1 Hermanos, kaqaj ketaꞌmaj alaq ri unimal rutzil ukꞌuꞌx ri Dios xkikꞌut rutinamit ri Cristo e kꞌo pa taq ri luwar re Macedonia. 2 Tobꞌ rike na xa ta jubꞌiqꞌ ri kꞌax kikꞌowibꞌem, ri kiꞌkotemal kꞌo kukꞌ na jinta utaqexik. Y tobꞌ lik e nibꞌaꞌibꞌ, xikꞌow ne uwiꞌ ri xkiya che kitoꞌik ri kachbꞌiꞌil.* 1 Co. 16:1-4 3 Riꞌin kambꞌiꞌij ri xinwilo: Ri xkiyaꞌo lik pa kanimaꞌ xalax wi. Na xew ta xkiya e chirij ri kꞌo kukꞌ, ma xkiya ne uwiꞌ. 4 Lik kꞌu xebꞌelaj che kaqaya luwar chike ebꞌare jun kekitoꞌ pan rutinamit ri Dios rukꞌ wa qasaꞌn kamolik. 5 Janipa kꞌu ri qoyeꞌem riꞌoj chike na xew ta chi xkiꞌan riꞌ, ma nabꞌe ne xkiya kibꞌ puqꞌabꞌ ri Dios, kꞌa tekꞌuchiriꞌ xkiya ri kanimaꞌ chiqe riꞌoj chaꞌ jelaꞌ kakiꞌan janipa ri rajawal ukꞌuꞌx ri Dios. 6 Ruma kꞌu laꞌ hermanos, xqabꞌiꞌij che ri Tito chukꞌisa na utzaꞌm wa chak xujeq ukꞌ ralaq puwi rumolik ri qasaꞌn, ma waꞌ e kꞌutubꞌal re ri relej kꞌuꞌx alaq.

7 E lik utz ri ꞌanom ralaq che ronoje taq waꞌ: lik kꞌo kubꞌulibꞌal kꞌuꞌx alaq rukꞌ ri Dios, lik kariq alaq utzijoxik Ruchꞌaꞌtem ri Dios, yaꞌtal runaꞌoj ri Dios che alaq, alaq sakꞌaj che uꞌanik ruchak ri Dios yey lik ne kꞌax kojnaꞌ alaq; jekꞌuriꞌlaꞌ, ꞌana alaq chi utz wa jun chak re kitoꞌik ri nikꞌaj chik qa hermanos. 8 Rukꞌ waꞌ na kintajin ta che uyaꞌik jun taqanik che alaq. Ma xew xintzijoj che alaq ri kisakꞌajil ri jujun chik che kitoꞌik ri kachbꞌiꞌil, chaꞌ jelaꞌ kakꞌut alaq paqatzij wi kꞌax kenaꞌ alaq ri jujun chik hermanos. 9 Ma lik etaꞌam chi alaq ri unimal rutzil ukꞌuꞌx ri Qanimajawal Jesucristo. Rire lik bꞌeyom; na rukꞌ ta kꞌu riꞌ, ruma ri rutzil ukꞌuꞌx che alaq, xuꞌan nibꞌaꞌ che ribꞌ chaꞌ rukꞌ runibꞌaꞌil e xuya rubꞌeyomalil ri Dios che ralaq.

