1 “Jamihme pyra sytatose, emero, kuenurutopõpyry poe ro.

Tuhke pyra jeimamyry isene sytatose,

yrome popyra ehtoh enẽko sytatose pitiko rokẽ pyra.

2 Ekuru sã sytatose ekutãko,

mame aremãnõko sã sytatose.

Jerutumã sã exikehnõko sytatose

osenepyra exĩko.

3 Ritonõpo, arypyra sã ynanase;

naeroro oty katoh yna enẽko mah?

Oty katoh jarõko mah apiakatoh taka?

4 Ahno mã, nuriame exiketyme mana,

kure nymyry ehtoh onyrisaromepyra mana.

5 Isene yna ehtoh tuhke jeimamyry waro Ritonõpo mana.

Otãto nuno isene exĩko ynanae?

Omoro, Ritonõpo, zuaro mase.

Moro tyrise oya,

onytyoromasaromepyra ynanase.

6 Yna enẽko mase, osenuhmakehko yna pona.

Yna irumekako toiroro yna ehtohme, ẽmepyry etyhpyry pona,

erohkety samo toerohtoh tõtyhkase ahtao kokonie pukuro.

7 “Wewe kure ehtoh eraximãko mana;

takohse ahtao arỹtãko ropa mana.

Ahtãko ropa mana.

8 Imity tõ xihpyryme toehse ahtao,

ãtykyry toorihse ahtao roropa nono ao,

9 ehxikaryhtao arỹtãko ropa mana,

amoriry tõ ropa mã kehko otyro arykasenã samo.

10 Yrome ahno toorihse ahtao, arypyra exĩko mana;

orihnõko exino mana,

mame otara exĩko nae?

11 “Ikuhpo tõ samo tonore toehse ahtao, tuna sã roropa tãpaise ahtao,

12 moro sã orihnõko sytatose, emero, kapu nae ro ahtao.

Nyhnõko sytatose kuorikyrykõme, jũme pakara ropa ehtohme.

13 “Ynara se hano oya:

kyriko aorihtyã tõ esaka, moroto tonẽse jehtohme, zehno pyra oehtohto ropa.

Morararo okynahtao ypoko wenikehpyra ehtoh tyripoko!

14 Toorihse ahno ahtao ẽsemãnõko ropa nae?

Yrome kurehxo ehtoh eraximãko ase, jetuarimatoh tonahse ahtao.

15 Morararo ykohmãko mase,

ywy roropa oezuhnõko ase;

tãkye exĩko mase ypoko, onyrihpyryme jexiryke.

16 Ypynanohnõko mase azahkuru pyra jehtohme,

jenepyra mase popyra ynyriry tõ ehtoh kuhtohme.

17 Yyrypyry poko wenikehnõko mase.

Ynyrihpyry xihpyry korokãko mase.

18 “Morararo ypy tõ osenahkary sã,

topu tõ esyryhmary sã roropa.

19 Topu tõ ahkary sã tuna a, nono arory sã roropa opotunety a,

moro saaro kure ehtoh eraximary ahno a enahkapõko mase.

20 Yna poremãkapõko mase, orihnõko ynanase.

Yna ẽmyty tyoro sã tyrĩko mase sero nono poe yna osekazumatohme.

21 Imũkuru tõ eahmaryhtao ahno a imehxo toto ehtoh poko,

moro waro pyra mã ynororo.

Tyhxirose toto ahtao azahkuru toehse toto exiryke,

eya onekaropyra imehnõ mana moro poko.

22 Jetũ tupũ ehtoh waro rokẽ mana,

tukurohtao sam katoh roropa, tuzenu ao.”