1 Lokubwemwenzuche, watambika wakulu weng'ha na wasekulu wa wanhu nawaheha mbuli ya Yesu wogana wamkopole. 2 Wamuwoha luzabi, wamuhola, wamuhilika kwa Pilato mkulu wa mkowa yahaguligwe na mndewa wa Loma.

3 Aho, Yudasi, yula yamhinduche Yesu, loyawene kota mina wamtagusa kwa wihe Yesu, nakogula lukami, kawahilusila watambika wakulu vila vihande makumi gadatu vya sendi. 4 Nakawalonjela, “Ndita gehile kwa kumlavya munhu yawele hela nongwa yakopoligwe.” Ila hewo walonga, “Yangutuwala choni hetwe? Ayo mbuli ya hegwe.” 5 Na heye kataga zila sendi mng'handa ya Nguluwi, kalawa kunze, kaza kinhweng'ha. 6 Watambika wakulu wazihola zila sendi, walonga, “Haiwa goya kuziwika kuli ng'hano ya ng'handa ya Nguluwi, kwa vila sendi za danda.” 7 Baho, weuza, wahola zila sendi wazagula mgunda wa ilongo, hawe honhu ha kutilila wajenzi. 8 Ndo mina mbaka lehano mgunda awo wanguchemigwa, “Mgunda wa Danda.” 9 Ahyo ulonzi wa mloli Yelemiya wenela, “Nawahola vihande makumi madatu vya sendi, kuwazigwa kwa yula wanhu wa Izilaeli wamguzile, 10 nawagula kwa zizo sendi mgunda wa ilongo, kota vila mkulu vyoyandajize.”

11 Yesu nawamwimiza kumwando hali mkulu wa mkowa. Lelo, mkulu wa mkowa nakamuuza, “Ndaze, hambi hegwe ndo mndewa wa Wayahudi?” Yesu nakamwidichila, “Ena, hegwe kulonga.” 12 Ila watambika wakulu na wasekulu lowaliwomuuza, yali hambe yawedichile. 13 Ahyo Pilato nakamuuza, “Ndaze, hulinguhulika ulonjelezi awo weng'ha walingulavya kwa hegwe?” 14 Ila Yesu hedichile ne chinhu, ahyo mkulu wa mkowa nakabubuwala ng'hatu.

15 Yali izoweleche mhela wa mnvina ya Pasaka mkulu wa mkowa kuwachumulila Wayahudi munhu yumwe yali mchinweng'ho wamganile. 16 Mhela awo kwali na munhu yumwe yawele mchinweng'ho yazeleche lukami, itagwa lyake Balaba. 17 Ahyo, wanhu lowetinghane hamwe, Pilato nakawauza, “Mwangugana ndimchumulile yalikohi kuli awa weli, Balaba au Yesu yalinguchemigwa Kilistu Mlohozi?” 18 Nakalonga hino kwa vila nakavizela kota nawamigala kwa heye kwa mbuli ya kumonela maya hela.

19 Pilato loyaliyekale hali chigoda cha heye cha utaguso, mdala wa heye nakamhilichila usenga awu, “Uleche kiinjiza kuli utaguso wa munhu yuno yatanganiche, mina lehano ngazika lukami londali ndilota kwa mbuli ya heye.” 20 Ila watambika wakulu na wasekulu wawakola lupichi wanhu walande Balaba yachumulilwe na Yesu yabagame. 21 Mkulu wa mkowa nakawauza, “Yalikohi kuli awa weli yomlingugana ndimchumulile?” Wamwidichila, “Balaba!” 22 Pilato nakawauza, “Lelo, ndite choni na Yesu yalinguchemigwa Kilistu Mlohozi?” Weng'ha nawalonga, “Yawambigwe mumsalaba!” 23 Pilato nakauza, “Lekachoni? Nakadita wihe wachi?” Hewo nawalutilila kutowa iyowe, “Yawambigwe mumsalaba!”

24 Baho, Pilato loyawene kota hawalingukunda chila choyaliyolonga, na kibagula kwali kwaluka, nakahola mazi, kahovuga moko hali wala wanhu wamemile, nakalonga, “Heni ndamduhu kwa mbuli ya kubagama munhu ayu, mane mwemwe baho!” 25 Wanhu weng'ha nawalonga, “Danda ya heye leche ikale kwa hetwe na wana wa hetwe!” 26 Aho Pilato kawachumulila Balaba kulawa mchinweng'ho, na Yesu yazapigwe ng'hobwa hamba nakamlavya yawambigwe mumsalaba.

27 Hamba wamizi wa Pilato wamwinjiza Yesu mng'handa ya mkulu wa Loma, wamwinamila chilundo cheng'ha. 28 Wamvula nguwo, wamvalisa ikanzu lya chiundewa. 29 Hamba watowa ng'hata ya miwa ifandile kota chipembelo, wamvalisa kumutwi, wamuwichila kahi idenje kuli moko wa heye wa kudilo. Wamfugamila kumwando kwa heye, wambeza wolonga, “Ulamche Mndewa wa Wayahudi!” 30 Wamtemela mite, walihola lila idenje, wamsubulila kumutwi. 31 Lowasindile kumbeza, wamvula lila ikanzu, wamvalisa nguwo za heye, hamba wamhilika kumuwamba mumsalaba.

