5
Osewomapotoh Ritonõpo a
Sero saumu tymerose Tawi a.
1 Ritonõpo, jotururu etako josenetupuhtoh roropa!
2 Tuisa konõto Jesemy, Ritonõpo, otato exiko,
kuakorehmako, ãko ase;
oya oturũko ase, yna Esemy!
3 Pakeimo ẽmepyryhtao jomiry etãko mase;
xixi tũtapitoryhtao, oturũko ase oya,
mame jezuhtoh eraximãko ase oya.
4 Omoro mase Ritonõpo, popyra ehtoh
azamaro pyra mana;
Popyra ehtoh poko exiketõ onenehpopyra mase oẽpataka.
5 Epyrypaketõ se pyra mase ipunaka.
Popyra exiketõ zehno mase emero porehme.
6 Ajohpe exiketõ enahkapõko mase,
imehnõ ryhmananõ se pyra mase ipunaka,
imehnõ enekunohnanõ roropa.
7 Yrome yna pyno oexiryke yronymyryme
omõnõko ase azarã pona Atapyĩ taka,
jesekumuru po porohnõko ase oẽpataka
oeahmãko ase Atapyĩ Kurã tao.
8 Ritonõpo, jepetõkara tuhke mã toto!
Kuakorehmako zae jehtohme,
õmiry omipona jehtohme.
Jesemary zae ehtoh poko enepoko ya
epona jytotohme.
9 Jepetõkara omiry zae pyra mana ipunaka.
Imehnõ enahkary poko rokẽ
osenetupuhnõko mã toto.
Aomirykõ kure sã mã repe, imepỹ pyrypãko.
Yrome enekunohnõko mã toto aorihmapotohme.
10 Ajohpãme sã mokaro apiakako,
toto wãnohtohme, Ritonõpo!
Osenetupuhnõko mã toto imehnõ ryhmary poko,
naeroro tyripoko toto osenahkapotohme!
Aropoko toto owinoino, tahxime õmiry omipona
pyra toexirykõke, orumekary se roropa toexirykõke.
11 Yrome amaro tõsewomary se exiketõ
tãkye exĩko mã toto, tãtãkyemarykõme eremiãko mã
toto, toto ewomãko oexiryke.
Opyno exiketõ tãkye exĩko mã toto opokoino.
12 Ritonõpo, yna Esemy, kure rokẽ mokaro rĩko mase,
õmiry omipona exiketomo,
kure oehtoh toto ewomãko mana osewomatoh samo.