62
Ritonõpo rokene
Tawi nymerohpyry, inekarohpyry eremiaketõ tuisary a.
1 Ritonõpo eraximaryme torẽtyke pyra exĩko ase;
ynoro rokẽ ypynanohnõko mana.
2 Ynoro rokẽ jewomãko mana, ypynanohnõko mana;
jewomaneme mana, jũme yporemãkapopyra mã toto.
3 Otãto ise ro matou õsetaparykõ poko ymaro,
jamihme pyra exikety, apuru pakato samo,
epukasasaka exikety samo?
4 Tuisame pyra jyripory se rokẽ matose;
ajohpe oexirykõ se matose.
Kurã sã jekarõko matose õmirykõ ke,
yrome okurohtao xine popyra jyripõko matose.
5 Torẽtyke pyra jehtoh oehnõko Ritonõpo poe,
naeroro ynoro rokẽ eraximãko ase kure jyritohme.
6 Ynoro rokẽ jewomãko mana, ypynanohnõko mana;
jewomaneme roropa mana,
jũme yporemãkara exĩko mã toto.
7 Ritonõpo a typynanohse ywy,
ipoe tuisame toehse ywy;
ynoro rokẽ jewomaneme jamihme mana,
jesary kurãme mana.
8 Wekyry tomo, Kuesẽkõ onenetupuhkehpyra ehtoko!
Osekarotoko eya, Kuewomanekõme ynororo exiryke,
kuesarykõ kurano.
9 Ahno tomo, tymõkomokẽkara roropa,
imehxo exiketõ roropa, otyme kure sytatou?
Puu katoh sã rokẽ sytatose.
Omoxinety kuhtoh po kuahtao xine
zohzohme sã kuexirykomo, puu katoh sã rokene.
10 Imehnõ onyryhmara ehtoko,
imõkomorykõ onematonanohpyra ehtoko.
Omõkomory itamurume toehse ahtao,
oyamene se xine pyra ehtoko.
11 Ynara tykase Ritonõpo ynetaryme:
“Ywy ro rokẽ jamihme ase,
12 ywy ro rokẽ opyno xine ase roropa.”
Naeroro omoro, Ritonõpo, yna epehmãko mase
ynanyrihpyry emetakame.