11
Ngode Datagaliwabe mana walia haga kirali holebirago ogo
1 Ani languwa ira kanogo mbira ale magi manda biagane gambe homane luni ale ngialu howa lalu, Ngode Datagaliwabenaga andabi lomabu delagane dabubi magi ogobi lalu manda bialu wali agali anda ogoni tamuha lotu lalu karu daga lalu bule pu.✡ Dag 35.5, Ese 40.3, Seg 2.1-2, Mo 21.15 2 Ani bialu howa Ngode Datagaliwabenaga anda haneruha magi ogobi lalu manda nabibe. Irane wali agali Ngode Datagaliwabe mitangi nabiaga karu hane uruni tihondo mini nga. Wali agali uruni tigua Ngode Datagaliwabenaga Tano Loma Bia Hene ngagoriani ege pira mariani kira (42) hengedalu holebira.✡ Ese 40.17-20, Dan 8.10, Lg 21.24, Mo 12.6, 13.5 3 I̱na i̱naga walia haga kirali libugua dara howa walia holenaga aga karulalu howa Ngode Datagaliwabe mana horo daosini mbira handari kirani pira waragariani (1,260) lamule pelo, Pudaba, lolebero, laya.✡ Mo 12.6, 19.10, 20.4
4 Walia haga kirali ogonilabo libu ira olibe kirabi lamu hale irane kirabi ka. Libu dindi bibahendenaga Anduane Homogo kagoria heyu ka.✡ Yar 11.16, Seg 4.11-14 5 Mbiralime libu bole biyagua libunaga ne harigaha howa ira hungu tagira ibiragome libunaga waitigi hararu homelo baga. Ogonidagua biaganego mbiralime libu bole biyagua ogoni ibu homelo bolebira.✡ LBM 10.2, 2 Sml 22.9, 2 Kin 1.10-12, Iba 97.3, Yar 5.14, Hos 6.5 6 Libugua Ngode Datagaliwabe mana lamialu howa dalu naibilo hari daligaha panga payulene hongo yu ka. Libugua iba dugua tagi hararu mo darama bia helolenenaga hongobi wali agali dindini karu homolene tara tarame boa birangi bolenenaga hongobi yu ka.✡ Har 7.17-19, 1 Sml 4.8, 1 Kin 17.1
7 Libugua Ngode Datagaliwabe mana lamiai kagola nogo gabua gibi mbirame dindi uli ko dama dege dariba ho ngagoha howa tagira ibalu libu baba wai bulebira. Nogo gabua gibi ogonime wayali halu libu homelo bolebira.✡ Dan 7.7, 7.21, Seg 14.2, Lg 13.32, Mo 9.2, 12.17, 13.1, 13.5-7, 13.11, 17.8 8 Ani baragola libunaga tingini tano timbuni biagonaga hamani libunaga Anduane Homogo ira bangani ba para hayagoria ngelolebira. Tano ogoninaga mini bi manane lalu Sodomobi Iyibibi labehe nga.✡ Ais 1.9-10, Lg 13.34, Hi 13.12, Mo 14.8, 18.10, 18.24 9 Horo tebiru howa manegonaga bu̱ lowa wali agali dindi tara tarani bu karumebi hameigini tara tara bu karumebi bi tara tara laga karumebi tingini tara tara karumebi libunaga tingini handaga bialu, Hora holene nawi, lolebira. 10 Libu homaragola dindi wali agali biarume turu ho holebira. Ngode Datagaliwabe mana latagi haga kirali ogoni labome wali agali bibahendeore dindini bu heagoria tandaga nolene mo ibira hayago ai homayagonaga turu halu tigua mali lialu daweru halu mbirale mbirale bame migimigi bialu holebira.✡ Mo 12.12, 13.8, 16.10 11 Ani biyagola horo tebiru howa manego bu̱ lowa holenenaga bu he̱ mulene Ngode Datagaliwabeha howa ibalu libuha anda pelayagola libu heyu hene. Heyu heago handayaru ti bibahendeme gi taraore haya.✡ Ese 37.5-14, Mo 11.9 12 Ani biyagola dahuliya andaga howa bi dalimu ladali hayuago Ngode Datagaliwabe mana latagi haga kirali biago labome hale halu hebiria, Ogoria ibidaba, layuago hale haya. Ani hale halu libu waitigi hayarume handalu hearia libu dahuliya andaga beralibaha biatago halu iraga hayaria hendene.