1 Puwi kꞌu wa qasaꞌn re toꞌbꞌal ke rutinamit ri Dios, na kajawax ta chik kantzꞌibꞌaj pan che alaq, 2 ma wetaꞌam chi ri relej kꞌuꞌx alaq re katoꞌbꞌ alaq. E uwariꞌche nuyakom qꞌij alaq chikiwach ri e aj Macedonia. Riꞌin nubꞌiꞌim, ri alaq aj Acaya* Corinto e jun tinamit kꞌo pa ri luwar re Acaya. kꞌo chi qasaꞌn molom lo alaq junabꞌir. Yey ruma wa ꞌanom ralaq, e kꞌi chike ri e aj Macedonia xkijeq kakiꞌan ke rukꞌ ronoje kikꞌuꞌx. 3 E uwariꞌche ebꞌenutaqom bꞌi wa hermanos ukꞌ alaq chaꞌ kakitoꞌ alaq che ukꞌisik umolik ri qasaꞌn. Ma we yijbꞌam chi alaq ri qasaꞌn jelaꞌ pachaꞌ ri nubꞌiꞌim loq, kaqꞌalajin kꞌu riꞌ lik qatzij ri xqabꞌiꞌij echiriꞌ xqayak qꞌij alaq. 4 Ma kꞌaxtaj kinkachbꞌilaj bꞌi jujun aj Macedonia yey we xojopon kꞌu ukꞌ alaq, keꞌqariqaꞌ kꞌamajaꞌ yijbꞌam alaq ri qasaꞌn. We e xuꞌana riꞌ, kꞌixbꞌal kꞌu chiqe riꞌoj y che ralaq, ma lik xkubꞌiꞌ qakꞌuꞌx ukꞌ alaq yey na xꞌan ta kꞌu alaq ri qabꞌiꞌim loq. 5 Ruma kꞌu waꞌ, xinchꞌobꞌo kebꞌenutaq bꞌi ukꞌ alaq wa hermanos chaꞌ kenabꞌej bꞌi chiqawach riꞌoj y kakitoꞌ alaq che umolik ri qasaꞌn bꞌiꞌtisim chi alaq. Jekꞌulaꞌ we xojopon riꞌoj, yijbꞌam chi alaq waꞌ. Kaqꞌalajin kꞌu riꞌ xqasan alaq rukꞌ ronoje kꞌuꞌx alaq y na e ta ruma xtaq alaq che.

6 Kankuxtaj kꞌu waꞌ che alaq: China ri na kꞌi ta ri kutiko, riꞌ na kꞌi ta ri kumolo. Yey china ri lik kꞌi ri kutiko, riꞌ lik kꞌi ri kumolo. 7 E uwariꞌche, chijujunal alaq chuyaꞌa ruqasaꞌn e chirij janipa ri xalax lo pa ranimaꞌ, na rukꞌ ta bꞌis y na ruma ta minom alaq chupa. Ma ri Dios lik kukꞌul ukꞌuꞌx ri kuya ruqasaꞌn rukꞌ kiꞌkotemal. 8 Yey lik kꞌo puqꞌabꞌ ri Dios kutoꞌ alaq chaꞌ kakꞌiyar janipa ri kꞌo ukꞌ alaq y jelaꞌ kꞌo ronoje ri kajawax che alaq y na xew ta riꞌ, ma kuya ne uwiꞌ chaꞌ jelaꞌ katoꞌbꞌ alaq che uꞌanik chomilaj taq chak. 9 E pachaꞌ ri tzꞌibꞌital kan chupa Rutzij Upixabꞌ ri Dios:

10 Ri Dios e kayaꞌw re rijaꞌ che rawanel yey e kayaꞌw re ri wa che ri kawaꞌik. Ekꞌu riꞌ Rire kuya na janipa ri kajawax che alaq y kuya ne uwiꞌ, chaꞌ rukꞌ waꞌ kaꞌan alaq ri utz y jekꞌulaꞌ lik kꞌo kutiqoj ri utzilaj chak kaꞌan alaq. 11 Jelaꞌ kꞌu riꞌ, kakꞌojiꞌ ukꞌiyal uwach bꞌeyomalil ukꞌ alaq chaꞌ rukꞌ waꞌ katoꞌbꞌ alaq rukꞌ ronoje kꞌuꞌx alaq. Y ekꞌuchiriꞌ riꞌoj kaqakꞌam bꞌi wa qasaꞌn chike ri e kꞌo pa kꞌaxkꞌobꞌik, rike kakitioxij che ri Dios. 12 Ekꞌu waꞌ wa toꞌbꞌal na xew ta kutzꞌaqatisaj ri kajawax chike, ma e kukoj pa kanimaꞌ rike ri lik ketioxin chwach ri Dios 13 y jelaꞌ ri kekꞌuluw re wa qasaꞌn lik kakiyak uqꞌij ri Dios. Ma waꞌ e kꞌutubꞌal re paqatzij wi xkoj alaq ri Utzilaj Tzij re ri Cristo y kabꞌin alaq chupa waꞌ, yey e kꞌutubꞌal re ri relej kꞌuꞌx alaq chike rike y chike konoje rutinamit ri Dios. 14 Jekꞌulaꞌ rike kꞌutubꞌal re ri rutzil kikꞌuꞌx che alaq, kakiꞌan orar pawiꞌ alaq ruma ri unimal rutzil ukꞌuꞌx ri Dios kilom che alaq. 15 ¡Xa maltiox kꞌu che ri Dios ruma ri nimalaj sipanik uyaꞌom chiqe, ma waꞌ lik na jinta kꞌo wi!