1 Handih naam-ama moh Joshua ya kimmalih APU DIOS ke hiya an kananay “Naam-ama ka mo, yaden dakol pay nadan boblen uggeyu sinakup.

2-7 Hanadan boblen uggeyu sinakup ya am-in nadan bobled Pilistia ya Geshur, nadan bobled Abbim nah nangappit hi south, mipalpu nah wa-el an Sihor nah poppog di Egypt inggana nah poppog di Ekron nah nangappit hi north an nibilang an boblen di Kanaanite ya nan boblen nadan liman patul di Pilistia an Gaza, Asdod, Askelon, Gat ya Ekron, hay udum an boblen nadan Kanaanite an wadah nangappit hi north an hay poppogna ya mipalpud Mearah an bagin di iSidon ingganad Aphek nah poppog di boblen nadan Amorite, hay boblen nadan Gebalite ya am-in di Lebanon nah nangappit hi timilan di algo mipalpud Baal-Gad nah nangappit hi south ten wada ta nah bilid ad Hermon ingganad Hamat. Nibilang datuwe nadah boblen di iSidon nah numbattanan di Misrepot Maim ya nadan Bilid an Lebanon. Baddangan dakayun ha-oy an munsakup ke datuwen boble ta pakaanon yu nadan tataguh di. Mahapul an ganodwaom datuwen boble ta ip-ong nadan hiyam an holag Israel ya nan godwan di holag Manasseh te hidiyey intugun kun atom.”

8 Hana ken lutah nangappit hi timilan di algo nah Wangwang an Jordan ya indat Moses nadah holag Reuben, holag Gad ya godwan di holag Manasseh.

9 Hay sakup di boble da ya mipalpud Aroer nah pingngit nan nundotal an Arnon takon nan boble nah gawwan diyen Nundotal ya takon nadan boble nadah duntug mipalpud Medeba ingganad Dibon. 10 Nangngenangngey poppog di sinakup da nah poppog di Ammon an nid-um nadan boblen nun-ap-apuwan nan patul di Amorite an hi Sihon an numpatul ad Hesbon. 11 Sinakup da pay di Gilead, nadan bobled Geshur ya Maakah, am-in nadan boble nah Bilid an Hermon ya am-in nadan bobled Bashan ingganad Salekah. 12 Ya sinakup da pay di nun-ap-apuwan nan patul an hi Og an natdaan hanadah holag Repaim an nun-ap-apud Astarot ya Edrei. Dinog-al Moses dida kediyen boble handi te inapput na didah gubat. 13 Mu nada ken tatagud Geshur ya Maakah ya ugge dinog-al nadan holag Israel dida kinali ingganad uwani ya nanongnan nakiboble da nadah holag Israel.

14 Ugge indatan Moses nadan holag Libay hi luta te kinalin tuwalin APU DIOS an hay midat ke dida ya nan bingay da nadah miappit ke APU Dios ta ahida gobhon dadiyen miappit.

15 Datuwey indat Moses hi pumboblayan nadan holag Reuben. 16 Hay sakup di boble da ya numpaed Aroer nah pingngit nan Nundotal an Arnon, takon nan nigawwan ongal an boble nah nundotal ya nadan bobleh tap-on di duduntug ad Medeba. 17 Nid-um pay di Hesbon ya am-in nadan boble nadah tap-on di duntug an Dibon, Bamot Baal, Bet Baal Meon, 18 Jahas, Kedemot, Mephaat, 19 Kiriatim, Sibmah, Seret Sahar nah duntug nah nundotal, 20 Bet Peor, nadan boble nah natigging nah Duntug an Pisgah ya Bet Jeshimot. 21 Sinakup da pay nadan bobleh tap-on nan duntug ya am-in nadan boblen nun-ap-apuwan nan Amorite an patul an hi Sihon an nun-ap-apud Hesbon. Inapput din hi Moses hidiyen patul takon nadan patul ad Midian an da Ebi, Rekem, Sur, Hur ya hi Reba. Dadiyen papatul ya nunhilbi da nah patul an hi Sihon. 22 Hay oha nadah pinaten nadan holag Israel ya nan mun-abig an hi Balaam an imbabalen Beor. 23 Hay poppog nan boblen nidat nadah holag Reuben ya nan nangappit hi kalin-oban di algo nah Wangwang an Jordan. Danae nadan boblen nidat nadah holag Reuben.

24 Indatan damdaman Moses nadan holag Gad hi pumboblayan da.

25 Ya hay sakup di boblen nidat ke dida ya Jaser ya am-in nadan bobled Gilead ya godwan di boblen di Ammon ingganad Aroer an nih-up ad Rabbah. 26 Hay poppog di boble da ya mipalpud Hesbon ingganad Ramat Mispeh ya Betonim, mipalpud Mahanaim inggana nah poppog di Lo Debar, 27 takon nan nundotal ad Jordan. Ya nid-um di Bet Haram, Bet Nimrah, Sukkot ya Saphon ya nadan udum an boblen nun-ap-apuwan nan patul an hi Sihon ad Hesbon. Hay poppog di boble dah nangappit hi kalin-oban di algo ya nan Wangwang an Jordan inggana nah Baybay an Galilee. 28 Danaey boblen nidat nadah holag Gad.

29 Indatan damdaman Moses nan godwan di holag Manasseh hi pumboblayan da.

30 Sinakup di boble day Mahanaim ya am-in nadan bobled Bashan takon nadan nan-om an boblen Jair hidi. Datuwen am-in an bobley nun-ap-apuwan handin patul an hi Og. 31 Nid-um damdamay godwan di Gilead ya nadan boblen nan patul an hi Og an Astarot ya Edrei. Datuwen am-in di nidat nadah holag Makir an imbabalen Manasseh.

32 Athidiy nanganodwaan Moses nah ambilog an nundotal ad Moab nah nangappit hi timilan di algod Jericho nah binnah-el nan Wangwang an Jordan. 33 Mu nada ken holag Libay ya maid di indat Moses ke dida te kinalinan hay tawid da ya nan bingay da nadah miappit nah DIOS di holag Israel.