Nan Kalin Apu Dios Isaiah 14

Hay nibangngadan nadan iIsrael an nieh udum an boble

1 Mu hi APU DIOS ya ahina bo homkon nadan holag Israel ta ibilang na bo didan tataguna ya ibangngad na didan mumboble nah boble da. Ne ahi umaliy tataguh udum an boblen makiboblen dida. 2 Ahi baddangan di dakol an boble didan ahi mibangngad hi boble dan indat APU DIOS ke dida. Kediye ya pumbalinon da mon himbut da nadan tataguh udum an boblen nunhimbutan da handi. Ya apputon da mo nadan nangapput ke dida handi ta dida moy mun-ap-apun dida.

Hay kaapputan nan patul di Babilon

3 Ahi poppogon APU DIOS di nihbutan nadan tatagunat* adida mo u-umyung ya adida mo munholholtap gapuh nakalligat an ngunun napilit dan nangingunu. 4 Ta taltalanggaan da nan patul di Babilon an kanan day “Naapput bo kaya nan gaga-ihon patul di Babilon! Adina mo punholholtapon di tatagu. 5 Pinoppog mo tuwalin APU DIOS di kabaelan nadan gaga-ihon aap-apu 6 te gapuh namahig an boh-ol da ya impahanolholtap da bo kaya nadan tatagun inapput da. 7 Ta ad uwani ya malinggop moy tataguh kabobboble tuh luta, ta hidiye nan mungkanta dah amlong da. 8 Paddungnay takon nadan kakaiw an bolbol ya sedar ad Lebanon ya maan-anla da damdamah naapputan nan patul di Babilon te maid moy munlongon dida.†

9 Hanan boble an kadungayan an boblen di nate ya nidadaan an mangapnga nah patul di Babilon. Ya nadan linnawan handidan aap-apu tuh luta ya immina dan e manamun hiya. 10 Kanan dan hiyay ‘Ad uwani ya numbalin ka mon nakapuy an umat ke dakami. 11 Handi ya ongal di kabaelam, ta hidiye nan ikanantaan dakah tatagun ipagango day gitala dah pundayaw dan he-a. Mu maid moy athidi te dehtu kah tuh boblen di nate. Kahkahhuypam ya i-i-ulom di bibigi.’

12 He-an patul di Babilon an makalin makahhiyon bittuwon hi biggatna‡ ya ongal di kabaelam an nangapput hi tatagu tuh luta handi, mu impadop-a dakan nalpud kabunyan ot mag-a ka tuh luta. 13 Te kanam hi nomnom muy ‘Atok am-in di kabaelak ta loktat ya ha-oy di natagtag-e mu nadan katagtag-ayan an bittuwon. Hay ubunak an mun-ap-apu ya nah bilid an kaam-amungan am-in di dios. 14 Ya la-uwak nadan kulabut ta mun-ingngo kamin APU DIOS an Nakattag-e.’§

15 Mu hay ot ya abu naat ya impae dakad daloddalom di luta nah boblen di nate.

16 Hanadan manibon he-ah di ya punhintotokkolan dakan nomnomnomon day numbalinam. Kanan day ‘An hiyah tuwe nan kabaelanan mangiwagot tuh lutan mangipatakut hi pun-ap-apuwan di udum an patul? 17 Ya kon bokon hiya nan nanadag hi kabobboble ot mumbalin dah adi maboblayan? Ya kon bokon hiya nan nangapput nadah o-ongal an boble ya adina homkon nadan imbalud nat adina ipaanamut dida?’*

18 Hanadan nungkakaten patul ya dehdi da nadah mungkaphod an lubuk da. 19 Mu ke he-a ya adika milubuk, umat ka nah naten ahun adida hangudon. Ya ahi mipamgan miweley adol muh bitun mitab-un ke he-ay adol di titindalun nateh gubat. 20 Man-uket adi daka ip-iphod an ilubuk an adi umat nadah udum an patul ya dinadag muy boblem ya numpatem di tatagum. He-an gaga-ihon patul, maid nadah gaga-ihon pamilyam di matdaan ta makal-iwan dat nangamung. 21 Aga, pumpate yu nadan imbabalen nan patul gapuh numbahulan handidan aammod dat adida mun-ap-apu tuh luta ya adida mumpangapyah o-ongal an boble.”

