2 “Jo, tuaro exikety mã moro sã pyra ezuhnõko.

Sekere ãko rokẽ mase;

tyryrykane sã rokẽ õmiry mana.

3 Tuaro exikety toiparo rokẽ sekere kara mana.

Onezuhpyra roropa mana zuaro pyra exikety omiry ke.

4 Etako pahne, Ritonõpo zuno ahno ehtoh enahkapory se hma?

Õtururu etaryhtao imehnomo a, oturupyra exĩko mã toto Ritonõpo a.

5 Tyyrypyhpyke oexiryke sekere ãko mase moro samo.

Imehnõ enekunopyry se mase õtururu ke rokene.

6 Ohxirory se pyra ase repe;

yrome õmiry ro ohxirõko mana iirypyryme oehtoh poko.

7 “Osemazuhme aenuruhpyryme osekarõko mah?

Otarame tonuruse mexiase ypy tõ exipyra ro ahtao.

8 Ritonõpo osenetupuhtoh tonõ waro hma

tokare pyra toto ahtao ro?

Omoro rokẽ tuaro exiketyme mahno?

9 Zuaro pyra yna ehtoh waro mahno?

Yna motye senohne enetupuhnõko mah?

Zuaro oehtoh waro ynanase roropa emero.

10 Tamorepase ynanase tamuhpõme exiketomo a,

osemazuhme aenurutyamo a, enurupyra omy ahtao ro.

11 “Oemuhkehkary se Ritonõpo mana,

yrome moro se pyra mase, oty katohme?

Ipoe tõturuse yna amaro tomeseke samo.

12 Oty katohme openetatoh ekahmãko rokẽ mah?

Oty katoh yna zehno exikety sã yna enẽko mah, yna se pyra exikety samo?

13 Oty katohme Ritonõpo zehno mexino okurohtao?

Oty katohme ikerekeremãko mah?

14 “Otara ãko mah: iirypyryme pyra ahno exĩko nae Ritonõpo a?

Ahnome aenuruhpyry kure nymyry exĩko nae?

Arypyra.

15 Ritonõpo a inenyohtyã kure nymyry pyra mã toto,

kapu roropa eya kure nymyry pyra mana ineneryme.

16 Moro motye ahno popyra ehtoh nuriame,

tuna ẽnõko sã tyyrypyrykõ poko mã toto.

17 “Etako pahne, Jo, josenetupuhtoh ekarõko ase oya;

ynenehpyry ekarõko ase oya.

18 Tuaro exiketõ imehnõ amorepãko ajohpe pyra ehtoh poko, tumykõ namorepatoh tonõ poko,

19 tynonorykõ po, imehnõ nonory poe aepyhpyã pyra nexiase:

ahno pyra nexiase morotõkõ arotohme Ritonõpo winoino.

20 “Popyra exiketyme ahno ahtao, imehnõ ryhmaneme ynororo ahtao etuarimãko mana toorikyry ponãmero.

21 Panaikatõ etaryhtao oserehnõko mana;

tõsewomase osekarõko mana,

moro ae ro omato tõ oehnõko osetapase imaro.

22 Popyra ehtoh toehse ahtao typynanopyry oneraximara mana, totapary zuno mã ynororo imehnomo a.

23 Aorikyry eraximãko kurumu tõ mana, ekepyry pũ õtohme.

Toorikyry a rokẽ zuaro mana,

okynã pyra xinukutume mã exĩko eya.

24 Popyra ehtoh oepyry, aosanumatoh tonõ roropa, enaromỹke tyrĩko mana.

Iporemãkapõko mã toto tuisa konõto samo, tysoutatu tõ maro.

25 Moro sã exĩko emero osepeme se pyra ahtao Ritonõpo maro.

Tãtatapoiry se mã ynororo, Ritonõpo Jamihmehxo Exikety poremãkatohme repe.

26-27 Epyrypaketyme mã ynororo, Ritonõpo omipona pyra,

osewomãko mana osewomatoh konõto ke,

mame tururume ytõko Ritonõpo poremãkapose.

28 “Pata tõ typoremãkase mokyro popyra exikety a, tapyi tõ, irumekatyã, apoitohme tytapyĩme.

Yrome moro pata tõ tapyi tõ maro patãpome exĩko, otyro xihpyry ipapyhpyry kaetoko ehtoh samo.

29 Tymõkomoke exikety axĩtao rokẽ mana,

imõkomory enahnõko mana, emero porehme.

Jerutu roropa osenepyra exĩko sero nono po.

30 Mokyro popyra exikety, xinukutume ehtoh wino epara mana, orihnõko.

Wewe amoriry sã exĩko mana tyahse ahtao apoto ke,

ekuru tomo tyryrykane a tarosẽme exĩko.

31 Tuaro pyra exiketyme mana, ajohpe ehtoh ke tuisame toehse ahtao,

ajohpe ehtoh apoĩko mana tynyrihpyry epehpyryme.

32 Anorỹko mana tamuhpõme nymyry pyra ahtao, wewe amoriry aremamyry samo, arỹtara ropa ekurehnõko mana.

33 Uwa zoko sã exĩko mana epery ohpapyry sã exipyra ro ahtao, oriwera zoko sã roropa ekuru tõ ohpahtoh samo.

34 Popyra exiketõ typoenõke pyra exĩko mã toto,

tapyi tõ tyrise ahtao imehnõ enekunohtoh ke, moro zahnõko mã kehko apoto ke.

35 Osenetupuhnõko mã toto popyra ehtoh ritohme,

zae pyra ehtoh rĩko mã toto.

Osenetupuhkehpyra mã toto imehnõ enekunopyry poko.”