1 Ritonõpo, Jesẽme mase; oẽpataka jytory sehxo hano.

Opoko penetãko ase amaro jehtohme;

tutunazehnase exikety samo,

2 Oenery se ase Atapyĩ tao;

jamihmehxo oehtoh enery se ase,

saeremehxo oehtoh roropa enery se ase.

3 Isene yna ehtoh motye kure yna pyno oehtoh mana.

Naeroro oeahmãko ase. “Kure mase,” ãko ase.

4 Isene ro jahtao kure oehtoh ekarõko ase;

jemary anỹnõko ase oeahmaryme.

5 Kure jyriry oya tonahsẽ tomepore sã ya mana;

tuesapare sã ase ukurohtao,

morara exiryke tãkye eremiãko ase oeahmaryme.

6 Tohrame jahtao, wenikehpyra ase opoko.

Osenetupuhnõko ase opoko koko ahtao, ẽmepyry pona

7 jakorehmakehpyra oexiryke.

Ãporiry jerutumã ao eremiãko ase jatãkyemaryme.

8 Orumekara ase, janỹnõko mase xikihme

9 Jetapary se exiketõ osenahkãko mã toto,

ytõko mã toto aorihtyã esaka.

10 Totapasẽme exĩko mã toto etonatoh po,

ekepyry tõ õnõko mã onokyro tomo.

11 Morararo tuisa atãkyemãko mana Ritonõpo poko,

Ynara kananomo: “Takorehmase jahtao Ritonõpo a

kananõ tãkye exĩko mana.

Yrome ajohpe exiketõ mynyhme rokẽ exĩko mã toto.