19
Imehxo Ritonõpo ehtoh poko
Sero saumu tymerose Tawi a.
1 Kapu eneryke imehxo Ritonõpo ehtoh
enetupuhnõko ase!
Senohne emero inyrihpyryme mana.
2 Imehxo aehtoh enepõko ẽmepyry mana,
kokoro rokene,
koko roropa tuaro aehtoh enetupuhpõko mana.
3 Sekere kara inyrityã mã repe omikara roropa mana,
omi osetara ipunaka repe.
4 Yrome kapu omiry enetupuhnõko sytatose
sero nono po porehme.
Aomiry enetupuhnõko mã toto,
imehnõ pata tõ po sero nono etyhpyry po.
Kapu poko xixi esary tyrise Ritonõpo a.
5 Pytakety sã tosae tũtãko xixi mana,
tururume ytokety sã mana,
tururume toytory se ahtao.
6 Tũtãko mana kapu etyhpyry poe,
mya ytõko imepỹ etyhpyry pona;
piukah ãko mana emero pona.
7 Kure kuhse Kuesẽkõ omiry mana,
kyjamihtanohtorỹko kukurohtao xine mana.
Aomiry zae mana, naeroro enetupuhnõko sytatose,
tuaro pyra exiketõ tuarõtanohnõko mana.
8 Zae Ritonõpo nyripotyã mana,
aomipona exiketõ atãkyemãko mã toto.
Inyripotyã kure mana, kutuarõtanohtorỹko mana.
9 Tuisamehxo Kuesẽkõ enetuputyryhtao kyya xine,
zae exĩko sytatose jũme rahkene.
Zae kuapiakatorỹko Kuesẽkõ mana,
zae ehtoh waro toexiryke.
10 Uuru kurã motye kure Ritonõpo
namorepatoh mana, uuru itamurume
kure kuhse Ritonõpo omiry mana.
Morararo ano zeni anusasame ehtoh motye
anusasame Ritonõpo omiry mana.
11 Ritonõpo, õmiry etaryke ya zae ehtoh waro ase, opoetoryme;
kurãkõ apoĩko ase õmiry omipona jahtao.
12 Tupime kyya xine azahkuru kuehtohkõ
enery kyya xine.
Naeroro azahkuru jahtao yyrypyry ikorokako,
zuaro pyra jehtopo.
13 Yyrypyry poko jahtao, ikorokako
ukurohtao ipoko pyra jehtohme;
yyrypyry xihpyry namotome pyra kyriko.
Morara jahtao zae ehtoh poko rokẽ exĩko ase.
Yyrypyry poko pyra exĩko roropa ase.
14 Kuakorehmako kure rokẽ jomiry ehtohme oya,
josenetupuhtoh roropa kure ehtohme oya,
Ritonõpo, Jesemy.
Jewomaneme roropa mase, Ypynanohneme! Enara.