1 Loimalile zuwa lya kwesela, behi na kubwemwenzuka zuwa ila ya Jumapili, Maliya Madelena na yula Maliya yunji, nawaluta kulola chila chilaga. 2 Baho du nakulawila limachinyina, mhilisi wa kilanga wa Mkulu nakadulika kulawa kilanga, kalibidusa lila iganga hafungo, nakulikalila. 3 Nakoneka kota lumwemwesa na nguwo zoyavalile zali nzelu chweya! 4 Wamizi wa chila chilaga nawakakama aku wodumba heko, nawazilika kota wanhu wabagame. 5 Ila yula mhilisi wa kilanga nakawalonjela wala wadala, “Hemwe mleche kudumba! Ndivizela kota mwangumpala Yesu yawambigwe mumsalaba. 6 Haduhu hano mina kazilipuka kota vyonayalonjile. Muye mlole honhu howamuwichile. 7 Lelo, mlute himahima mkawalonjele walanguswa wa heye kuta kazilipuka kulawa kowabagame, na sambi kanguwalongola Galilaya, ako momona heye! Mkumbuche ulonzi awu wondiwalonjele.”

8 Wawele wodumba na kusangalala kukulu, awo wadala nawoka himahima hali chilaga, nawabilima kuluta kuwalonjela walanguswa wa heye.

9 Baho, Yesu nakating'hana na hewo, nakalonga, “Mlamche hemwe.” Hewo wadala wamlutila, webata magulu ga heye na kumfugamila. 10 Hamba Yesu nakawalonjela, “Mleche kudumba! Luteni mkawalonjele wang'holozangu walute Galilaya, na ako wombona.”

11 Wala wadala lowaliwoluta, wamwe wa wamizi wa chilaga nawaluta kuli muji kulonga kwa wakulu wa watambika kwa zila mbuli zeng'ha lozilawile. 12 Lelo, nawating'hana hamwe na wasekulu, lowasindile kudogola, wawapa wala wamizi sendi nyinji 13 wolonga, “Hemwe molonga ahi, ‘Walanguswa wa heye nawoya nechilo, wahiza lukuli lwa heye hetwe lotwali tuwasile.’ 14 Na one mkulu wa mkowa yaizele mbuli ayi, hetwe tolonga na heye leka hemwe mleche kugazigwa.”

15 Wala wamizi nawazihola zila sendi, nawadita kota vyowalanguswe. Mbuli ayo yenela hali Wayahudi weng'ha mbaka lehano.

16 Wala walanguswa kumi na yumwe nawaluta Galilaya kuli chila chidunda choyawalajize Yesu. 17 Lowamuwene, wamfugamila, hanga wanji wali na majesa. 18 Yesu nakoya habehi, kawalonjela, “Mpegwa ludali lweng'ha kilanga na mu isi. 19 Luteni lelo, mkawadite wanhu wa isi zeng'ha wawe walanguswa wa heni, muwabatiza kwa itagwa lya Mhaza na lya Mwana na lya Muhe Yelile. 20 Muwalanguse kibatilila malajizo geng'ha gondiwapele. Na heni nda hamwe na hemwe mazuwa geng'ha, mbaka mwiso wa isi.”