1 Sinakup mo tuwalin nadan holag Israel nadan bobleh nangappit hi timilan di algod Jordan, mipalpu nah Nundotal an Arnon inggana nah nundotal ad Jordan, inggana nah nangappit hi north nah Bilid an Hermon ot pumboblayan da. Inapput da nadan duwan patul 2 an hay oha ya hi Sihon an patul di Amorite an nun-ap-apud Hesbon. Hay sakup di pun-ap-apuwana ya kagodwan di Gilead an mipalpud Aroer an paldang nan nundotal ad Ammon ya mipalpuh gawwan diyen ongal an boble inggana nah Wangwang an Jabbok an poppog di Arnon. 3 Sakup pay di pun-ap-apuwana nan nundotal ad Jordan mipalpun nah Baybay ad Galilee nah nangappit hi south ingganad Bet Jeshimot an nangappit hi timilan di algo nah Naten Baybay inggana nah puun di Bilid an Pisgah.

4 Hay oha bo ya hi Og an patul di Bashan an oha nadah natdaan an holag Repaim. Ya hiyay patul di Astarot ya Edrei. 5 Hay sakup di pun-ap-apuwana ya nadan boble nah Bilid an Hermon, ad Salekah ya am-in nadan bobled Bashan ingganah poppog di Geshur ya Maakah takon nan kagodwan di Gilead. Hay godwan tuwen boble ya sakup di pun-ap-apuwan Sihon an patul di Hesbon.

6 Inapput tuwalin da Moses ya nadan ibbanan holag Israel datuwen duwan patul ot idat Moses an muttatyun APU DIOS datuwen numboblayan da nadah holag Reuben, holag Gad ya godwan di holag Manasseh ot pumboblayan da.

7 Inapput damdaman da Joshua ya nadan tindalunan holag Israel am-in nadan papatul nadah bobleh nangappit hi kalin-oban di algo nah Wangwang an Jordan, mipalpud Baal-Gad nah nundotal ad Lebanon inggana nah Bilid an Halak nah nangappit hi south an nih-up ad Edom. Ot ganodwaona ot ikap-ong na nadah ibbanan holag Israel ta pumboblayan dat inggana. 8 Nid-um ke datuwe nadan boblen mabilid, nadan bobleh puun di bibilid nah nangappit hi kalin-oban di algo, nadan bobleh nundotal ad Jordan ya nadan bobleh puun di bilid hidi, nadan boble nadah natigging hi nangappit hi timilan di algo ya nan mamagan lutah nangappit hi south. Datuwen bobley numboblayan handi nadan Hittite, Amorite, Kanaanite, Perisite, Hibite ya Jebusite.

9-24 Ya datuwey numboblayan nadan udum an papatul an inapput da Joshua an papatul: Jericho, Ai an nih-up ad Bethel, Jerusalem, Hebron, Jarmut, Lakis, Eglon, Geser, Debir, Geder, Hormah, Arad, Libnah, Adullam, Makkedah, Bethel, Tappuah, Hepher, Aphek, Lasharon, Madon, Hasor, Simron Meron, Aksap, Taanak, Megiddo, Kedes, Jokneam ad Carmel, Dor nah pingngit di baybay, Goyim ad Gilgal ya Tirsah. Hay bilang nadan patul hidi ya tulumpulut oha.