1 Dinzugo, m baꞌabiise, Winaꞌam zoo ti nimbaanlig ka li yuꞌun zuꞌe la zug, ka m saꞌani ya ye ya noki ya meŋ, ka ke ka li a maan line voe n tis Winaꞌam n a suꞌum nyain ka maꞌae Winaꞌam sunf. Neꞌeŋa a sida zunꞌor n tis Winaꞌam. 2 Da tuꞌasidi line wusa ka dunia dim niŋid laa. Keli ka Winaꞌam tisi ya yaꞌam paal, ka li na tiake ya beilim. Ka ya na nyaŋe baŋ Winaꞌam boodim, bun line a suꞌum ne line maꞌed Winaꞌam sunf.

3 Winaꞌam popielim piini kan ka o tisi m la zug, ka m yeti ya wusa, ye ya da tenꞌes ye ya zuꞌe gaad ya meŋ a siꞌem laa, ka lee tenꞌes ne sida ye ya ane yanam kpelim a siꞌem la, ka li dolne yadda niŋir line ka Winaꞌam tisi ya a siꞌem la. 4 Nid mor niŋgbiŋ yinni, ka li mor luas bedego. Ka luas zaꞌa more ba tuuma gun gun. 5 Ala men, ti a yinni ne Kiristo ka wenne niŋgbiŋ yinni ne, laꞌam ne tinam a bedego la. Ka ti wusa toꞌoŋ taaba wuu niŋgbiŋ yinni luas n toꞌoŋ taaba siꞌem la. 6 Ti diꞌed piini konꞌob konꞌob, ka li yine Winaꞌam popielim ni. Dinzugo ti nokim piini la n suŋ taaba. Ka one piini a nodiꞌesug, on diꞌem Winaꞌam noor pianꞌad n tis nidib ka li dolne ti yadda niŋir a siꞌem. 7 Ka one piini a ye o suŋ nidib, on suŋim. Bee one piini a ye o paꞌal nidib Winaꞌam yela, on paꞌalim. 8 Bee one piini a ye o kpemis nidib, on kpemisi ba sunya. One piini a tisib, on tis ne o sunf wusa. Ka one piini a ye o a tuon gat, on tumi li suꞌuŋa. Ka one piini a nimbaanlzoor, on maalimi li ne sumalisim.

9 Keli ka ya noŋir a sida noŋir, ka kisi bunbeꞌed, ka gbanꞌe line a suꞌum ne ya nuꞌus ayi, 10 ka noŋ taaba suꞌuŋa yaname kpelim a baꞌabiis ne taaba Kiristo saꞌan la, ka tiaꞌ ye ya tis taaba naꞌasi, 11 ka tum bedego n tis Winaꞌam ka da zoti gbanyaꞌam, ka pesigi ya meŋ n tum Winaꞌam tuuma ne nimmua, 12 ka ya tiꞌir ke ka ya mor sumalisim, ka modigi ya yeltood poogin, ka puꞌus Winaꞌam saŋa wusa, 13 ka suŋ Winaꞌam nidib bane bood suŋir, ka diꞌe saam ya yaan.

14 Sosim Winaꞌam ye o tis bane namisidi ya la yelsum. Sida, sosim o ka o tisi ba yelsum, ka da tisi ba nopoore. 15 Maalim sumalisim ne bane mor sumalisim. Ka mor susaꞌaŋ ne bane me mor susaꞌaŋ. 16 More potenꞌer yinni ne taaba. Ka da more titaꞌalim, ka lee siaki laꞌas ne tadimnam. Ka da tenꞌes ye ya nif nienee.

17 Da lebis beꞌed, beꞌed zugo. Kpeꞌeŋimi ya meŋ n tum line ka nidib wusa gos ka li a suꞌum. 18 Ka li yaꞌa nyaŋedin ya saꞌan, yanam mor sumalisim ne nidib wusa. 19 M baꞌabinoŋa, kudin da lebis beꞌed, beꞌed zugo, ka lee ke ka Winaꞌam supeen niŋi li. Li sob Winaꞌam gbauŋin ye, “Zugsob na lebis yo sam.” 20 Niŋimi wuu lin sob Winaꞌam gbauŋin ye,