18
Tawi, tuisamehxo ehtoh poko
(2 Samueu 22.2-51)
Sero saumu tymerose Tawi a Ritonõpo eahmatohme typynanohse ahtao Sauu tõ wino.
1 Ritonõpo Jesemy, opyno ase ipunaka!
Omoro mase jewomaneme.
2 Ritonõpo ytopũme konõto nase, jeraseme nase, ytapyĩ jamihmano.
Ypynanohneme roropa nase, imaro jexiryke
yporemãkasaromepyra jepetõkara mana.
Ritonõpo Jesemy jewomãko nase
tõsewomatohke jehtohme;
ytapyĩme nase, imaro enaromyra ase.
3 Ritonõpo kohmãko ywy jakorehmatohme;
ypynanohnõko mana yporemãkara
jepetõkara ehtohme.
Kuesẽkõ seahmatone!
4 Tapurupose exiase, joorihmatoh ke;
zue sã konõto, yyryhmatoh nexiase,
typoremãkapose ywy.
5 Orihnõko ase tarãpa ke apoihpyry samo.
Emynyhmãko ase yronymyryme
jorikyry se pyra jexiryke.
6 Typoremãse jahtao, tykohtase ywy Ritonõpo a:
“Kuakorehmako myhene!” ase eya.
Tytapyĩ tae kapu ao jomiry totase eya,
yxitary etase rahkene.
7 Morarame nono tykytyky tykase,
kywyh tykase roropa, ypy tõ apõ kywyh tykase.
Tykytyky tykase roropa, tãtaekymase Ritonõpo exiryke.
8 Eunary ae orexĩto tutũtase,
ĩtae roropa apoto tutũtase oahmame pyra.
9 Kapu totapuruhmakase eya, tyhtose ynororo,
akurũ xinukutumã maro, ipupuru zopikoxi.
10 Taporihke exikety pona tõtyrise toytotohme,
tõnuhse axiny tyryrykane aporiry tõ maro.
11 Toxiõtose ynororo akurũ konõto ke,
akurũ xinukutumã ke; konopo itamurume zomye.
12 Ikarany konopoimo maro topuxikiri panono,
tũtãko nenenehkane poe mokyro ẽpataka,
akurũ xinukutumãkõ kuroko roropa.
13 Morarame konomeru konõto tyrise Ritonõpo a;
tõmiry totapose Ritonõpo Imehxo Exikety a.
14 Pyrou tokomase eya, sapararahme topetõkara taropose toto eya;
nenenehkane ke tonepanohpose toto.
15 Oepetõkara tupokase ahtao oya, Ritonõpo,
zehno oexiryke konomeru tonehpose oya;
morara ahtao tuna kurohtaonõpo tõsenese tãpaise,
sero nono apaisẽ tõsenepose.
16 Kaino Ritonõpo a tomary ke tapoise ywy;
tanỹse ywy eya zue konõto kuae.
17 Ritonõpo a typynanohse ywy jepetõkara
jamihme exiketõ poe, yzehno exiketõ poe.
Mokaro emero ymotye jamihme toh nexiase.
18 Jetuarimaryhtao tõsetapase ymaro toto;
yrome Ritonõpo a towomase ywy.
19 Tonehse ywy eya, osa konõto pona,
mame ypynanopyase ypyno toexiryke.
20 Kurãkõ ke jepehmãko Ritonõpo mana
zae ehtoh poko rokẽ jexiryke;
kure rokẽ jyrĩko mana,
azahkuru ehtoh poko pyra jexiryke.
21 Ise Ritonõpo ehtoh tyrise ya, ynara onyripyra exiase:
Kuesẽkõ onurumekara exiase.
22 Inyripohpyry omipona toehse ywy, emero porehme.
Eramara ropa exiase aomipona pyra jehtoh poko.
23 Jyhxiropyra imehnõ mana zae rokẽ jexiryke,
Ritonõpo neneryme yyrypyry poko pyra roropa jexiryke.
24 Naeroro kurã ke rokẽ topehmase ywy Ritonõpo a,
ajohpe pyra jexiryke, tyyrypyhpyke pyra
roropa jexiryke ineneryme.
