1 M ye m buꞌosi ya ye, ya tenꞌes ye Winaꞌam bas o meŋ nidib ne bee? Ayei, baa biꞌelaa. M meŋ ane Israel nid, ka a Abraham yaaŋ, ka a Benjamin buudi, ka Winaꞌam pu basi ma. 2 Winaꞌam pu bas o nidib bane ka o deŋim gaŋ laa. Ya miꞌ lin sob Winaꞌam gbauŋin Elija n yel Winaꞌam, Israel yela siꞌem la ye, 3 “Zugsoba, ba kuu fu nodiꞌesidib, ka saꞌam fu maan zinꞌig la. Ka mam maꞌaa kpelim, ka ba mood ye ba ku mam men.” 4 Ka Winaꞌam da lebis o yel ye, “Mam kpelim mor nidib tusa ayopoi ka ba dol m, ka pu dol Baale.” 5 Li ane ala nannanna. Nidib biꞌela be ka Winaꞌam gaŋi ba o popielim zug. 6 O gaŋir yine o popielim ni, ka kaꞌa ba niŋir zugo. Winaꞌam gaŋir yaꞌa yiin nidib niŋir ni, o popielim la ku aan sida popielim.

7 Aa, to. Israel dim pu nye ban bood siꞌela. Li ane ba biꞌela bane ka Winaꞌam gaŋ la da nyee li. Ka bane kpelim la pu siak Winaꞌam ka lieb tobpuwumnib. 8 Li dolne lin da sob Winaꞌam gbauŋin ye,

11 Dinzugo, m buꞌosi ya ye, ya tenꞌes ye Israel dim da tuꞌugne ye ba lu ka saꞌam bee? Ayei, baa biꞌelaa. Ban tuꞌug ka tum tuumbeꞌed la zug, ka bane kaꞌ Jew dim la nye faangir. Winaꞌam niŋ ala ye Israel dim na mor fufum ne bane kaꞌ Jew dim la. 12 Israel dim tuumbeꞌed da ke ka dunia dim bane kpelim la nye yelsum bedego. Ka ban kaꞌ Winaꞌam nidib yaꞌas la ke ka bane kaꞌ Jew dim la nye Winaꞌam yelsum bedego. Ka saŋkan ka Israel dim bedego na len lieb Winaꞌam nidib yaꞌas la, Winaꞌam yelsum na a bedego n gaad ala.

13 M ye m sob neꞌ tis yanam bane kaꞌ Jew dim la. Ye Winaꞌam sadigim ke ka m a Kiristo Tumtum ka tum m yanam bane kaꞌ Jew dim saꞌan la, m naꞌasid tuum kan ka Winaꞌam tisi m 14 ye li ke ka m meŋ buudi mor fufum ne bane kaꞌ Jew dim la. Ka ala ka m na faaenn m meŋ buudi sieba. 15 Winaꞌam n daa bas Jew dim ka ba kaꞌa o nidib yaꞌas la, ke ka Winaꞌam naal ne dunia dim bane kpelim la. Ka li yuꞌun na a wala, Winaꞌam diꞌe ba ka ba aa o nidib yaꞌasa? Li na ane buntitaꞌar line a nyovur tis bane kpi la.

16 Fu yaꞌa nok bodobodo kane ka fu gbinꞌe yiiga la n tis Winaꞌam, line kpelim la me ane o din. Ka tiig nyaꞌa yaꞌa a Winaꞌam din, tiig la wila me ane o din. 17 Jew dim la wenne Olive tiig line be yin ne. Ka Winaꞌam koꞌ tikaŋa wila sieba, ka nok moogin Olive tiig wil n toꞌoŋ yin tiig, ka li lieb yinni. Yanam bane kaꞌ Jew dim la wenne moogin Olive tiig wil la, ka ya diꞌed Winaꞌam yelsum line yi ne Jew dim saꞌan na wenne moogin Olive tiig wil la diꞌed suꞌum line yi ne yin tiig la ni. 18 Dinzugo, da nweꞌed nyoꞌog ka neꞌes bane ka Winaꞌam koꞌogi ba bas wenne yin tiig wila laa. Da mor titaꞌalim; ka fu ane wil maꞌaa. Nyaꞌa tit uf suꞌum, ka kaꞌ fu tit nyaꞌa suꞌum.

