1 “Morohne emero enease jenuru ke;

etase roropa emero ypanary ke,

morohne emero zuaro ase.

2 Jepe tomo, asã xine ase, ime hkopyra jekarõko matose repe.

Yrome ymotye pyra matose:

emero zuaro oehtohkõ waro roropa ase.

3 Yrome jotururu se ase Ritonõpo maro, Jamihmehxo Exikety, jezuhtohme zae jehtoh poko.

4 Tuaro pyra oehtohkõ zonẽnõko matose ajohpe ehtoh ke;

Opi warõkõ sã matose kurãkõkara kurãkary warõkara samo.

5 Mynyhme rokẽ toehse awahtao xine, kurehxo exiry, tuaro oekarõko imehnõ mana!

6 “Etatoko ke jotururu,

zae jehtoh poko josenetuputyry ekarõko ase oya xine.

7 Oty katohme ajohpe oturũko matou?

Ritonõpo akorehmatohme?

Ritonõpo ewomãko matou omi zae pyra ehtoh ke?

8 Ritonõpo akorehmaneme osekarõko matou?

Mokyro ewomãko matou juize ẽpataka oturutoh tao?

9 Oenerykohtao kure ehtoh enẽko Ritonõpo nae?

Ritonõpo enekunopyry kuhnõko matou, ahno enekunopyry sã oya xine?

10 Zae pyra awahtao xine,

tokare pyra ro awahtao xine,

iirypyryme oekarotorỹko mana, oupokatorỹko roropa.

11 Imehxo aexiry enaromỹke oritorỹko mana.

Zunohxo yronymyryme exĩko matose.

12 Imehnõ amorepatoh tonõ oya xine oruno sã toiparo rokẽ mana;

toto ezuhtoh oya xine jamihme pyra mana ipunaka, orino risẽ sã rokene.

13 “Mynyhme ehtoko,

oturuxi aporo,

otara exĩko nae ya? ah nexino.

14 Osewomara toehse ywy,

jytory zuno pyra ase Ritonõpo ẽpataka,

joorikyry zuno pyra roropa ase.

15 Typenekehse ywy kure ehtoh eraximary poko,

naeroro Ritonõpo jetaparyhtao,

enetupuhnõko ro ase Jesẽme,

zae jehtoh ekarõko ase ẽpataka.

16 Otarame zuno pyra jexiryke typynanohsẽme exĩko ase, ynara exiryke:

popyra exiketõ mã ytopyra Ritonõpo ẽpataka.

17 Etatoko pahne jotururu oya xine,

otato ehtoko ãmoreparykohtao josenetuputyry poko.

18 Ezuhtoh tonõ tymenekase ya zae jehtoh poko oturutohme.

Zae jehtoh poko zuaro ase rahkene.

19 “Yrome Ritonõpo ynara karyhtao:

‘Onoky mose ro tõsezusezukuru zuno pyra hnae ymaro, apiakane ẽpataka?’

Morara ahtao mynyhme rokẽ exĩko ase,

orihnõko ase.

20 Ritonõpo, asakoro rokẽ se ase oya.

Morarame otonẽpyra ase owinoino.

21 Juãnohpyra ke exiko te,

ouno pyra kyriko enaromyra jehtohme.

22 “Ritonõpo, kykohmako apiakatoh taka

jytotohme, mame oezuhnõko ase; arypyra ahtao

oturuxi osemazuhme, mame kuezuhko.

23 Oty popyra jehtopõpyry nae?

Otãto yyrypyry tõ nae?

Oty pokoino tyhxirose ywy?

24 “Oty katohme otonẽnõko mah ywinoino?

Oty katohme oepekara sã jyhxirõko mah?

25 Ywy ase wewe ary sã rokene, tarose ahtao tyryrykane a:

oty katohme jerehnõko mah?

Onahpoty tonorẽ sã ase:

Oty katoh jekahmãko mah?

26 “Jyhxirotoh itunety sã imerõko mase.

Mame popyra jehtopõpyry poetome ro jahtao epehmapory se roropa mase ya.

27 Keti ke upupuru tõ myhnõko mase,

jesemary tõ emero enẽko mase. Yputahpyry tõ enẽko mase ynutumahpyry osema tao.

28 Naeroro osenahkãko ase wewe samo tymotase ahtao,

upo sã roropa ase nuko tomo a tonahse ahtao.