✡ 2 Kin 2.1, 2.5-7, 2.11, Ais 14.13, Ab 1.9, Mo 12.5 13 Ani iraga hayaore dumbirumbi timbuni biyagola tano pi halu tu wuwa pinigo bo poda paya bialu wali agali daosini karia (7,000) bo paya biai haya. Wali agali maru hearume ti gi taraore howa Ngode Datagaliwabe gibiore dahuliya andaga kagonaga mini yaraga haya.✡ Mo 6.12, 8.5, 14.7, 16.9, 16.18
14 Hiriribi mende biago biai hayago ai tebonego áyu ogoni dege ibulebira.✡ Mo 8.13, 9.12, 15.1
Mbelo biguli kanego pu lenego ogo
15 Dahuliyali kanegome ibunaga mbelo biguli pu layagola dahuliya andaga howa bi dewa dalimu lalu ogodagua layua, Wali agali dindi bibahendeni karu haru hagimbu bulene hongo inanaga Anduane Homogohabi ibunaga Mbirali Dabo helenego kagohabi ngago ibugua haru ha dege bidane ha ho wiaabobo holebira, lalu layuago hale haru.✡ Har 15.18, Iba 10.16, Ais 27.13, Dan 2.44, 7.14, 7.27, Oba 21, Mo 10.7, 12.10, 19.6 16 Ani leagola handalu hewaria dahuliyali haru haga pira kirani mariali (24) tinaga haru haga biragane dagiani Ngode Datagaliwabe buhayagi wiagoria biraga biaru tini bulu palu ibira howa Ngode Datagaliwabe mini yaraga halu✡ Mo 4.4, 4.10, 5.8, 19.4 17 lalu,✡ Mo 1.4, 1.8, 4.8, 15.3, 16.5, 19.6
Anduane Homogo Ngode Datagaliwabe Hongo Haiheore í̠ bamba henego áyubi kegoni.
Í̠na í̠naga hongo holene yuwa
haru holene tenialu kegonaga ina ka̱i̱ larama.
18 Í̠naga keba holene horobi✡ Iba 2.1, 2.5, 46.6, 110.5, 115.13, Dan 7.9-10, Lm 2.5, Mo 6.10, 10.7, 13.10, 18.6, 19.5, 20.11-13
homeneru mo daba ki bulene horobi íbu nga.
Ani ngago hondowa wali agali Ngode Datagaliwabe mitangi nabiaga karume keba taraore to̱laihe ka.
Í̠naga biabe bialu mana latagi haga karubi
í̠naga wali agali emene timbuni ta nabi bibahende í̠naga mini yaraga halu karubi
tihondo emena mulene horo áyu íbu ngagoni.
Wali agali dindi bo poda paya bialu hayaru tinaga bo paya bulene horo áyu íbu ngagoni,
laya.
19 Dahuliya andagani Anduane Homogonaga anda dugua ho wiagola Ngode Datagaliwabenaga Bi Habo Nalolene Mbogoyi wiago handabehe wia. Ani bialu hari daba migimege lalubi hari kilikulu lagalaga bialubi dumbirumbi bialubi dalu dindi guni timbuni ibira halu bigi biya.✡ Hi 9.4, Mo 8.5, 15.5, 15.8, 16.18, 16.21
✡11:1: Dag 35.5, Ese 40.3, Seg 2.1-2, Mo 21.15
✡11:2: Ese 40.17-20, Dan 8.10, Lg 21.24, Mo 12.6, 13.5
✡11:5: LBM 10.2, 2 Sml 22.9, 2 Kin 1.10-12, Iba 97.3, Yar 5.14, Hos 6.5
✡11:6: Har 7.17-19, 1 Sml 4.8, 1 Kin 17.1
✡11:7: Dan 7.7, 7.21, Seg 14.2, Lg 13.32, Mo 9.2, 12.17, 13.1, 13.5-7, 13.11, 17.8
✡11:8: Ais 1.9-10, Lg 13.34, Hi 13.12, Mo 14.8, 18.10, 18.24
✡11:12: 2 Kin 2.1, 2.5-7, 2.11, Ais 14.13, Ab 1.9, Mo 12.5
✡11:13: Mo 6.12, 8.5, 14.7, 16.9, 16.18
✡11:15: Har 15.18, Iba 10.16, Ais 27.13, Dan 2.44, 7.14, 7.27, Oba 21, Mo 10.7, 12.10, 19.6
✡11:16: Mo 4.4, 4.10, 5.8, 19.4
✡11:17: Mo 1.4, 1.8, 4.8, 15.3, 16.5, 19.6
✡11:18: Iba 2.1, 2.5, 46.6, 110.5, 115.13, Dan 7.9-10, Lm 2.5, Mo 6.10, 10.7, 13.10, 18.6, 19.5, 20.11-13
✡11:19: Hi 9.4, Mo 8.5, 15.5, 15.8, 16.18, 16.21