nyo palasyowaw do omdibonaw. 7 As inyo a myan do dadwa paya matarek a bonggoy a gagāngay a nakatayoka do rebbeng nyo an Araw no Kapaynaynahah, ki machita maytēnek kamo panchi a magbantay do timplowaya ni ĀPO. 8 Dibonen nyo a bantayan āryaw. Kāda asa dyinyo, machita a sisasagānaw armas nyo do kakamay nyo. Aran sino a maypasngen do yanan nyo, ki machita a maipadiman. Nāw nyo a machisngen do āryaw aran dino a kwanan na.”

9 Pinarin dan komander saw no bonggoy saw no ginasot tabo inmandaraw ni Jehoyada a pādi. Kāda asa komander, ki nanghap so tawo na sa a mahahakay a siraw mangayaw a magbantay do Araw no Kapaynaynahah kontodo siraw katatayoka da paw a nagbantay, as nangay sa di Jehoyada a pādi. 10 Nanoroh pādyaw do komander saw siras chibot kan sarapa a dyinira ni Āri Dabid a kinapya da do irahemaw no timplowaw ni ĀPO. 11 Siraw taga-bantayaw a natataysa so armas do kakamay da, ki nakadibon sa do āryaw. Nagpwisto sa do masngenaw do altar kan timplowaw, yapo do mangketaw do abagātan a komwan do mangketaw do ammyānan no timplo.

12 Pinahtot ni Jehoyada si Joas a pōtot no āryaw, kan pinangay na dyaw koronaw, as kan intoroh na dyaw librowaw no linteg. Pinado no pādyaw lanaw do oho ni Joas a patneken na a āri. Nagpalakpak saw tawotawowaw, kan inngēngey da kon da, “Manayon pakono byay ni āri!”

13 Do nakadngey naw ni Atalya so ariwāwa daw no taga-bantay kan siraw tawotawowaw, ki nangay a nachirapa dyirad tawotawowaw do timplo ni ĀPO. 14 Naboya na a myan bayo a āri a mayteytēnek do masngenaw do pareyaw§ 11:14 Myan dadwa a parey a tombāga a mayngaran so Jakin kan Boas. 1 Ār. 7:15-22 a akmas dadakay daw an myan kapagkorona. Siraw komander saw kan siraw taga-trompītaw, ki myan sa do bīt naw no āryaw. Siraw tabo a tawotawo do dawri a tana, ki magragragsak sa kan alopan da saw trompīita da. Do dāwri, pinirit ni Atalya iyaw kagay naw, kan inngēngey na a kāna, “Kapanglipot! Kapanglipot!”

15 Inmandar ni Jehoyada a pādi dyirad komander saw no bonggoy saw no ginasot a nangidaōlo siras bōyot saw a kāna, “Ihtot nyo si Atalya do payawan da san taga-bantay saya, kan dimanen nyo aran sino a monot dya.” Ta inbahey no pādyaw a kāna, “Palobōsan nyo aba a maipadiman do irahem no timplowaya ni ĀPO.” 16 Dawa, tiniliw da si Atalya, kan inyangay da do asdepan dan kabkabalyo do palasyowaw, as dawriw nangdimanan da sya.

17 Sinpangan na, namarin si Jehoyada so tōlag do nagbaetan da ĀPO kan iyaw āryaw magrāman do tawotawo saw a mayparin a tawotawo ni ĀPO. Namarin pa so tōlag do nagbaetan no āryaw kan siraw tawotawowaw. 18 Do dāwri, nangay sa tabo tawotawo do dawri a tana do timplowaw ni Baal, kan rinakrak da. Hinomek da saw altar saw kan didyosen saw, kan diniman da si Mattan a pādi ni Baal do salapen daw no altar saw.

Sinpangan na, inpwisto sa ni Jehoyada a pādi siraw taga-bantayaw do timplo naw ni ĀPO. 19 Inahap na saw komander saw no bonggoy saw no ginasot, siraw Kariteo saw, siraw taga-bantay saw, kan tabo tawotawo do dawri a tana, as kan indaōlowan da a inyangay āryaw a minosok yapo do timplowaw ni ĀPO. Somindep sa do rarahanaw do rowanganaw no taga-bantay saw a nangay do palasyowaw, as dawriw naydisnan no āryaw do trono naw. 20 As siraw tabo a tawotawo do dawri a tana, ki nagragragsak sa kan nagtalnaw syodadaw, maynamot ta naipadiman si Atalya do ispāda do palasyowaw.

21 Nagtawen si Joas so papito do nakapagāri na.* 11:21 2 Kron 24:1-14