25 Opoko amonohkara exiketomo a,
anamonohpyra mase, Ritonõpo,
zae roropa mase, zae exiketomo a.
26 Tyyrypyry poko pyra exiketomo a kure rokẽ mase,
yrome popyra exiketõ zehno mase.
27 Tyamene se pyra exiketõ pynanohnõko mase,
Ritonõpo, yrome tyamene se exiketõ rĩko mase
tuisame pyra.
28 Omoro, Ritonõpo, saerehkaneme mase ya;
koko enahkapõko mase ya, Jesemy.
29 Yjamitunuru mekaroase ya jepetõkara etypohkapotohme.
Ymaro oexiryke toto patary apuru kuroko
pyhseky ãko ase.
30 Onyriry, Ritonõpo, kure rokẽ mana.
Õmihpyry omipona mase, anamonohpyra mase.
Ewomaneme mase, towomaneme ose exiketõ ewomaneme mase.
31 Ritonõpo rokẽ Kuesẽkõme mana, imepỹ pyra.
Ynoro rokẽ kuewomanekõme mana, topuimome.
32 Ritonõpo mana yjamihtanohneme,
emero rokẽ poro jytoryhtao jewomãko mana.
33 Osetapara upupuru rĩko mana
kapau pupuru samo, ypy tõ po jewomãko mana.
34 Osetapary poko jamorepãko mana taky tũporemã,
jamihmehxo exikety kyryry, kenãpatohme ya.
35 Jewomãko mase, Ritonõpo,
osewomatoh mekaroase ya;
typynanohse oya jexiryke, orẽpyra ase toehse.
36 Japoipopyra mexiase jepetõkara a,
epukara roropa exiase ipunaka.
37 Jepetõkara ekahmãko ase, toto amorõkãko ywy;
eramara ropa ase toto enahkatoh pona.
38 Typoremãkase toto ya, owõsaromepyra ropa toehse toto.
Nono pona toepukase toto ymyhtokoxi.
39 Yjamitunuru ekarõko mase ya etonatohme,
mokaro jetapary se exiketõ poremãkapõko
roropa mase ya.
40 Ritonõpo, opoe jepetõkara epãko mã toto,
naeroro yzehno exiketõ enahkãko ase.
41 Takorehmanekõ zupĩko toh mã repe.
Yrome toto pynanohne pyra mana.
Ritonõpo a kohtãko toh repe.
Yrome toto onezuhpyra mana.
42 Toto enahkãko ase, putoh katoh sã
exĩko mã toto, tyryrykane a putoh kane
arory samo.
Toto tũtũmãko ase ikurepato samo osema tao.
43 Typynanohse exiase oya, ahno tõ rãnaino, osetaparyhtao.
Ahno tõ tuisaryme kyriase.
Toto waro pyra exiase repe,
yrome ypoetoryme toehse mã toto.
44 Tyotyorõkõ omiry ae exiketõ oehnõko ya mã toto
jomipona se toexirykõke;
jomiry etaryhtao eya xine, omipona mã toto.
45 Tõsetapary se pyra mã toto,
enaromỹke tũtãko mã toto jamihme tosarykõ htae.
46 Isene Ritonõpo mana! “Kure mase,”
sykatone eya, Jewomaneme mana.
Imehxo Ritonõpo mana, Ypynanohne.
47 Jepetõkara poremãkãko mana,
imehnõ ahno tõ rĩko ypoetoryme,
48 ypynanohnõko mana yzehno exiketõ poe.
Omoro, Ritonõpo, orẽpyra jyrĩko mase,
yzehnotokõ poremãkaneme,
jewomãko mase yyryhmary se imehnõ ahtao.
49 Morara exiryke “Kure mase,” ãko ase.
Oeahmãko ase imeimehnõ pata tõ po.
Eremiãko ase oeahmaryme.
50 Tuisame orẽpyrahxo jyrĩko Ritonõpo mana.
Tynymenekahpyry pyno exikehpyra mana;
ywy Tawi pyno mana, ypoenomo,
ypakomotyã roropa,
jũme yna pyno exikehpyra mana.