102
Etuarimakety otururu Ritonõpo a
Tapotũkehse ahtao.
1 Ritonõpo, jotururu oya etako,
otato exiko okohmaryhtao ya jakorehmatohme!
2 Otonẽpyra exiko ywinoino,
popyra ehtoh toehse ahtao ya.
Jomiry etako okohmaryhtao ya, kuezuhko axiny.
3 Isene jehtoh osenepyra exĩko mana, orexĩto samo,
oxirohnõko ase, upũ zahnõko sã mana apoto aõ samo.
4 Tapotũkehse ywy onahpoty sã ase tysahkase ahtao,
tytũtũmase ahtao; omise pyra ase ipunaka.
5 Pusuh ãko ase opore;
ipihpyryme rokẽ ase zehpo maro.
6 Torõ sã ase patãpo po, ahno esao pyra,
suhsuku samo tapyĩpo tao.
7 Nyhsaromepyra ase;
torõ toiroro sã ase tapyi mypatarãnao.
8 Jeunopyry poko kohmãnõko jepetõkara mana;
jesety esehtõko ypoihtonanõ mã toto
imehnõ pona popyra ehtoh enehporyhtao eya xine.
9-10 Zehnohxo oexiryke oruno ynapyryme toehse
mana, yxity zoximãko roropa jokuru maro.
Kuapoiase, kuemase roropa jarãnaka.
11 Isene jehtoh jerutume sã mana kohmãsasaka ahtao; apotũkehnõko ase onahpoty anoryry sã rokene.
12 Yrome omoro, Ritonõpo Jesemy, jũme tuisame mase; imeĩpo yna pakomotyã tonuruse ahtao, opoko osenetupuhnõko mã toto.
13 Owõnõko mase, Jerusarẽ pyno exĩko mase;
Ipynanohtoh toehse mana,
seromaroro ipynanohtoh tõmehse rahkene.
14 Ipyno opoetory tõ mana, moro pata tonahkase ahtao ro; ipoko aenupunaryke osenetupuhnõko mã toto typahse nono pona ahtao ro.
15 Kuesẽkõ zuno exĩko emero nonory põkõ mã toto;
ijamitunuru zuno exĩko ahno tuisary tõ mana
emero porehme sero nono po.
16 Jerusarẽ ripitory ropa ahtao Ritonõpo a,
imehxo toexiry enepõko mana.
17 Typoetory tõ irumekatyã omiry etãko mana.
Otato exĩko mana, toto otururu etãko.
18 Morohne imeroko kypakomotyãkõ zuaro ehtohme
Ritonõpo Kuesẽkõ nyrihpyry poko, mokaro enurupyra ro exiketomo Ritonõpo eahmatohme!
19 Tosary kurã poe, kaino kapu poe Kuesẽkõ tõsenuhmase; kapu poe sero nono tonese,
20 tapuruse exiketõ pusuhkatoh totase, tapiakase aexityã orihtohme tymyhpokase ropa eya.
21 Morara exiryke Ritonõpo Kuesẽkõ
toahmasẽme exĩko mana Jerusarẽ po,
moroto imehxo aexiry ekarõko mã toto,
22 imeimehnõ nonory põkõ oximomyryhtao
tuisa tõ maro mokyro eahmatohme.
23 Poetome ro ase, yrome tyjamihkehkapose ywy
Ritonõpo a isene jehtoh enahsasaka tyripose eya.
24 Ritonõpo Jesemy jũme isene exikehpyra mase,
jaropyra exiko seromaroro,
tamuhpõme exipyra ro jahtao!
25 Pake ahtao sero nono tyrise oya,
oemary ke kapu tyrise roropa oya.
26 Sero nono kapu roropa enahnõko mã kehko,
yrome omoro jũme isene exikehpyra exĩko mase.
Sero nono kapu roropa atahnikaketyme sã mã kehko, upo samo.
Mokarohne myakamãko mase upo myakãmary samo, typahsẽme exĩko mã kehko.
27 Yrome omoro Ritonõpo jũme etyorõmara mase, isene oehtoh jumãme mana.
28 Yna poenõ kure rokẽ exĩko mã toto torẽtyke
pyra. Ipoenõ roropa ipakomotyã roropa towomasẽme exĩko mã toto oya, jũme rahkene.