116
Typynanohse Ritonõpo a orihpyra ehtohme
1 Ritonõpo Jesẽ pyno ase jomiry etaryke eya;
jotururu eya etãko mana.
2 Jomiry etãko mana tykohmaryhtao ya
jakorehmatohme.
3 Jorihmapotoh jomye nexiase ameke pyra.
Tapuruse exiase jerehtoh ke jorikyry zuno jexiryke,
enaromỹke exiase torẽtyke roropa ipunaka.
4 Mame Ritonõpo tykohmase ya:
“Ajohpame sã kypynanohko, Ritonõpo,
orihpyra jehtohme!”
5 Kure Ritonõpo mana;
kypynanopyrykõ eya anamonohpyra mana.
Kypynanohtorỹko Kuesẽkõ mana.
6 Osewomasaromepyra exiketõ ewomãko mana.
Orihsasaka jahtao typynanohse exiase eya.
7 Torẽtyke pyra exiko ipunaka, ãko ase ya ukurohtao,
Ritonõpo Jesemy onenetupuhkehpyra exiko,
kure rokẽ tyrise jexiryke eya!
8 Ritonõpo a typynanohse ywy jorikyryino,
yxity tõ totypohkapose eya
yporemãkapopyra roropa nexiase.
9 Morara exiryke ytoytõko ase Ritonõpo neneryme,
isene exiketõ rãnao.
10 Onenetupuhkehpyra exiase ynara tykase jahtao ro:
“Takurihmose ywy ipunaka.”
11 Enaromỹke exiase ahtao
ynara tykase ywy:
“Ahno emero ajohpe rokẽ mã toto.”
12 Oty ekarõko ha ynekaroryme Ritonõpo Jesemy a kure rokẽ tyrise jexiryke eya?
13 Uwa eukuru jehnahpyry kurã enehnõko ase
ynekaroryme Jesemy a, “Kure mase,” katohme eya,
typynanohse jexiryke eya.
14 Ipoetory tõ oximõmãkõ rãnao ynekarory
ekarõko ase eya, jomihpyry ae ro.
15 Sam ãko Ritonõpo mana typoetory poko
aorikyry eneryhtao eya!
16 Opoetoryme ase, Ritonõpo; õmiry omipona ase,
õmiry omipona aja ehtopõpyry saaro.
Typynanohse exiase oya orihpyra jehtohme.
17 “Kure mase,” ãko ase ynekaroryme oya,
jotururu ekarõko ase roropa oya.
18-19 Oximõme opoetory tõ ahtao emero, zara tõ po,
Atapyĩ Kurã tao, Jerusarẽ po,
ynekarory ekarõko ase oya, jomihpyry ae ro.
“Kure mase, Ritonõpo,” kahtoko!