Muⱪeddes Kalam (yǝngi yeziⱪ) Yaⱪup 4

Bu dunyani dost tutmasliⱪ

1 Aranglardiki urux wǝ majiralar nǝdin kelip qiⱪidu? Bu dǝl tǝn ǝzaliringlar iqidǝ jǝng ⱪiliwatⱪan arzu-ⱨǝwǝsliringlardin ǝmǝsmu?■ 2 Silǝr arzu-ⱨǝwǝs ⱪilisilǝr, lekin arzu-ⱨǝwǝsliringlarƣa erixmǝysilǝr; adǝm olturisilǝr, ⱨǝsǝt ⱪilisilǝr, lekin erixǝlmǝysilǝr; jedǝl-majira qiⱪirip jǝng ⱪilisilǝr. Erixmǝysilǝr, qünki tilimǝysilǝr. 3 Tilisǝnglarmu erixǝlmǝysilǝr, qünki ɵz arzu-ⱨǝwǝsliringlarni ⱪandurux üqün rǝzil niyǝtlǝr bilǝn tilǝysilǝr. ■ 4 Əy zinahorlar! Bu dunya bilǝn dostlixixning ǝmǝliyǝttǝ Huda bilǝn düxmǝnlixix ikǝnlikini bilmǝmtinglar? Kimdikim bu dunyani dost tutmaⱪqi bolsa, ɵzini Hudaning düxmini ⱪilidu.□ ■ 5 Muⱪǝddǝs yazmilarda: «Huda ⱪǝlbimizgǝ makan ⱪildurƣan Roⱨ naqar arzu-ⱨǝwǝslǝrni ⱪilamdu?» degǝn sɵz silǝrqǝ bikar deyilgǝnmu?□ ■ 6 Lekin Huda bǝrgǝn meⱨir-xǝpⱪǝt buningdin üstün turidu. Xuning tüpǝylidin muⱪǝddǝs yazmilarda: «Huda tǝkǝbburlarƣa ⱪarxidur, lekin mɵmin-kǝmtǝrlǝrgǝ xǝpⱪǝt ⱪilidu» dǝp yezilƣandur.□ ■

7 Xuning üqün, Hudaƣa boysununglar. Xǝytanƣa ⱪarxi turunglar; xundaⱪ ⱪilsanglar u silǝrdin ⱪaqidu.■ 8 Hudaƣa yeⱪinlixinglar, Hudamu silǝrgǝ yeⱪinlixidu. Əy gunaⱨkarlar, gunaⱨtin ⱪolunglarni yuyunglar; ǝy üjmǝ kɵngüllǝr, ⱪǝlbinglarni pak ⱪilinglar.□ 9 Gunaⱨliringlarƣa ⱪayƣu-ⱨǝsrǝt qekinglar, ⱨaza tutup yiƣlanglar, külkǝnglarni matǝmgǝ, huxalliⱪinglarni ⱪayƣuƣa aylandurunglar. ■ 10 Rǝbning aldida ɵzünglarni tɵwǝn tutunglar wǝ xundaⱪ ⱪilƣanda U silǝrni üstün ⱪilidu.■

Ⱪerindaxlar üstidin ⱨɵküm ⱪilmasliⱪ

11 I ⱪerindaxlar, bir-biringlarni sɵkmǝnglar. Kimdikim ⱪerindixini sɵksǝ yaki uning üstidin ⱨɵküm ⱪilsa, Tǝwrat ⱪanuninimu sɵkkǝn wǝ uning üstidin ⱨɵküm ⱪilƣan bolidu. Xundaⱪ ⱪilip ⱪanun üstidin toƣra-natoƣra dǝp ⱨɵküm ⱪilsang, ⱪanunƣa ǝmǝl ⱪilƣuqi ǝmǝs, bǝlki ɵzüngni uning üstidin ⱨɵküm ⱪilƣuqi ⱪiliwalƣan bolisǝn. □ 12 Ⱪutⱪuzuxⱪa wǝ ⱨalak ⱪilixⱪa ⱪadir bolƣan, ⱪanun Tüzgüqi wǝ ⱨɵküm Ⱪilƣuqi pǝⱪǝt birdur! Xundaⱪ ikǝn, sǝn baxⱪilar üstidin ⱨɵküm ⱪilƣudǝk zadi kimsǝn?

Ɵzüngni Huda demǝ!

13 Ⱨǝy, «Bügün yaki ǝtǝ palani-püküni xǝⱨǝrgǝ barimiz, u yǝrdǝ bir yil turup, tijarǝt ⱪilip payda tapimiz» degüqilǝr buningƣa ⱪulaⱪ selinglar! ■ 14 Əy ǝtǝ nemǝ bolidiƣanliⱪini bilmǝydiƣanlar, ⱨayatinglar nemigǝ ohxaydu? U huddi ƣil-pal pǝyda bolup yoⱪap ketidiƣan bir parqǝ tuman, halas. □ ■ 15 Buning orniƣa, «Rǝb buyrusa, ⱨayat bolsaⱪ, uni ⱪilimiz, buni ⱪilimiz» deyixinglar kerǝk. ■ 16 Lekin ǝmdi silǝr ⱨazir undaⱪ yoƣan gǝpliringlar bilǝn mahtinisilǝr. Bundaⱪ mahtinixlarning ⱨǝmmisi rǝzil ixtur. 17 Xuningdǝk kimdikim mǝlum yahxi ixni ⱪilixⱪa tegixlik dǝp bilip turup ⱪilmiƣan bolsa, gunaⱨ ⱪilƣan bolidu.■

■4:1 Rim. 7:23; 1Pet. 2:11.