19 Fu na lebis ye, “Sida, Winaꞌam da koꞌ wila la n ke ka paalo naam n tis man.” 20 Li a sida. Ban pu niŋ Winaꞌam yadda la zug ka o kuu ba. Ka fun niŋ o yadda la zug ka fu kpelim toꞌoŋ ne o. Dinzugo, da more titaꞌalim. Guꞌusimi fu meŋ. 21 Winaꞌam pu ke ka yin tiig wila bane pu niŋ o yadda la kpelim toꞌoŋ ne yin tiig laa. Fu tenꞌes ye fun yaꞌa pu niŋ o yaddaa, o na ke ka fu kpelim toꞌoŋ bee?

22 Gosim Winaꞌam zot nimbaanlig ka kpiꞌem ne sida siꞌem. O a sida sob tis bane li, ka fu yaꞌa kpelim niŋ o yadda la gullim, o na kpelim zoti fu nimbaanlig. Li yaꞌa kaꞌ walaa, o me na koꞌog fu men n bas. 23 Ka Jew dim yaꞌa tiak ka len niŋ Winaꞌam yadda, o na ke ka ba me len toꞌoŋ ne yin tiig la; ka Winaꞌam na nyaŋe niŋ ala. 24 Yanam bane kaꞌ Jew dim la wenne moogin Olive tiig wil, ka Winaꞌam koꞌogi li ka toꞌoŋi li ne yin Olive tiig la. Ka lin kaꞌ ban yiti toꞌoŋ tiis siꞌem laa. Ka li pu toe ka Winaꞌam na nok wil bane ka o koꞌog yin tiig la ni len toꞌoŋ ne ba meŋ tiig la yaꞌasa.

25 M baꞌabiise, m bood ye ya baŋ yelsuaꞌada kaŋa, ye ya da tenꞌes ye ya ane yaꞌam dima. Li ane ye Israel dim sieba mor zugkpiꞌeuŋ, ka li na be n ti paae saŋkan ka bane kaꞌ Jew dim wusa ka Winaꞌam gaŋ la kpenꞌ Winaꞌam soꞌolimin. 26 Ka ala ka Israel dim wusa na nye faangir. Li dolne lin da sob Winaꞌam gbauŋin ye,

28 Jew dim la da zanꞌas labasuŋ la zug, ka ba lieb Winaꞌam dataas, ka li ane yanam bane kaꞌ Jew dim la suꞌum nyeeb la zug. Winaꞌam gaŋ Jew dim buudi ne ba yaanam la zug ka ba me a nimbane ka o noŋ. 29 Winaꞌam pu gaŋid nidib ka tisidi ba o yelsum ka len tiakedi o yaꞌam. 30 Yanam bane kaꞌ Jew dim da zanꞌas Winaꞌam, ka nannanna ka o yuꞌun zoo ya nimbaanlig, Jew dim la zanꞌas o la zug. 31 Ala men Jew dim la zanꞌasid Winaꞌam nannanna ye ba na diꞌe nimbaanlzoor o saꞌan. Ka li me a nimbaanlzoor kane ka ya diꞌe Winaꞌam saꞌan la. 32 Nidib wusa zanꞌas Winaꞌam, ka Winaꞌam ke ka li loo ba wuu ba bene sarega ni, ye o na zo nidib wusa nimbaanlig.

33 Winaꞌam yelsum ane bedego, ka o mor yaꞌam ne miꞌilim bedego. Anoꞌon na nyaŋe yel o potenꞌere, ka na nyaŋe baŋ on niŋid siꞌela? 34 Li dolne lin da sob Winaꞌam gbauŋin ye,