17
Tawi oturutopõpyry Ritonõpo a
Sero saumu tymerose Tawi a.
1 Ritonõpo Jesemy, jomiry etako,
zae ehtoh ekaropõko rokẽ hano!
Jotururu etako, kuakorehmako, josekarory etako oya,
ajohpe pyra jexiryke.
2 “Zae mase,” kary etary se ase, õmiry ya,
zae ehtoh waro oexiryke.
3 Josenetupuhtoh waro mase, jenẽko mase ukurohtao,
koko ahtao, tukuhse jahtao oya yyrypyry poko
ypenetatoh onenepyra mase.
Azamaro pyra exikety poko oturupyra ase oya,
4 imehnõ orutua kõ sã pyra ase.
Õmihpyry omipona toehse ywy,
imehnõ ryhmananõ ehtoh sã pyra ase.
5 Osema kurã ae ytokety sã, õmiry omipona ase,
azahkuru ehtoh poko pyra exiase.
6 Ritonõpo, oya oturũko ase, jezukuruke oya.
Naeroro jomiry etako, jotururu oya.
7 Ypyno oehtoh, enepoko ya, kurano.
Yna pynanohneme mase. Amaro yna ahtao
osewomãko ynanase yna poko pyra
yna zehnotokõ ehtohme.
8 Kuewomako, oenuru ewomary sã oya;
taporihke exikety typoenõ ewomary sã,
taporiry zopikoxi,
9 otonẽxi amaro, ypoko pyra popyra exiketõ ehtohme.
Yzehnotokõ jomye mã toto.
10 Imehnõ enupunara mã toto,
zurũko mã toto epyrypaketõ samo.
11 Ameke pyra jekahmãko mã toto.
Seromaroro jomye toehse mã toto
jematoh eraximãko mã toto, nono pona.
12 Reão tõ sã mã toto,
tõtonẽse jeraximãko toto yyryhmatohme.
13 Osehko, Ritonõpo, Jesemy, atatapoiko
jepetõkara maro, toto enahkatohme.
Atapemã ke kypynanohko popyra exiketõ wino.
14 Ritonõpo, kypynanohko mokaro orutua kõ wino;
sero nono po ipenetatohkõ nae mã toto emero porehme!
Zuãnohko toto etuarimatoh ke
onukurãkahpyry toto epehpyryme.
Moro etuarimatoh ipune tyriko roropa
toto poenomo wãnohtohme,
ipakomotyã etuarimatohme roropa.
15 Yrome oenẽko ase, azahkuru pyra jexiryke;
mame typakase ropa jahtao,
oẽpataka atãkyemãko ase oeneryke ya.