■4:3 Mat. 20:22; Rim. 8:26.

□4:4 «Əy zinahorlar! Bu dunya bilǝn dostlixixning ǝmǝliyǝttǝ Huda bilǝn düxmǝnlixix ikǝnlikini bilmǝmtinglar?» — muxu yǝrdiki «zinahorlar» xübⱨisizki, kɵqmǝ mǝnidǝ yaki bǝlkim ǝyni mǝnidǝ boluxi mumkin. Kɵqmǝ mǝnidǝ «Hudaƣa wapasizlar» degǝnni bildüridu. Bu sɵz baxⱪa ixlar (pul, bayliⱪ ⱨoⱪuⱪ, mǝnsǝp, ⱨǝrhil ⱨǝwǝslǝr)ni Hudaning orniƣa ⱪoyƣanliⱪni kɵrsitidu. Bu ⱨǝⱪiⱪiy butpǝrǝsliktur, bu Huda aldida zinahorluⱪⱪa ohxax bolidu.

■4:4 Yⱨ. 15:9; Gal. 1:10; 1Yuⱨa. 2:15.

□4:5 «Huda ⱪǝlbimizdǝ makan ⱪildurƣan Roⱨ...» — Ɵz Muⱪǝddǝs Roⱨini kɵrsitidu. Grek tilida «U ⱪǝlbimizgǝ makan ⱪildurƣan Roⱨ...». «Muⱪǝddǝs yazmilarda: «Huda ⱪǝlbimizgǝ makan ⱪildurƣan Roⱨ naqar arzu-ⱨǝwǝslǝrni ⱪilamdu?» degǝn sɵz silǝrqǝ bikar deyilgǝnmu?» — bu sɵzning ɵzi Tǝwrattin biwasitǝ tepilmaydu, bǝlkim rosul Yaⱪupning Tǝwrattiki kɵp ayǝtlirining mujǝssǝmlǝxtürülgini boluxi mumkin. Baxⱪa bir hil tǝrjimisi: «Huda ⱪǝlbimizgǝ salƣan (muⱪǝddǝs) Roⱨ bizning Hudaƣila sadaⱪǝtmǝn boluximizni ⱪattiⱪ arzu ⱪilidu».

■4:5 Qɵl. 11:29.

□4:6 «Lekin Huda bǝrgǝn meⱨir-xǝpⱪǝt buningdin üstün turidu» — bu sɵzning mǝnisi bǝlkim «bu yaman arzu-ⱨǝwǝslirimiz, nǝps-tamahorluⱪimiz üstidin ƣǝlibǝ ⱪilix üqün, Huda bizgǝ kɵp küq-ⱪudrǝt beridu» degǝnlik boluxi mumkin. «Huda tǝkǝbburlarƣa ⱪarxidur, lekin mɵmin-kǝmtǝrlǝrgǝ xǝpⱪǝt ⱪilidu» — «Pǝnd.» 3:34.

■4:6 Pǝnd. 3:34; 1Pet. 5:5.

■4:7 Əf. 4:27; 1Pet. 5:9.

□4:8 «Əy gunaⱨkarlar, gunaⱨtin ⱪolunglarni yuyunglar; ǝy üjmǝ kɵngüllǝr, ⱪǝlbinglarni pak ⱪilinglar» — bu «üjmǝ kɵngüllǝr» bǝlkim Huda bilǝn wǝ bu dunya bilǝn tǝng dost bolayli degüqilǝrni kɵrsitidu.

■4:9 Mat. 5:4.

■4:10 Ayup 22:29; Pǝnd. 29:23; Mat. 23:12; Luⱪa 14:11; 18:14; 1Pet. 5:6.

□4:11 «kimdikim ⱪerindixini sɵksǝ yaki uning üstidin ⱨɵküm ⱪilsa, Tǝwrat ⱪanuninimu sɵkkǝn wǝ uning üstidin ⱨɵküm ⱪilƣan bolidu...» — «Tǝwrat ⱪanuninimu sɵkkǝn ... bolidu» — muxu yǝrdǝ rosul Yaⱪupning kɵzdǝ tutⱪan «Tǝwrat ⱪanuni» bolsa yuⱪirida tilƣa alƣan uningdiki «ⱪoxnangni ɵzüngni sɵygǝndǝk sɵygin» degǝn ǝmr boluxi kerǝk. Bu sɵzlǝr bǝzidǝ «Tǝwrat ⱪanunining jǝwⱨiri» deyilidu. «Xundaⱪ ⱪilip ⱪanun üstidin toƣra-natoƣra dǝp ⱨɵküm ⱪilsang, ⱪanunƣa ǝmǝl ⱪilƣuqi ǝmǝs, bǝlki ɵzüngni uning üstidin ⱨɵküm ⱪilƣuqi ⱪiliwalƣan bolisǝn» — insanning bǝhtlik nesiwisi Hudaning sɵzi üstidin («toƣra, natoƣra!» dǝp) ⱨɵküm qiⱪirix ǝmǝs, bǝlki uni iman bilǝn ⱪobul ⱪilip itaǝt ⱪilixta tepilidu, ǝlwǝttǝ!

■4:13 Luⱪa 12:18.

□4:14 «U huddi ƣil-pal pǝyda bolup yoⱪap ketidiƣan bir parqǝ tuman, halas» — «bir parqǝ tuman» yaki «bir parqǝ is-tütǝk».

■4:14 Yǝx. 40:6; 1Kor. 7:31; Yaⱪ. 1:10; 1Pet. 1:24; 1Yuⱨa. 2:17.

■4:15 Ros. 18:21; 1Kor. 4:19; Ibr. 6:3.

■4:17 Luⱪa 12:47.