64
Ekaropotoh osewomapotohme
Tawi nymerohpyry ekarotohme eremiaketõ tuisary a.
1 Ritonõpo, jotururu etako.
Popyra ehtoh toehse ya ahtao!
Kypynanohko yzehno exiketõ zuno jexiryke.
2 Kuewomako popyra exiketõ osenetupuhtoh winoino;
kypynanohko mokaro ajoajohpãkõ winoino.
3 Tunurukõ aehtõko sã mã toto
rato pohsuimã aehtory samo,
aomirykõ pyrou sã mana typohke urari ke
ahpahpyry samo.
4 Axĩ mã toto ajohpe ehtoh ekarory poko,
imehnõ hxirory poko,
kurãkõ ryhmãko mã toto omi xihpyry ke.
5 Atakorehmãko mã toto popyra ehtoh ritohme;
oturũko mã toto imehnõ apoitoh riry poko tyya xine,
zonẽnõko mã toto osenepyra toto ehtohme.
6 Atamorepãko mã toto popyra ehtoh ritoh poko,
mame ynara ãko: “Tuaro toehse yna imehnõ
ryhmatoh poko, yna onenepyra tuisa tõ ehtohme,”
ãko mã toh repe.
Tupime enetuputyry mana ahno osenetuputyry
ikurohtao xine.
7 Yrome typyre ekomãko Ritonõpo mana toto pona, mõtoino rokẽ tapurosẽme exĩko mã toto.
8 Toto enahkãko Ritonõpo mana aomirykõ pokoino;
mokaro eneryhtao imehnomo a, osenuruhkãko mã toto.
9 Ahno emero enaromỹke exĩko;
Ritonõpo nyrityã poko oturũko mã toto,
osenetupuhnõko mã toto
inyriry tõ poko tyjamitunuru ke.
10 Zae ehtoh poko exiketõ atãkyemãko mã toto
Ritonõpo nyrityã poko; imaro osewomãko mã toto.
Emero aomiry omipona exiketõ
Ritonõpo eahmãko mã toto.