1 Hituwey impainilan APU DIOS mipanggep hi Moab: Hi ohan hilong ya madadag di Ar ya Kir an duwan ongal an bobled Moab.* 15:1 Hanadan iMoab ya nakabayyag an buhul di holag Israel. (Tibon yuy 2 Patul 13:20.) 2 Hanadan iDibon ad Moab ya ume da nadah pun-appitan dah bibilid ta eda mungkokkoggah di ya u-umyung dan linabaha day buuk da ya emeng da ya kogkog-an day iNebo ya iMedeba. 3 Mumbulwati dah langgote ya mungkoga dan am-in takon nadan wadah kalata ya nadan wadah nunhituwan da. 4 Hanadan iHesbon† 15:4 Hanan boble an Hesbon ya umeh himpulut ohan kilometroh nangappit hi timilan di algo mipalpu nah Naten Baybay. Hituwen bobley numpatulan din hi Sihon handih nunsakupan di iIsrael. (Tibon yuy Numbers 21:23-36.) ya iElealeh ya madngol di koga dah nidawwi ingganad Jahas. Ya takon nadan nakatullid an tindalun di Moab ya gumayonggong da gapuh namahig an takut da.

5 Ha-oy ya u-umyungak damdama gapuh naat hi Moab! Hanadan bimmobleh di ya binumtik dad Soar‡ 15:5 Hanan boble an Soar ya wadah nangappit hi south di Naten Baybay. (Tibon yuy Genesis 14:2 ya 19:23 ya 19:30.) ya Eglat Selisiya. Padaldalanon day koga da yaden manikid da nah kalatan mumpaed Luhit. Hanadan udum ya binumtik dad Horonaim. Ya kogkog-an day nadadagan di boble da. 6 Natduk nan wa-el an Nimrim ot makleng nadan holok ta maid moy matiboh nitanom. 7 Hanadan bimmoble ya inala da ya abu nadan kabaelan dan odnan an limmu da ot mun-agwat da nah Wa-el an Willows ta bumtik da. 8 Hay kogan nadan iMoab ya madngol am-in hanadah bobleh di, mipalpud Eglaim ingganad Beer Elim. 9 Hanake bon wangwang ad Dibon ya ahi mumbalin an maingit gapuh dalan di nungkakaten tatagu. Mu waday nahalhalman an aton APU DIOS ke didan iMoab te takon di waday matdaan ke dida ya ahina ipaunud di mamdug ke didat pumpate da dida.