10 Chwi kꞌu wa qasaꞌn kamolik, kanya naꞌoj alaq puwi ri taqal che kaꞌan alaq; ma junabꞌir xjeq lo alaq umolik waꞌ yey xꞌan alaq rukꞌ ronoje kꞌuꞌx alaq. 11 Ekꞌu woꞌora kꞌisa pan alaq utzaꞌm waꞌ rukꞌ ronoje kꞌuꞌx alaq, jelaꞌ pachaꞌ ri xjeqebꞌej lo alaq uꞌanik. Yaꞌa kꞌu alaq janipa ri kachꞌij alaq uyaꞌik. 12 Ma e junoq lik karaj kaqasanik, ri Dios kukꞌul chi utz ri qasaꞌn kuyaꞌo e chirij ri kꞌo rukꞌ; ma ri Dios na kutzꞌonoj ta che jun ri na jinta rukꞌ. 13 Na kambꞌiꞌij ta waꞌ chaꞌ kakanaj kan alaq pa nibꞌaꞌil ruma ri ketoꞌ alaq jujun chik. Ma e ri karaj e chiqajujunal kꞌo qukꞌ janipa ri kajawax chiqe. 14 Woꞌora paqꞌabꞌ alaq kꞌo wi ketoꞌ alaq ri e kꞌo pa kꞌax. Taqal kꞌu che alaq kajach alaq upa ri kꞌo ukꞌ alaq chaꞌ jelaꞌ katzꞌaqatisaj alaq ri kajawax chike rike. We xopon kꞌu juna qꞌij echiriꞌ ralaq kꞌo alaq pa kꞌax, ekꞌuchiriꞌ taqal chike rike kakitoꞌ ralaq. We konoje jelaꞌ kakiꞌano, kayaꞌtaj kꞌu chike chikijujunal janipa ri kajawaxik. 15 E jelaꞌ pachaꞌ ri tzꞌibꞌital kan pa Ruchꞌaꞌtem ri Dios:

16 Xa maltiox kꞌu che ri Dios ma ukojom pa ranimaꞌ ri Tito kutoꞌ alaq jelaꞌ pachaꞌ kanꞌan riꞌin. 17 Ma xew ximbꞌiꞌij che keꞌrila alaq, na jampatana rukꞌ kiꞌkotemal xunimaj ma lik kacha ukꞌuꞌx che keꞌrila wach alaq. 18 Junam kꞌut rukꞌ ri Tito kaqataq bꞌi jun chik hermano chaꞌ karachbꞌilaj bꞌi. Waꞌ e jun lik chom ruchꞌaꞌtibꞌexik kaꞌan pa taq riglesias ruma ri utzilaj chak uꞌanom che utzijoxik ri Utzilaj Tzij. 19 Na xew tane waꞌ, ma wa jun hermano chaꞌom kuma riglesias re kojrachbꞌilaj pa taq ri kojꞌek wi che umolik y che ujachik waꞌ wa qasaꞌn. Waꞌ wa chak oj kꞌo wi e re yakbꞌal uqꞌij ri Qanimajawal Jesucristo y e kꞌutubꞌal re ri relej qakꞌuꞌx. 20 Ekojom qachbꞌiꞌil chaꞌ na jinta kꞌo kechꞌaꞌt chiqij che uchapabꞌexik wuꞌkꞌiyal qasaꞌn kꞌo paqaqꞌabꞌ. 21 Ri kaqaj riꞌoj e kaqaꞌan ronoje chi utz chwach ri Qanimajawal Jesucristo y chikiwach ri tikawex. 22 E uwariꞌche junam kukꞌ ri kebꞌek, kaqataq bꞌi jun chik hermano. Waꞌ na xa ta julaj ukꞌutum lik kacha ukꞌuꞌx che ukꞌiyal chak. Yey woꞌora más ne kacha ukꞌuꞌx che wa bꞌenam ma lik kubꞌul ukꞌuꞌx ukꞌ alaq. 23 Ri Tito e wachbꞌiꞌil riꞌin, junam oj toꞌbꞌel e alaq. Yey ri hermanos erachbꞌilam bꞌi, echaꞌom lo kuma ri tinamit re ri Cristo, ma rukꞌ ri kibꞌinik kisilabꞌik kiyakom uqꞌij ri Cristo. 24 E uwariꞌche chekꞌulu alaq chi utz chaꞌ jelaꞌ kakꞌut alaq ri rutzil kꞌuꞌx alaq y jekꞌulaꞌ kaqꞌalajin chikiwach riglesias suꞌbꞌe lik kojkiꞌkot che alaq.