4
Atakorehmapotoh Ritonõpo a
Sero saumu tymerose Tawi a.
1 Ritonõpo, Jewomane, kuezuhko jotururuhtao oya!
Etuarimãko exiase, yrome kuakorehmase.
Ypyno exiko seromaroro, jotururu oya etako!
2 Orutua komo, oty katohme orẽpyra jehtopõpyry
tyoromãko matou jyhxirotoh ke?
Oty katoh popyra ehtoh se rokẽ matou?
Oty katoh ajohpe ehtoh etãko roropa matou?
3 Wenikehpyra ehtoko:
zae ehtoh poko exiketõ tymenekase
Ritonõpo a typoetoryme toto ehtohme;
jotururu etãko mana ikohmaryhtao ya.
4 Enaromỹke ehtoko, oorypyrykõ poko exikehtoko;
mynyhme ehtoko onyhtohkõ po
õsenetupuhtohkõ waro oehtohkõme.
5 Zae onekarorykõ ekarotoko Ritonõpo a,
Oesẽkõme enetupuhtoko.
6 Imehnõ ynara ãko oya:
Kure ehtoh ekaroko yna a itamurumehxo,
Ritonõpo, nupunato yna eneko, yna pyno exiko!
7 Yrome opoko tãkye jehtoh, onekarohpyry
ya mokaro tãkye ehtoh motye mana
tykyrysã apoiry poko eya xine.
8 Ataxikãko ase torẽtyke pyra,
kure rokẽ nyhnõko ase, omoro rokẽ Ritonõpo,
jewomãko mase.