Hay panadagan APU DIOS hi Babilon

22 Hi APU DIOS an Kabaelanan am-in ya kananay “Gubatok di Babilon ta dadagok. Takon di u-unga ya maid di e matdaan an matagu. 23 Dadagok hidiyen Babilon ta pumbalinok hi mamalbong ta pumbalayan di aakup ya nadan udum an hamuti. Ahik higidan hidiyen boble ta mahigid am-in di wadah di. Ha-oy an AP-APU an Kabaelanan am-in di nangalin tuwe.”

Hay pangastiguwan APU DIOS hi Assyria

24 Insapatan APU DIOS an Kabaelanan am-in an kananay “Hanan implanuk an aton ya nunna-ud an maat. 25 Dadagok nadan iAssyriah tud Israel an pumpatek dida tuh bibilid ta adida mo munhimbut nadan tataguk ke dida ya ta adida mo munholholtap. 26 Athituy implanuk an aton. Makulug an kastiguwok am-in di tataguh kabobboble tuh luta ya nidadaanak an mangat kediye. 27 Ha-oy an AP-APU an Kabaelanan am-in di numplanun diye. Ya nunna-ud an atok hidiyen maid di mangipatikod ke ha-on!”†

Hay pangastiguwan APU DIOS hi Pilistia

28 Hituwey nipainilan ha-on an hi Isaiah handih natayan nan patul an hi Ahas.

29 Kanan APU DIOS di “Dakayun iPilistia, adi kayu maka-amlong hi natayan nan patul an nangipaholholtap ke dakayu. Te nan imbabalenan ahi mihannot ke hiya ya nahalhalman mu hiya. Te hi amana ya mialig nah katatakut an ulog, mu nan imbabalena ya namam-an katatakut mu hiyan mialig nah dragon an manadag ke dakayu. 30 Ipaptok ku nadan nakawwotwot an tataguk an kayak mumpattol. Ek ihamakan didah kiha-adan dan maid di ad-adih maat ke dida. Mu dakayun iPilistia ya ipaalik di namahig an bitil ta maid ke dakayuy tumagu te mate kayun am-in.”

31 Olton yuy koga yun iPilistia te mangali day dakkodakkol an tindalun malpuh north an mun-uhbuk di dap-ul hi pangaliyan da. Nakal-ot da ya nakatullid da. Kinali bumtik kayu gapuh takut yu.

32 Nganney panumang taku nadah umalin malpud Pilistian makihummangan ke ditaku?‡ Ahi taku kanan di “Hi APU DIOS di pundinolan mi. Pinili nay Zion an kihikugan nadan makahkahmok an tatagunat mihwang da nadah mangipaholholtap ke dida.”

*14:3 14:3 Ketuwe ya hinamad APU DIOS an kinalin poppogonay nihbutan nadan holag Israel ad Babilon umat hi namoppoganah nihbutan dad Egypt handih nabayag.

†14:8 14:8 Hanadan patul di Assyria ya Babilon ya nakabayyag an impalongolongo dah tatagu da nadan mungkaphod an kakaiw ad Lebanon ot ianamut dah boble da.

‡14:12 14:12 Bokon ya abu nan patul di Babilon di “nangadanan hi makahhiyon bittuwon hi biggatna,” mu takon hi Satanas. (Tibon yuy Lucas 10:18.)

§14:14 14:12-14 Hi Satanas ya ihik nan pulhon di pun-ap-apuwan APU DIOS.

*14:17 14:17 Hanan patul di Babilon ya adina ipae nadan holag Israel an balud na, athidi damdaman Satanas an adina ipae nadan balud na. Mu hi Kristo ya immalin mangipae nadah balud Satanas. (Tibon yuy Lucas 4:18.)

†14:27 14:24-27 Hay immannungan tuwen kalin APU DIOS ya nitudok hi Isaiah 37:21-28.

‡14:32 14:32 Datuwen umalin makihumangan an malpud Pilistia ya ibaga da nin an mumbaddang dan makigubat hi iAssyria an buhul da.