115
Ritonõpo nymyry eahmatoko
1 Oya rokene, Ritonõpo yna Esemy, oya rokene,
yna a pyra, “Kure mase,” ãko ynanase eremiãko,
yna pyno oehtoh anamonohpyra oexiryke.
2 Oty katohme imehnõ nonory põkõ ynara ekaropõko
yna a: “Otoko hnae Ritonõpo Oesẽkomo?”
3 Ynara ezuhnõko ynanase: “Ritonõpo kapu ao mana;
tyriry se toehtoh rĩko mana.
4 Imehnõ nonory põkõ ritõ panõ parata risẽme mã
kehko, uuru risẽme roropa,
ahno nyrityãme rokẽ mã kehko.
5 Ĩtary nae mã kehko repe,
yrome sekere kara toh mana.
Enuru nae roropa mã kehko repe,
yrome onetopyra mã toto.
6 Typanare mã kehko repe, yrome onetara mã toto.
Eunary nae roropa mã kehko repe,
yrome onypohpyra mã toto.
7 Tomahke mã kehko, yrome anapoipyra mã toto.
Ipupuru tõ nae repe, yrome ytoytopyra mã toto.
Esenarykõ ae omi tũtara mana ipunaka.
8 Ah mokaro tynyrityã sã,
tyneponãmarykõ sã nexĩ toto:
tyrihpõkomo te, tyneponãmarykõ eahmananõ roropa!”
9 Izyraeu tomo, Ritonõpo enetupuhtoko, Oesẽkomo!
Ãkorehmanekõme mã ynororo, oewomanekõme roropa.
10 Ritonõpo enetupuhtoko, imaro oturuketomo!
Ãkorehmanekõme mã ynororo, oewomanekõme roropa.
11 Ritonõpo enetupuhtoko, eahmananomo emero.
Ãkorehmanekõme mã ynororo, oewomanekõme roropa.
12 Wenikehpyra Ritonõpo mana kypoko xine,
kure rokẽ kyritorỹko mana;
kure rokẽ Izyraeu tõ rĩko mana,
Ritonõpo maro oturuketõ roropa emero.
13 Imehxo Ritonõpo rinanõ mã, kure mokaro rĩko
roropa Ritonõpo mana, tuisamehxo exiketomo,
ime pyra exiketõ roropa.
14 Typoenõke tuhke oriporykõ se ase Ritonõpo
Kuesẽkomo a, amarokomo, apakomotyã roropa.
15 Kure rokẽ oriporykõ se ase Ritonõpo a,
kapu rihpõme mana, sero nono rihpõme roropa!
16 Kapu tõ Ritonõpo esaryme mana,
ynoro rokẽ Esẽme mana,
yrome sero nono tokarose eya ahno a kuesarykõme.
17 Aorihtyã ekepyry tyhtose ahtao mynyhme ehtoh
pona Ritonõpo Kuesẽkõ oneahmara mana.
18 Yrome kymarokomo, isene ro exiketomo:
“Kure mase, Ritonõpo,” ãko sytatose seromaroro,
jũme roropa rahkene.
“Kure mase, Ritonõpo,” kahtoko!