103
Kypyno xine Ritonõpo ehtoh poko
Tawi nymerohpyry.
1 Ritonõpo Jesemy, kure mase ipunaka!
Ukurohtao oeahmãko ase yjamitunuru ke porehme!
2 Oeahmãko ase, Ritonõpo, yjamitunuru ke,
onyrityã kurã poko ya wenikehpyra ase!
3 Yyrypyry tõ korokãko mana emero,
kure pyra jehtoh kurãkãko roropa mana;
4 ypynanohnõko mana orihpyra jehtohme,
kure rokẽ jyrĩko mana ypyno toexiryke,
juãnohpyra roropa mana.
5 Inyriry ya yzamaro mana kure rokẽ exiryke,
jamihme jyrĩko ropa mana nuasemã sã jehtohme,
piano sã jehtohme.
6 Zae rokẽ kuapiakatorỹko Ritonõpo mana,
irohmanohpotyã akorehmãko mana,
toto ewomãko mana.
7 Tyriry se toehtoh tonepose Moeze a,
tõsenetupuhtoh tonõ roropa; tynyrityã tyjamitunuru ke tonepose Izyraeu tomo a.
8 Ritonõpo kure mana, kuãnopyrykõ se pyra mana,
kure kyrirykõ se mana, axĩ pyra zekĩtapanõko mana
kypyno xine toexiryke.
9 Axĩtao rokẽ kupokatorỹko mana,
jũme pyra kyzehno xine exĩko mana.
10 Kuãnohpyra xine Ritonõpo mana
kynyrirykõ emetakame,
kyyrypyrykõ onepehmara mana popyra
kuehtohkõ ke, epehpyryme.
11 Kapu kae exiry sã sero nono epoe,
moro sã mã kypyno xine Ritonõpo ehtopo,
tõmiry omipona se exiketomo a.
12 Moe xixi tũtatoh wino mana xixi omõtoh poe,
moro moe ehtoh sã kywinoino xine
kyyrypyrykõ apiakãko Ritonõpo mana.
13 Poetohti tõ zũ typoenõ pyno ehtoh sã
kypyno xine Kuesẽkõ mana, aomipona se exiketomo.
14 Ynara exiryke, kynyrihpyrykõ waro mana;
nonome kuehtohkõ poko wenikehpyra mã ynororo.
15 Isene kuehtohkõ onahpoty sã mana;
ahtãko mana ekutãko roropa mana ona po.
16 Mame tyryrykane tyryry ãko mana.
Moro ekuru tonahsẽme exĩko;
jũme osenepyra ropa exĩko mana.
17 Yrome kypyno xine Ritonõpo Kuesẽkõ ehtoh
jũme mana, tosẽkõme enetupuhnanomo a, kure
toehtoh enepõko mana kypoenõkõ poenomo a,
18 tynetapohpyry poko ỹme exiketomo a,
inyripohpyry omipona anamonohpyra exiketomo a.
19 Ritonõpo Kuesẽkomo a tuisamehxo
toehtoh apõ tyrise tosao kapu ao; tuisa konõtome mana, emero esẽme rahkene.
20 Ritonõpo eahmatoko, inenyohtyã jamihme
exiketomo, orẽpyra exiketomo, aomiry
etananomo, inyripohpyry omipona exiketomo!
21 Kuesẽkõ eahmatoko
inenyohtyã emero kapuaõkomo,
ipoetory tõ emero, tyriry se Ritonõpo ehtoh omipona exiketomo!
22 Ritonõpo eahmatoko inyrityã emero,
emero osa po, tuisame ynororo ehtoh po.
Oeahmãko ase, Ritonõpo Jesemy,
yjamitunuru ke porehme!