32 Lowali woluta, nawamfika munhu yumwe itagwa lyake Simoni, mwenyeng'haye wa Kilene, wamizi wamkola lupichi yapiche msalaba wa Yesu. 33 Lowafichile honhu halihochemigwa Goligota, hazeleche honhu ha “Izeje lya Mutwi”. 34 Wamng'hweza mhanzanyo wa divai na chinhu chiliusungu. Ila Yesu loyajezile nakalema kung'hwa.

35 Wamuwamba Yesu mumsalaba, hamba wegawila nguwo za heye kwa kuzitowela simbi. 36 Nawekala baho, wawa womlolela. 37 Hachanya ha mutwi wa heye nawawika utaguso wa heye wandichigwe, “Ayu ndo Yesu, Mndewa wa Wayahudi.” 38 Wabokaji weli nawawambigwa mumsalaba hamwe na heye, yumwe kudilo na yumwe kumoso.

39 Wanhu wawele wokola honhu hala wali womliga na wotigasa mitwi jawo na kulonga, 40 “Hegwe! Ndo nakivuna kota kogwisa ng'handa ya Nguluwi na kuizenga kuli mazuwa gadatu? Lelo ilohole gwegwe. Wone hegwe uli Mwana wa Nguluwi, uduliche mumsalaba!” 41 Vivyo du na watambika wakulu hamwe na walangusa wa malajizo ga Musa na wasekulu nawambeza wolonga, 42 “Nakawalohola wanji, ila kilohola yuye kangulemwa! Hambi, heye ndo Mndewa wa Izilaeli! Hambi, lelo yeduliche hasi kulawa mumsalaba, na hetwe tomkunda. 43 Naketumbila Nguluwi na kulonga eti heye ndo Mwana wa Nguluwi, lelo, Nguluwi yamlohole one yalingumgana.” 44 Hihyo na wala wabokaji wawambigwe hamwe na Yesu mumsalaba nawaliwomliga.

45 Kulawila saa tisa matinazo, jiza naigubika isi yeng'ha. 46 Loifichile saa tisa matinazo, Yesu nakalila kwa lizi likulu, “Eloi, Eloi, lema sabakitani?” Ilinguzeleka, “Nguluwi wa heni, Nguluwi wa heni, mbona kundeka?” 47 Ila wala nawemile hala lowahuliche ahyo walonga, “Kangumchema Eliya.” 48 Yumwe wa hewo nakabilima, nakahola ibofyabofya, kadiliza kuli divai izazame, kawika mli idenje, kamha yang'hwe. 49 Wanji nawalonga, “Tandi tulole wone Eliya kanguya kumlohola.” 50 Baho, Yesu nakalila kahi kwa lizi likulu, hamba muhe nauleka lukuli.

51 Baho ipaziya ligazi lya kudinya honhu helile ng'hatu ha ng'handa ya Nguluwi lidejeka vihande vili kulawa kuchanya mbaka hasi, isi naitigasika, mitalawe najitulika, 52 vilaga navigubuka na wanhu wenji wa Nguluwi welile nawabagame, wazilipuligwa, 53 na hewo, loyazilipuche heye Yesu, walawa mvilaga, wenjila Yelusalemu muji welile, woneka na wanhu wenji.

54 Lelo, mkulu wa wamizi na wamizi wa Yesu lowawene kutigasika kwa isi na gala galawile, nawadumba heko, nawalonga, “Ena, kwa kukomya munhu ayu nayali Mwana wa Nguluwi.”

55 Honhu aho hali na wadala wenji wolola kwa kutali. Awo wadala ndo wala wamuwinzile Yesu kulawila Galilaya womtanza. 56 Mumo wali Maliya Madelena, Maliya mayao Yakubu na Yusufu, hamwe na mayao wana wa Zebedayo.

57 Loifichile matinazo, mina nakoya munhu yawele na lufufu mwenyeng'haye wa Alimataya, itagwa lyake Yusufu. Na heye kahi nayali mlanguswa wa Yesu. 58 Nakamlutila Pilato, nakalanda yapegwe lukuli lwa Yesu. Baho, Pilato nakakunda yapegwe. 59 Yusufu nakaluhola lula lukuli, kaubumbiliza sanda nzelu ng'hatu, 60 nakuwika mgati mwa chilaga chinyale choyali yahongole kuli italawe. Hamba kabidusa iganga ikulu kadinya hali lwizi lwa chilaga, koka. 61 Maliya Madelena na yula Maliya yunji wali wekale wolola chilaga.

62 Hamitondo, zuwa iyage ila ya kwesela, watambika wakulu na Mafalisayo nawamlutila Pilato, 63 nawalonga, “Mkulu, tukumbuchila kota yula mhadi loyali mkomu nakalonga ‘Zuwa lya kadatu ndozilipuka.’ 64 Lelo, twangugana chilaga chilolelwe na wamizi mbaka zuwa lya kadatu, leka walanguswa wa heye waleche kuya nakumuhiza na kuwalonjela wanhu kota kazilipuka. Udesi awu wa mwiso wowa wihile lukami kusinda ula wa mwaluko.” 65 Pilato nakawalonjela, “Haya, mwanawo wamizi, mlute mkalolele kota vyomvizelele.” 66 Lelo, waluta walolela chilaga, nawazenjelela mchanya mwa iganga na wawaleka baho wamizi wololela.