1 Do dāwri, nanawag si propīta Eliseo so asa dyirad bonggoy daw no propīta, kan binata na dya a kāna, “Ibarikis mo kagay mwaya, iyonot mo nya praskita no lana, kan mangay ka do Ramot-gilead. 2 Anchan myan ka daw, chichwasen monchi si Jeho a pōtot ni Jehosapat a pōtot ni Nimsi. Mangay ka dya, ahapen mo a ikaro dyirad rārayay na saw, kan isdep mo do makatayrahemaw a kwarto. 3 Do dāwri, pahtoten mo praskitaw no lana, as kapado mo sya do oho naw, kan ibahey mo a kon mo, ‘Nyayaw bata ni ĀPO: Do nya kapado ko dyimo so lana, patneken koymo a āri do Israel.’ Tayokaw nya, iwangan mo pantawaw, as kapayyayo mo. Maybabalay kaba!”

4 Dawa, iyaw barwaw a propīta, nangay do Ramot-gilead. 5 Do nakawara naw, naboya na saw opisyalisaw no bōyot a naychadisdisna a naychipeh. Binata no barwaw a kāna, “Ariw minsāhi ko dyimo mo komander.”

Inyahes ni Jeho a kāna, “Na, sino dyamen?”

Inatbay na a kāna, “Para dyimo mo komander.”

6 Sinpangan na, naytēnek si Jeho, kan somindep sa dadwa do bahayaw. Do dāwri, pinadwan no propītaw oho naw ni Jeho so lana, kan inbahey na dya a kāna, “Nyayaw bata ni ĀPO a Dyos no Israel: Do nya kapado ko dyimo so lana, ki patneken koymo a āri dyirad tawotawo a Israel a dyira ni ĀPO. 7 Imonchiw mangdiman so pamilya ni Ahab a āmo mo, tan bahsen ko si Jesebel do nakapawyog na so raya dan pachirawatan ko a propīta kan raya dan tabo kadwan a pachirawatan ko a ĀPO. 8 Tābo no pamilya ni Ahab, ki mabonchi. Opasen ko sanchi a dimanen kāda mahakay a yapo di Ahab a myan do Israel aran adīpen mana siwayawaya. 9 Payparinen konchiw pamilya ni Ahab a akmas pamilya ni Jeroboam a pōtot ni Nebat, kan akmas pamilyaw ni Baasa a pōtot ni Ahiha. 10 As maynamot di Jesebel, iya kanen danchi no chito do sākop no Jesreel,* 9:10 1 Ār. 21:19-24 kan abanchiw aran asa a mangitabon sya! ” Katayokaw no nya, iniwangan no barwaw a propītaw pantawaw, as nakapayyayo na.

11 Do nakahbot naw ni Jeho a mangay dyirad rārayay naw a opisyalis, asa dyiraw nanahes dya a kāna, “Abaw problima? Āngo ta nangay dyimo tawowaya magattit?”

Initbay ni Jeho a kāna, “Chapatak nyo naw nya tawo kan no gagāngay a ibahebahey na.”

12 Ki binata dan rārayay naw a kon da, “Namna, taywaran nawri? Ibahey mo oyod.”

Binata ni Jeho a kāna, “Iyaw nyayaw inbahey na dyaken: Nyayaw bata ni ĀPO: Do nya kapado ko dyimo so lana, patneken koymo a āri do Israel.”

13 Do dāwri, nakalyalisto sa nanghap so kagay da saw, kan binolay da sa do lasagan naw do pāngal saw. Inalopan daw trompītaw, kan inngēngey da a kon da, “Si Jeho danaw āri!”

14 Sinpangan na, nagpangta si Jeho a pōtot ni Jehosapat a pōtot ni Nimsi so maikontra di Āri Joram. (Do dāwri, si Āri Joram kan tābo bōyot no Israel, ki magbanbantay sa so Ramot-gilead do kapagraot ni Hasael a āri no Aram. 15 Ki si Āri Joram, naybidi do Jesreel tan mapapya so bigar na saw a yapo dyirad Arameo saw do kapachigobat di Hasael a āri no Aram.)† 9:15 2 Ār. 8:28-29 Binata ni Jeho dyirad minonotaw dya a kāna, “An oyod a chakey nyo yaken a mayparin a āri, palobōsan nyo abaw aran sino a maglības a yapo do syodadaya kan mangay a mangipadāmag do Jesreel.” 16 Sinpangan na, somnakay si Jeho do logan naw a pachigobat, kan nangay do Jesreel, ta ari daw a maynaynahah si Joram. As si Ahasyas a āri no Joda, ki minosok daw a mangpasyar si Joram.

17 Do nakaboyaw sya no taga-wanawanaw a mayteytēnek do pagwanawanan do Jesreel siras bōyot naw ni Jeho a maypaypasngen, intawag na a kāna, “Tori sayaw maboya ko a bōyot a maypaypasngen.”

Inbilin ni Joram a kāna, “Manoboy ka so komakabalyo a machibayat dyira, kan ipaiyahes mo a ‘Mangay kamori a mangyangay so talna?’ ”

18 Nangay komakabalyowaw a nachibayat di Jeho, kan binata na a kāna, “Nyayaw bata ni āri: ‘Mangay kamori a mangyangay so talna?’ ”

Initbay ni Jeho a kāna, “Āngo bibyang mo do talna? Mangay ka do dichodan kwaya.”

Sinpangan na, inpadāmag no taga-wanawanaw a kāna, “Nakarapitayaw natoboyaw dyira, ki maybidi pabaya.”

19 Dawa, nanoboy danaw āryaw so somnarono a komakabalyo. Do nakapakarapit naw dyira, binata na a kāna, “Nyayaw bata ni āri: ‘Mangay kamori a mangyangay so talna?’ ”

Initbay ni Jeho a kāna, “Āngo bibyang mo do talna? Mangay ka do dichodan kwaya.”

20 Inpadāmag danan no taga-wanawanaw a kāna, “Nakarapit danaya dyira as aran iyaya, ki maybidi pabaya. Iyayaw mangidaōlo siras logan a pachigobat, ki akmaya si Jeho a pōtot ni Nimsi, ta no kaimaniho nas logan saya, ki akmayay magat-attit.”

21 Inbilin ni Joram a kāna, “Isagāna nyo logan kwaw a pachigobat.” Do nakaisagāna naranaw, nagsakay si Joram a āri no Israel kan Ahasyas a āri no Joda do bōkod da a logan a nangay a nachibayat di Jeho. Nabayat da do tanaw a do nakarahan, ki dyira ni Nabot a Jesreelita.‡ 9:21 1 Ār. 21 22 Do nakaboyaw ni Joram si Jeho, inyahes na a kāna, “Nangay kawri mo Jeho a mangyangay so talna?”

Inatbay ni Jeho a kāna, “Maypāngo a myan talna an nāw dan tabo kapagdāyaw dyirad didyosen kan kapanolib a tongtongen ni ānang mo a si Jesebel?”

23 Nayweswes si Joram a nayyayo, as inngēngey na di Ahasyas a kāna, “Kapanglipot nyaya mo Ahasyas!”

24 Do dāwri, pinalang ni Jeho do tābo kayit na a inpalka iyaw dāwaw no bai na. Naipana na do payawanaw no pakoh na saw ni Joram. Iyaw dāwaw no bai, ki nayhawos do pōso naw, kan nalba do logan naw a pachigobat. 25 Binata ni Jeho di Bidkar a opisyal na a kāna, “Gagnaten mo kan ipoha mo do tanaw a dyira ni simna Nabot a Jesreelita. Nakmen mo an maypāngo a imo kan yaken, ki nachisakay ta do loganaw a pachigobat do dichodan ni Ahab a āmang na do nakaibaheyaw sya ni ĀPO so nyaya padto maynamot dya a kāna, 26 ‘Kakoyab, naboya ko raya naw ni Nabot, kan raya daw no pōtot na saw a mahahakay. Syirtwen ko a ipabāyad konchi dyimo do dyaya a tana,’ binata ni ĀPO. Dawa sichangori, gagnaten mo iya kan ipoha mo do dawri a tana sigon do chirin ni ĀPO.”

27 Do nakaboyaw sya ni Ahasyas a āri no Joda so naparinaw, nayyayo do rarahan naw a komwan do Bet-haggan. Linakatan Jeho iya, as inngēngey na a kāna, “Aran iya, ki dimanen nyo!” Binai da do logan naw a pachigobat do rarahanaw a somonget do Gor a masngen do Ibleam, ki nakalības a kominwan do Megiddo kan nadiman daw. 28 Inhap da no pachirawatan na saw bangkayaw a inlogan da a pinaybidi do Jerosalem. Dawriw nakaitabōnan na do aschipaw a tanem dan aāmang na do syodad ni Dabid. 29 (Do chaasa poho naw kan asa a katawen no kapagāri ni Joram a pōtot ni Ahab, si Ahasyas, ki nayparin a āri no Joda.)

30 Sinpangan na, nakarapit si Jeho do Jesreel. Do nakadāmagaw ni Jesebel so naparinaw, kinoloran naw chichiray naw, inornos naw boboh naw, kan naytatamdag do bintanaw. 31 Do nakasdep naw ni Jeho do rowanganaw, binata ni Jesebel a kāna, “Mangay kawri a mangyangay so talna, mo Simri,§ 9:31 Pinayengay ni Jesebel si Jeho di Simri a diniman na si Āri Ela do nakarahan. 1 Ār. 16:9-20 imo a mangdimdiman so āmo mo?”

32 Tinangay ni Jeho do bintanaw kan inngēngey na a kāna, “Sino machirayay dyaken? Sino kamo?” Do dāwri, dadwa mana tatdo a yonoko, nanglawong sya. 33 Binata ni Jeho a kāna, “Pagsiden nyo si Jesebel!” Dawa, pinagsid da, kan naiparparsyak kadwanaw a raya na do dyindyinaw kan dyirad kabalyowaw, as pinalasalasag ni Jeho bangkay naw do logan naw a pachigobat.

34 Sinpangan na, somindep si Jeho do palasyo a komninan kan mininom. Katayoka na, binata na a kāna, “Hapen nyo paw nya nailonod a mabakes, kan itābon nyo. Ta iya, ki pōtot a mabakes no āri.” 35 Ki do nakaiyangay daw sya a mangitābon, abaw nachichwasan da an dya bangabanga naw, kokod naw kan kakamay na saw. 36 Naybidi sa kan inbahey da di Jeho, as binata na a kāna, “Nyayaw chirin ni ĀPO a inchirin na do pachirawatan na a si Elyas a Tisbita a kāna, ‘Do tana a Jesreel, kanen danchi no chito asyasi ni Jesebel. 37 Iyaw nabidin a bangkay ni Jesebel, ki akma anchiw tachi a maiwarsi do sākop no Jesreel, tan abonchiw aran asa a mangibahey sya a “Iyaw nya si Jesebel!” ’ ”